தமிழக அரசியலில் 2026 சட்டமன்ற தேர்தலை முன்னிட்டு நிலவும் கூட்டணி மாற்றங்கள் குறித்த விவாதங்கள் தற்போது உச்சகட்டத்தை எட்டியுள்ளன. குறிப்பாக, திமுக கூட்டணியில் இருந்து காங்கிரஸ் வெளியேறி, நடிகர் விஜய்யின் தமிழக வெற்றிக் கழகத்துடன் கைகோர்க்க வேண்டும் என்ற கோரிக்கை காங்கிரஸ் கட்சிக்குள்ளேயே ஒரு சாராரிடம் வலுவாக எழுந்துள்ளது.
மூத்த பத்திரிகையாளர் துக்ளக் ரமேஷ் அவர்களின் கூற்றுப்படி, காங்கிரஸ் இம்முறை திமுகவிடம் 35 முதல் 40 தொகுதிகள் வரை எதிர்பார்க்கிறது. ஆனால், திமுக 28 முதல் 30 இடங்களுக்கு மேல் கொடுக்க தயாராக இல்லை. இந்த இழுபறி நீடித்தால், காங்கிரஸ் துணிச்சலாக வெளியேறி விஜய்யுடன் இணைந்தால் மட்டுமே தமிழகத்தில் ஒரு பெரிய அரசியல் மாற்றம் ஏற்படும். இல்லையெனில், திமுகவின் “தொங்கு சதையாக” அறிவாலய வாசலில் நின்று சீட் வாங்குவதால் காங்கிரஸிற்கு இனி எதிர்காலமே இருக்காது என்ற எச்சரிக்கையை துக்ளக் ரமேஷ் முன்வைக்கிறார்.
காங்கிரஸ் மற்றும் தவெக கூட்டணி அமைந்தால், அது 2026 தேர்தல் களத்தையே தலைகீழாக மாற்றக்கூடும். விஜய்க்கு இருக்கும் இளைஞர்கள் மற்றும் இளம் பெண்களின் ஆதரவு, சிறுபான்மை மக்களின் வாக்கு வங்கி ஆகியவற்றுடன் காங்கிரஸின் பாரம்பரிய வாக்குகளும் இணைந்தால், அது ஒரு பலமான முக்கோண போட்டியை உருவாக்கும். இத்தகைய சூழலில் திமுகவோ அல்லது அதிமுகவோ தனிப்பெரும்பான்மை பெறுவது மிகவும் கடினமாகிவிடும். விஜய் சுமார் 15 முதல் 18 சதவீத வாக்குகளை தனித்தே பெறுவார் என்று கணிக்கப்படும் நிலையில், ஒரு கூட்டணி அமையும் பட்சத்தில் அது 40 முதல் 50 தொகுதிகள் வரை வெற்றி பெற்று, ஆட்சியை தீர்மானிக்கும் சக்தியாக மாற வாய்ப்புள்ளது. இது திராவிட கட்சிகளின் தனி ஆதிக்கத்திற்கு ஒரு முற்றுப்புள்ளியாக அமையக்கூடும்.
அதிமுகவின் தற்போதைய நிலையை பொறுத்தவரை, அது “குளுக்கோஸ் ஏற்ற வேண்டிய நோயாளி” போல பலவீனமாக இருப்பதாக துக்ளக் ரமேஷ் விமர்சிக்கிறார். இரட்டை இலை சின்னமும், எம்ஜிஆர் – ஜெயலலிதா ஆகியோரின் முகங்களும் மட்டுமே அக்கட்சியின் ஒரே பலமாக உள்ளன. எடப்பாடி பழனிசாமி அவர்கள் ஒரு வலிமையான கூட்டணியை உருவாக்குவதில் தோல்வியடைந்துவிட்டதாக கருதப்படுகிறது. இந்த பலவீனத்தை ஈடுகட்ட, எடப்பாடி பழனிசாமி அவர்கள் “அதிமுக ஆட்சிக்கு வந்தால் அனைத்து குடும்பங்களுக்கும் ரூ.10,000 நிவாரணம் மற்றும் வேலையில்லா இளைஞர்களுக்கு மாதம் ரீ/2,000 வழங்கப்படும்” என்ற கவர்ச்சிகரமான வாக்குறுதிகளை அறிவித்துள்ளார். ஏற்கனவே பத்தரை லட்சம் கோடி கடனில் இருக்கும் தமிழகத்தில், இவ்வளவு பெரிய நிதியை எங்கிருந்து திரட்டுவார் என்ற கேள்வி எழுவதோடு, இது மக்களை ஏமாற்றும் ஒரு தேர்தல் தந்திரம் என்ற விமர்சனமும் முன்வைக்கப்படுகிறது.
தேமுதிகவின் நிலைப்பாடு பெரும் அதிர்ச்சியை ஏற்படுத்தியுள்ளது. மறைந்த கேப்டன் விஜயகாந்தை திமுக மேடையில் நடிகர் வடிவேலு மிக கேவலமாக பேசியபோது அதை ரசித்தவர்களுடனேயே தற்போது பிரேமலதா விஜயகாந்த் கைகோர்த்திருப்பது, அக்கட்சியின் கொள்கை வீழ்ச்சியை காட்டுகிறது. திமுக மற்றும் அதிமுக ஆகிய இரண்டு தரப்பிலும் ஒரே நேரத்தில் பேரம் பேசிய தேமுதிகவிற்கு எந்த கொள்கையும் கிடையாது என்றும், வெறும் சீட்டு மற்றும் நோட்டுக்காகவே இந்த கூட்டணி அமைந்திருப்பதாகவும் விமர்சனங்கள் எழுகின்றன. தேமுதிகவிற்கு இம்முறை அதிக இடங்களை திமுக ஒதுக்குவது, அவர்கள் விஜய் அல்லது அதிமுக பக்கம் சென்றுவிடக்கூடாது என்ற அச்சத்தின் வெளிப்பாடே தவிர, அவர்களின் பலத்தை பார்த்து அல்ல. உண்மையில் தேமுதிகவை விட விடுதலை சிறுத்தைகள் கட்சி வலிமையாக இருந்தாலும், அவர்கள் திமுகவிடம் கையேந்தும் நிலையில் இருப்பது துரதிஷ்டவசமானது.
தென் மாவட்ட அரசியலில் சசிகலா மற்றும் ஓ. பன்னீர்செல்வம் ஆகியோரின் நிலைப்பாடும் முக்கியத்துவம் பெறுகிறது. எடப்பாடி பழனிசாமியால் ஓரங்கட்டப்பட்ட இவர்கள், அதிமுகவின் வாக்கு வங்கியை சிதைப்பதில் முக்கிய பங்கு வகிப்பார்கள். சசிகலா அவர்கள் தேவர் சமூக மக்கள் மத்தியில் செல்வாக்கு பெற்றிருந்தாலும், அவரால் தனித்து நின்று வெற்றி பெற முடியுமா என்பது சந்தேகமே. ஆனால், எடப்பாடி பழனிசாமிக்கு ஒரு பாடத்தை புகட்ட வேண்டும் என்பதற்காக அவர் தீவிரமாக செயல்பட வாய்ப்புள்ளது. அதே சமயம், ஓபிஎஸ் அவர்களுக்கு திமுக தரப்பிலிருந்து அழைப்பு போயிருப்பதாக கூறப்படுவதால், அவர் விரைவில் திமுக ஆதரவு நிலைப்பாட்டை எடுக்கக்கூடும். இது அதிமுகவின் வாக்கு வங்கியில் மேலும் விரிசலை ஏற்படுத்தும் என துக்ளக் ரமேஷ் தெரிவித்தார்.
ஒட்டுமொத்தமாக பார்க்கும்போது, 2026 தேர்தல் என்பது ஆட்சியின் குறைகளும், சிதறிக்கிடக்கும் எதிரணிகளும் மோதிக்கொள்ளும் ஒரு களமாக இருக்கும். சொத்து வரி உயர்வு, மின்சார கட்டண உயர்வு, போதை பொருள் கலாச்சாரம் மற்றும் சட்டம் ஒழுங்கு சீர்கேடு போன்ற காரணங்களால் திமுக மீது மக்களிடையே அதிருப்தி நிலவினாலும், ஒரு வலிமையான கூட்டணி இருப்பதாலும், எதிரணிகள் பிரிந்து கிடப்பதாலும் திமுக தற்போதைக்கு முன்னணியில் உள்ளது. ஒருவேளை காங்கிரஸ், விஜய் மற்றும் விசிக போன்ற கட்சிகள் ஓரணியில் திரண்டால் மட்டுமே திமுகவிற்கு உண்மையான சவால் பிறக்கும். தமிழக மக்கள் மாற்றத்தை விரும்புகிறார்களா அல்லது தற்காலிக பண சலுகைகளில் மயங்குகிறார்களா என்பது 2026-ல் தான் முழுமையாகத் தெரியும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
