தமிழக வெற்றி கழகத்தின் தலைவர் விஜய் அவர்களின் மக்கள் சந்திப்பு நிகழ்வுகள், கரூர் சம்பவத்திற்குப்பிறகு மீண்டும் சூடுபிடித்துள்ளன. குறிப்பாக, புதுச்சேரியில் நடக்கவிருக்கும் பொதுக்கூட்டம் மிகுந்த எதிர்பார்ப்பை ஏற்படுத்தியுள்ளது. ஒரு நடிகர் அரசியல் தலைவராக மாறியிருப்பதால், அதிக கூட்டம் கூடும் என்ற காரணத்தை காட்டி, அரசாங்கத்தால் அளவுக்கு அதிகமான கட்டுப்பாடுகள் விதிக்கப்படுவதாக தவெக தரப்பில் குற்றம் சாட்டப்படுகிறது. ஒரு கட்சி நியாயமான விதிமுறைகளை பின்பற்றத் தயாராக இருக்கும்போது, மற்றவர்களுக்கு இல்லாத நெருக்கடிகள் கொடுப்பது ஜனநாயக விரோதமானது என்றும், இது ஆளும் தரப்பின் அச்சத்தின் வெளிப்பாடு என்றும் தவெகவினர் வாதிடுகின்றனர்.
இந்த அதீத கட்டுப்பாடுகளுக்கு உதாரணமாக பல நிகழ்வுகள் சுட்டிக்காட்டப்படுகின்றன. உதாரணமாக, ஒரு பொதுக்கூட்டத்தின்போது விஜய், பேருந்தின் மேலே ஏறி மக்களுக்கு கை காட்டியிருந்தால் கூட்டம் குறைந்திருக்கும் என்று ஆணையத்தின் தலைவர் ஒருவரே பேசிய நிலையில், அவர் பேருந்தின் மேலே ஏறி நிற்கக்கூடாது, கை காட்டக்கூடாது என்று நிபந்தனை விதிக்கப்பட்டது ஏன் என்ற கேள்வி எழுகிறது.
மேலும், விநாயகர் சதுர்த்தியை ஒட்டிய விடுமுறையில் மாநில மாநாட்டிற்கு அனுமதி கேட்கப்பட்டபோது, அதற்கு முன்னதாக இருந்த வார நாட்களில் மட்டும் அனுமதி வழங்கப்பட்டதன் நோக்கம் என்ன? கார்த்திகை தீபத்திற்கு அனுமதி கேட்டால், பாபர் மசூதி இடிப்பு தினத்தை காரணம் காட்டி அனுமதி மறுப்பது ஏன்? இந்த கட்டுப்பாடுகள் யாவும் தவெகவை ஒடுக்குவதற்கான அரசியல் அழுத்தம் என்றே கருதப்படுகிறது.
தவெகவின் அரசியல் கொள்கை குறித்து எழுப்பப்படும் விமர்சனங்களுக்கு, குறிப்பாக ‘தற்குறி’ போன்ற வார்த்தை பிரயோகங்களுக்கு, தவெக தரப்பில் இருந்து வலுவான மறுப்பு தெரிவிக்கப்படுகிறது. அரசியல் என்பது வெறுமனே சித்தாந்தங்கள் பேசுவது மட்டுமல்ல என்றும், அது மக்களின் ஒவ்வொரு பிரச்சினைக்கும் தீர்வு காணும் கொள்கைகளை உருவாக்குவதுதான் என்றும் வலியுறுத்தப்படுகிறது. ‘திராவிடம்’, ‘தேசியவாதம்’ போன்றவை சித்தாந்தங்கள் மட்டுமே; ஆனால், ஆட்சிக்கு வந்த பிறகு நடைமுறைப்படுத்த வேண்டிய கொள்கைகள் என்னென்ன என்பதை பேசுவதே இன்றைய தேவை. கொள்கைகளை பேசும் தலைவனை கொள்கை இல்லை என்று கூறுவது, அரசியல் புரிதல் இல்லாதவர்களே என்றும், தவெக கொள்கை இல்லாமல் இல்லை என்றும் பதிலடி கொடுக்கப்படுகிறது.
தவெகவை வலுப்படுத்தும் விதமாக, அரசியல் அனுபவம் வாய்ந்த நபர்கள் கட்சியில் இணைவது கவனிக்கத்தக்கது. குறிப்பாக, செங்கோட்டையன் மற்றும் நாஞ்சில் சம்பத் போன்றவர்கள் இணைவது, தவெகவின் அரசியல் போக்கை மாற்றுவதை காட்டிலும், அதன் வெற்றிக்கான வாய்ப்புகளை கணிக்கும் திறனைக் கொண்டது என்று தவெக தரப்பினர் பார்க்கின்றனர். ஏனெனில், இவர்கள் தி.மு.க., அ.தி.மு.க. போன்ற பெரிய கட்சிகளின் எழுச்சியிலும் வீழ்ச்சியிலும் இருந்தவர்கள். இவர்களின் வருகை, ‘தவெகவில் பெரிய தலைவர்கள் இல்லை’, ‘அரசியல் தெரியாதவர்கள்’ என்ற எதிர்க்கட்சிகளின் விமர்சனங்களுக்கு முற்றுப்புள்ளி வைக்கிறது. இவர்களை போன்ற மூத்த அரசியல் தலைவர்கள் இணைவது, தவெக மீது மக்கள் மத்தியில் ஒரு நம்பிக்கையையும் ஈர்ப்பையும் உருவாக்குகிறது.
தவெகவின் அரசியல் அணுகுமுறை, தமிழ்நாட்டையும் புதுச்சேரியையும் பிரித்து பார்க்காமல், ‘எல்லாருக்குமான எல்லாமும்’ என்ற சமத்துவ அரசியலை பேசுவதாகும். காஞ்சிபுரத்தில் அனைவருக்கும் வீடு, வாகனம் எப்படி அடிப்படை உரிமைகளோ, அதே தேவை புதுச்சேரி மக்களுக்கும் இருக்கும். எனவே, தவெகவின் அரசியல் எல்லைகளற்ற அரசியல் ஆகும். புதுச்சேரியின் மொழி தமிழ்தான். அங்கும் அடிப்படையான வாழ்வாதார பிரச்சினைகள் உள்ளன. அந்த பிரச்சினைகளுக்கு தீர்வு காணும் அரசியலை பேசுவது, ஒரு சமத்துவமான தலைவரின் பார்வை. அவர் யாரையும் மதம், இனம், மொழி என பிரித்துப் பார்க்கவில்லை.
கரூர் போன்ற துயர சம்பவங்கள் மீண்டும் நடக்காமல் இருக்க, தவெக மிகுந்த கவனத்துடன் செயல்படுகிறது. இனி சாலை பேரணிகளுக்கு பதிலாக, மேடைகள் அமைத்து மக்களை சந்திக்கும் பொதுக்கூட்டங்களையே நடத்துவது என முடிவு செய்யப்பட்டுள்ளது. மேலும், காவல்துறையை மட்டும் நம்பாமல், தொண்டரணி, மகளிர் அணி, இளைஞர் அணி என பல படைகளை கொண்ட வெற்றி கழகத்தின் பாதுகாப்பு படை உருவாக்கப்பட்டு, ஓய்வுபெற்ற மூத்த அதிகாரிகளை கொண்டு பயிற்சி அளிக்கப்பட்டு வருகிறது.
கூட்டத்தை கட்டுப்படுத்துவது மற்றும் அவசர காலங்களில் உதவுவது குறித்த நெறிமுறைகளை இவர்களுக்கு வழங்கியுள்ளதால், இனி இதுபோன்ற விரும்பத்தகாத சம்பவங்கள் நடக்காது என்று நம்புவதாகவும், தவெகவின் செயல்பாடு ஜனநாயக விரோதமாக செயல்படும் ஆளும் தரப்பின் அச்சத்தையே காட்டுகிறது என்றும் தவெக தரப்பினர் தெரிவிக்கின்றனர்.
மேலும் திமுக கூட்டணியாகிய சுவரில் இருந்து ஒரே ஒரு செங்கலை உருவிவிட்டால் போதும், அந்த சுவர் மளமளவென சரிந்துவிடும் என்று தமிழக வெற்றி கழகத்தினர் நம்பிக்கை தெரிவிக்கின்றனர். சமீபத்திய கருத்துக்கணிப்புகள், அதிமுக கூட்டணியை விட தவெக கிட்டத்தட்ட இரு மடங்கு அதிக ஆதரவை காட்டுவதாகவும், அதே சமயம் திமுக கூட்டணியை விட சற்றே குறைவான நிலையில் இருப்பதாகவும் காட்டுவதால், தவெகவை ஒரு முக்கியமான அரசியல் சக்தியாக இது அடையாளம் காட்டுகிறது. இன்னும் சில மாதங்களில் அரசியல் சூழ்நிலைகள் மாறும் என்றும், தி.மு.க. கூட்டணிக்குள் இருந்து ஒரு பெரிய கட்சியை பிரித்தால், அது அவர்களின் மொத்த வலிமையையும் சிதைத்துவிடும் என்றும் தவெகவின் அரசியல் கணக்குகள் தெரிவிக்கின்றன.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
