அ.தி.மு.க., வரும் தேர்தலில் பா.ஜ.க.வை கழட்டிவிட்டு, தமிழக வெற்றி கழகத்துடன் கூட்டணி அமைக்கலாம் என்று பரவலாக பேசப்பட்டு வருகிறது. இந்த சூழலில், அ.தி.மு.க.வுடன் கூட்டணி இல்லாத நிலையில் தமிழகத்தில் பா.ஜ.க.வின் அடுத்தகட்ட அரசியல் நகர்வுகள் என்னவாக இருக்கும் என்பது குறித்து அரசியல் நோக்கர்கள் மத்தியில் பல்வேறு கருத்துகள் நிலவி வருகின்றன.
அமித் ஷாவின் ‘மாற்று வியூகம்’
அ.தி.மு.க., கூட்டணியில் இருந்து வெளியேறினால், பா.ஜ.க. தனிமைப்படுத்தப்படும் என்று கூறப்பட்டாலும், பா.ஜ.க.வின் மத்திய தலைமை, குறிப்பாக பிரதமர் நரேந்திர மோடி மற்றும் அமித் ஷா ஒரு மாற்று வியூகத்துடன் களமிறங்க திட்டமிட்டுள்ளதாக தகவல்கள் தெரிவிக்கின்றன.
அண்ணாமலை தலைமையில் கூட்டணி:
அ.தி.மு.க. கூட்டணியில் இருந்து விலகினால், தமிழக பா.ஜ.க.வின் தலைமை பொறுப்பை அண்ணாமலை மீண்டும் ஏற்பார் என்றும், அவர் தலைமையில் ஒரு புதிய கூட்டணி அமைக்கப்படும் என்றும் கூறப்படுகிறது.
சூறாவளி சுற்றுப்பயணம்:
அண்ணாமலை தமிழகம் முழுவதும் சூறாவளி சுற்றுப்பயணம் செய்து, பா.ஜ.க.வின் செல்வாக்கை அதிகரிக்க முயற்சிப்பார்.
திரை நட்சத்திரங்களின் ஆதரவு:
இந்த புதிய கூட்டணியின் பிரச்சாரக் களத்தில், சரத்குமார், குஷ்பூ போன்ற கட்சியின் திரை நட்சத்திரங்கள் மட்டுமின்றி விஷால் உள்பட சில சினிமா பிரபலங்களின் ஆதரவை திரட்ட பா.ஜ.க. திட்டமிட்டுள்ளது.
ஓ.பி.எஸ்.ஸின் வருகை:
தேசிய ஜனநாயக கூட்டணியில் இருந்து வெளியேறிய ஓ.பன்னீர்செல்வம் மீண்டும் சமாதானப்படுத்தப்பட்டு, பா.ஜ.க. கூட்டணிக்குள் கொண்டு வரப்படுவார் என்றும், அவரது தென் மாவட்ட சுற்றுப்பயணம் இந்த கூட்டணிக்கு சாதகமாக அமையும் என்றும் எதிர்பார்க்கப்படுகிறது.
அ.தி.மு.க.வின் நிலை என்ன? புதிய கூட்டணிக்கான உறுதிமொழிகள்:
தே.மு.தி.க., பாமக போன்ற கட்சிகளுக்கு, அவர்களுக்கு எதிர்பார்த்த தொகுதிகள் மற்றும் ராஜ்ய சபா சீட்டுகள் கிடைக்கும் என்றும், புதிய தமிழகம், ஐ.ஜே.கே., ஜான் பாண்டியன் கட்சி போன்ற கட்சிகளுக்கும் பா.ஜ.க. சில வாக்குறுதிகளை அளிக்கும் என்றும் கூறப்படுகிறது.
தனித்துப் போட்டியா?:
அ.தி.மு.க. விஜய்யுடன் சேர்ந்தாலும், சேராவிட்டாலும், பா.ஜ.க.வை கழட்டிவிட்டால், அது தனித்து ஒரு புதிய கூட்டணியை உருவாக்கி, மாநிலத்தில் இரண்டாவது இடத்தை பிடிப்பதற்கான சாத்தியக்கூறுகள் இருப்பதாகவும் அரசியல் விமர்சகர்கள் கூறுகின்றனர்.
அ.தி.மு.க.வின் பின்னடைவு:
அ.தி.மு.க.வின் தலைவர் எடப்பாடி பழனிசாமி, பா.ஜ.க.வை கழட்டிவிட்டு, விஜய்யையும் கூட்டணியில் சேர முடியாமல் போனால், அது அ.தி.மு.க.வுக்குப் பெரும் பின்னடைவாக அமையும். அ.தி.மு.க. மற்றும் விஜய் தனித்தனியாக போட்டியிடும்போது, விஜய்யின் வாக்கு சதவீதம் அ.தி.மு.க.வை விட அதிகமாக இருந்தால், தேர்தல் முடிவுகளுக்கு பின் அ.தி.மு.க. சிதறவும் வாய்ப்பு உள்ளது. அப்போது, பா.ஜ.க. தனது கட்சியை மேலும் பலப்படுத்திக்கொள்ளும் என்று திட்டமிடுகிறது.
அரசியல் கணக்கீடுகள்
ஒருபுறம், தி.மு.க. வலுவான கூட்டணியுடன் இருந்தாலும், மக்களின் அதிருப்தியை சமாளிக்க வேண்டிய மிகப்பெரிய சவாலை எதிர்கொள்கிறது. மற்றொருபுறம், புதிதாக களமிறங்கும் விஜய், தி.மு.க. மற்றும் அ.தி.மு.க. ஆகிய இரு கட்சிகளுக்கும் சவாலாக இருப்பார். இந்த நிலையில், தேர்தல் முடிவுகள் எந்தப் பக்கம் வேண்டுமானாலும் மாறலாம் என்று அரசியல் விமர்சகர்கள் கருத்து தெரிவித்து வருகின்றனர்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
