தமிழகத்தில் இந்திய தேர்தல் ஆணையத்தால் மேற்கொள்ளப்பட்டு வரும் வாக்காளர் பட்டியல் சிறப்பு தீவிர திருத்தப் பணி ஆளுங்கட்சியான திமுக மற்றும் எதிர்க்கட்சிகளுக்கு இடையே ஒரு பெரும் அரசியல் விவாதத்தை ஏற்படுத்தியுள்ளது. இந்த திருத்தப் பணியை எதிர்த்து திமுக தரப்பில் உச்ச நீதிமன்றத்தில் வழக்கு தொடரப்பட்டுள்ள அதே வேளையில், கள அளவில் ஆளுங்கட்சியினர் இந்த நடைமுறையில் தலையிடுவதாக எதிர்க்கட்சிகள் குற்றம் சாட்டுகின்றன. சட்ட ரீதியாக இத்திட்டத்தை எதிர்ப்பதும், அதே நேரத்தில் நிர்வாக ரீதியாக அதன் செயல்பாட்டில் ஆதிக்கம் செலுத்துவதும் என திமுக இரட்டை நிலைப்பாட்டை கொண்டுள்ளதாக அதிமுக, தவெக போன்ற கட்சிகள் புகார் அளித்துள்ளன.
வாக்காளர் பட்டியலில் உள்ள போலி பெயர்கள், ஒரே நபர் பல இடங்களில் பதிவு செய்திருப்பது மற்றும் உயிரிழந்தவர்களின் பெயர்களை நீக்குவதே இந்த சிறப்பு திருத்த பணியின் முக்கிய நோக்கமாகும். ஆனால், இந்த பணிகளை மேற்கொள்ளும் வாக்குச்சாவடி நிலை அலுவலர்களின் பணிகளில் திமுகவினர் தலையிடுவதாகவும், படிவங்களை அவர்களே விநியோகித்து சேகரிப்பதாகவும் எதிர்க்கட்சிகள் குற்றம் சாட்டுகின்றன. இது தொடர்பாக நிழற்பட ஆதாரங்களுடன் தமிழக தலைமை தேர்தல் அதிகாரியிடம் புகார்கள் அளிக்கப்பட்டுள்ளன. இருப்பினும், தேர்தல் ஆணையம் இக்குற்றச்சாட்டுகளை மறுத்துள்ளதுடன், உரிய விதிகளை பின்பற்றியே நீக்கங்கள் நடைபெறும் என தெரிவித்துள்ளது.
இந்த விவகாரத்தில் திமுக சார்பில் உச்ச நீதிமன்றத்தில் தாக்கல் செய்யப்பட்ட மனுவில், இந்த சிறப்பு திருத்த பணி தேர்தல் ஆணையத்தின் வழிகாட்டுதல்களை மீறுவதாகவும், குறிப்பாக விளிம்புநிலை மக்களின் பெயர்கள் பெருமளவில் நீக்கப்பட வாய்ப்புள்ளதாகவும் வாதிடப்பட்டது. இந்த வழக்கை விசாரித்த உச்ச நீதிமன்றம், இது ஒரு வழக்கமான நடைமுறை அல்ல என்றும், தேர்தல் ஆணையத்திற்கு இத்தகைய சிறப்பு திருத்தங்களை மேற்கொள்ள முழு அதிகாரம் உண்டு என்றும் தெளிவுபடுத்தியது. பீகார் மாநிலத்தின் SIR பணிகளை சுட்டிக்காட்டிய நீதிமன்றம், வெளிப்படையான முறையில் நடத்தப்படும் வரை இந்த நடைமுறை சட்டவிரோதமானது அல்ல என்று தேர்தல் ஆணையத்தின் அதிகாரத்தை உறுதிப்படுத்தியுள்ளது.
தமிழகத்தின் தலைநகரான சென்னையில் இந்ப் பணிகளின் தாக்கம் தற்போது வெளிப்படையாக தெரியத் தொடங்கியுள்ளது. ராயபுரம், மேற்கு ஜாபர்கான்பேட்டை, சேப்பாக்கம் போன்ற பகுதிகளில் மேற்கொள்ளப்பட்ட ஆய்வில், ஆயிரக்கணக்கான வாக்காளர்கள் அவர்கள் முகவரியில் இல்லை என்பதும், பலர் உயிரிழந்ததும் கண்டறியப்பட்டுள்ளது. சுமார் 40 லட்சம் குடியிருப்புகளை கொண்ட சென்னையில், இதுவரை 37 லட்சம் சரிபார்ப்பு படிவங்கள் விநியோகிக்கப்பட்டுள்ளதாக சென்னை மாநகராட்சி தெரிவித்துள்ளது. இறுதி சரிபார்ப்பிற்கு பிறகே பெயர்கள் நீக்கம் குறித்த இறுதி முடிவை தேர்தல் பதிவு அதிகாரிகள் அறிவிப்பார்கள்.
தென் மாவட்டங்களிலும் இந்த பணிகள் தீவிரமாக நடைபெற்று வருகின்றன. உதாரணமாக, திருநெல்வேலி மாவட்டத்தில் இறப்பு, போலி பதிவுகள் மற்றும் இடம்பெயர்வு காரணமாக சுமார் 78,000 பெயர்கள் நீக்கப்பட வாய்ப்புள்ளதாக மாவட்ட நிர்வாகம் தெரிவித்துள்ளது. வாக்காளர் பட்டியலை துல்லியமாக மாற்றுவதே தங்களின் நோக்கம் என அதிகாரிகள் தரப்பில் கூறப்பட்டாலும், இது ஒரு அரசியல் உள்நோக்கம் கொண்ட நடவடிக்கை என்றே எதிர்க்கட்சிகள் தொடர்ந்து விமர்சிக்கின்றன. குறிப்பாக, ஆளுங்கட்சி உறுப்பினர்கள் வீடு வீடாக சென்று மக்களை அச்சுறுத்துவதாகவும், உரிமை பறிபோகும் என பயத்தை உருவாக்குவதாகவும் புகார்கள் எழுந்துள்ளன.
தேர்தல் ஆணையம் மற்றும் நீதிமன்றம் ஆகியவை இந்த சிறப்புத் திருத்த பணிக்கு தங்களின் ஆதரவை தெரிவித்துள்ள நிலையிலும், தமிழக அரசியல் களம் இதனால் சூடுபிடித்துள்ளது. வரும் தேர்தல்களை கருத்தில் கொண்டு, வாக்காளர் பட்டியலில் தங்களுக்கு சாதகமான மாற்றங்களை செய்ய கட்சிகள் முயற்சிப்பதாகக் கூறப்படும் புகார்கள் மக்களிடையே குழப்பத்தை ஏற்படுத்தியுள்ளன. ஒருபுறம் நிர்வாக ரீதியான துல்லியத்தை நோக்கி அதிகாரிகள் செயல்படுவதாக கூறினாலும், அரசியல் கட்சிகளின் நேரடி தலையீடு இந்த பணியின் நடுநிலையை கேள்விக்குறியாக்கியுள்ளதாக விமர்சகர்கள் கருதுகின்றனர்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
