நடிகர் விஜய்யின் தமிழர் வெற்றி கழகம் 2026 சட்டமன்ற தேர்தலை இலக்காக வைத்து பயணிக்கிறது. தமிழகத்தின் இரண்டு பெரும் திராவிட கட்சிகளுக்கு மத்தியில், ஒரு புதிய கட்சி தனித்து போட்டியிட்டு வெற்றியடைவது என்பது, வரலாறு காணாத சவாலாகும். தனித்து நின்று திமுக-வை வீழ்த்த முடியுமா? இல்லை, புத்திசாலித்தனமாக ஒரு வலிமையான கூட்டணி அமைப்பது காலத்தின் கட்டாயமா? என்பது குறித்து பார்ப்போம்.
தமிழகத்தில் ஆளுங்கட்சியாக இருக்கும் திமுக, ஆழமாக வேரூன்றிய அரசியல் கட்டமைப்பு, பல்லாயிரக்கணக்கான தொண்டர்கள், வலுவான நிதி ஆதாரம் மற்றும் பலமான ஊடக பின்னணியை கொண்டுள்ளது. இவ்வளவு பலம் இருந்தும் திமுக-வைப் பொருத்தவரை, அக்கட்சி இதுவரை தனித்து போட்டியிட்டதே இல்லை.
வெற்றிகரமான திராவிட கட்சிகள் கூட, தங்களின் வெற்றிக்காக சிறு கட்சிகள் முதல் தேசிய கட்சிகள் வரை பெரிய கூட்டணிகளை அமைப்பதையே வழக்கமாக கொண்டுள்ளன. எனவே, திமுக-வையே அதிமுகவே தனித்து வீழ்த்த முடியாத நிலையில், விஜய்யின் த.வெ.க.வால் தனித்து போட்டியிட்டு ஆட்சியைப் பிடிப்பது என்பது அரசியல் ரீதியாக சாத்தியமற்றது என்றே அரசியல் விமர்சகர்கள் கருதுகின்றனர்.
த.வெ.க. தனித்து போட்டியிட்டால், அது பெரும்பாலும் திமுக எதிர்ப்பு வாக்குகளை பிரிக்கும். இதனால் மறைமுகமாக திமுக-வின் வெற்றி வாய்ப்பையே அது உறுதி செய்யும் அபாயம் உள்ளது. விஜய் ஒரு திரைப்பட நட்சத்திரமாக இருக்கலாம், ஆனால் அவர் அரசியல் களத்தில் நிலைத்து நிற்க, ஒரு பெரிய கட்சியின் துணையும், கூட்டணி கட்டமைப்புமே தேவைப்படுகிறது.
த.வெ.க. புதிதாக தொடங்கப்பட்டிருப்பதால், 234 தொகுதிகளுக்கும் வலுவான, குற்றமற்ற பின்னணி கொண்ட வேட்பாளர்களை நிறுத்துவது பெரும் சவாலாகும். தேர்தல் நெருங்கும் சமயத்தில், பலம் குறைந்த புதிய கட்சிகளின் வேட்பாளர்களை பெரிய கட்சிகள் எளிதில் பணம் கொடுத்து விலை பேசும் வாய்ப்பு மிக அதிகம். த.வெ.க.வின் வேட்பாளர்களும் கடைசி நேரத்தில் இவ்வாறு விலைக்கு பேசப்படாமல் இருக்க, ஒரு பெரிய கட்சியின் உறுதுணை மற்றும் பாதுகாப்பு தேவை.
தேர்தல் நேர பிரச்சினைகள், ஆவண சிக்கல்கள், பண பட்டுவாடா புகார்கள் போன்றவற்றை சந்திக்கத் த.வெ.க.வுக்கு அனுபவம் வாய்ந்த சட்ட கட்டமைப்பும், கள நிர்வாகமும் தேவை. த.வெ.க-வில் ரசிகர்கள் இருந்தாலும், தேர்தலில் பூத் கமிட்டி அமைப்பது, மக்களை சந்திப்பது, பணம்/பொருட்கள் விநியோகத்தை கண்காணிப்பது போன்ற கடினமான களப்பணிகளை செய்ய, ஒரு பெரிய கட்சியின் விரிவான அடிமட்ட தொண்டர் கட்டமைப்பு அவசியம்.
தேர்தல் செலவுகளை சமாளிப்பதற்கும், பரப்புரைக்கான தளவாடங்களை ஒருங்கிணைப்பதற்கும் ஒரு பெரிய கூட்டணி கட்சி உறுதுணையாக இருப்பது முக்கியம். விஜய் உண்மையிலேயே அரசியலில் நீண்ட கால தாக்கம் ஏற்படுத்த விரும்பினால், அவர் கூட்டணி அரசியலின் தவிர்க்க முடியாத யதார்த்தத்தை புரிந்துகொள்ள வேண்டும்.
முதல் தேர்தலில் கூட்டணியில் இணைந்து, ஆட்சி அமைக்கும் அதிகாரத்தில் பங்கு பெறுவதே புத்திசாலித்தனமான நகர்வாக இருக்கும். இதன் மூலம், தனது கட்சிக்கும் தனது ஆதரவாளர்களுக்கும் உரிய அதிகாரத்தை பெற்றுத் தர முடியும்.
- த.வெ.க.வின் தலைவர் விஜய், தனது திரைப்பட நட்சத்திர பிம்பத்தை நம்பி தனித்து நிற்கும் முடிவை எடுத்தால், அது தேர்தல் தோல்வியில் முடிந்து, அவரது அரசியல் எதிர்காலத்திற்கே பின்னடைவை ஏற்படுத்தலாம். எனவே, 2026 சட்டமன்ற தேர்தலில், தனது கட்சிக்கு சட்டபூர்வமான பாதுகாப்பையும் அரசியல் அங்கீகாரத்தையும் பெற, அவர் ஒரு வலிமையான கூட்டணியை அமைப்பது காலத்தின் கட்டாயமாகும். தனித்து நின்று வீழ்வதா, அல்லது கூட்டணி அமைத்து உயர்வதா என்ற சவாலை விஜய் எப்படி சமாளிக்க போகிறார் என்பதை ஆவலுடன் அரசியல் களம் எதிர்நோக்குகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
