அ.தி.மு.க.வின் மூத்த தலைவரான செங்கோட்டையன், தமிழக வெற்றிக் கழகத்தில் இணைந்தது விஜய்க்கு ஒரு ‘அன் எக்ஸ்பெக்டட் வின்ஃபால்’ (எதிர்பாராத லாபம்) என்று அரசியல் வட்டாரத்தில் பேசப்படுகிறது.
அ.தி.மு.க.வின் மூத்த அரசியல் ஆளுமைகளில் ஒருவரான செங்கோட்டையன், தமிழக வெற்றிக் கழகத்தில் இணைந்தது, அரசியல் அரங்கில் பெரும் அதிர்வலைகளை ஏற்படுத்தியுள்ளது. இது நடிகர் விஜய்க்கு கிடைத்த ஓர் எதிர்பாராத லாபம் என்று அரசியல் விமர்சகர்களால் குறிப்பிடப்படுகிறது. நீண்ட அரசியல் அனுபவம் கொண்ட செங்கோட்டையனின் வருகை, குறுகிய காலத்தில் தொடங்கப்பட்ட த.வெ.க.வுக்கு ஒரு திடமான அரசியல் அடித்தளத்தை அமைத்துக் கொடுத்துள்ளது. ஆனால், அவர் த.வெ.க.வில் இணைவதற்கு முன்னர், தலைவர் விஜய்யிடம் மூன்று முக்கிய நிபந்தனைகளை முன்வைத்ததாக தகவல்கள் வெளியாகியுள்ளன.
செங்கோட்டையன் விஜய்யிடம் வைத்த முதல் மற்றும் மிக முக்கியமான நிபந்தனை, அவரது அரசியல் எதிரியான அ.தி.மு.க.வின் பொதுச்செயலாளர் எடப்பாடி பழனிசாமி அவர்களை அவரது சொந்த தொகுதியில் தேர்தலில் தோற்கடிப்பது. அ.தி.மு.க. தேர்தலில் வெற்றி பெற்றாலும்கூட, எடப்பாடி பழனிசாமி தனது சொந்த தொகுதியில் தோற்கடிக்கப்பட வேண்டும் என்பதே நிபந்தனை. எடப்பாடி பழனிசாமியை வீழ்த்த தேவையான அனைத்து உதவிகளையும் தான் செய்வதாகவும், அதற்கு த.வெ.க. தனது முழு ஆதரவையும் வழங்க வேண்டும் என்றும் அவர் விஜய்யிடம் கோரியுள்ளார். இந்த நிபந்தனை ஏற்கப்பட்டதால், செங்கோட்டையன் தனது தனிப்பட்ட அரசியல் பகையை தீர்த்து கொள்ள விஜய்யின் கட்சியை ஒரு தளமாக பயன்படுத்த முடிவெடுத்தார் என்பது தெளிவாகிறது.
இரண்டாவது நிபந்தனை, அவரது அரசியல் அந்தஸ்து மற்றும் அனுபவத்திற்கு உரிய மரியாதை அளிக்கும் வகையில் அமைந்தது. த.வெ.க. வரவிருக்கும் சட்டமன்ற தேர்தலில் வெற்றி பெற்று ஆட்சி அமைக்கும் பட்சத்தில், தனக்கு துணை முதலமைச்சர் பதவி வழங்கப்பட வேண்டும் என்பதே அந்த நிபந்தனை. எம்.ஜி.ஆர்., ஜெயலலிதா ஆகியோருடன் பணியாற்றிய சீனியர் அரசியல்வாதியான தனக்கு ஆட்சி அதிகாரத்தில் உயரிய இடம் அளிக்கப்பட வேண்டும் என்று கேட்டுள்ளார். இதில் விஜய், ஒன்றுக்கு மேற்பட்ட துணை முதலமைச்சர்கள் நியமிக்கப்பட்டால் கூட பரவாயில்லை என்று கூறி, செங்கோட்டையனுக்கு பதவி உறுதியளித்ததாகவும் கூறப்படுகிறது.
மூன்றாவது நிபந்தனை, அவரது அரசியல் செல்வாக்குள்ள பகுதியான கொங்கு மண்டலம் தொடர்பானது. கொங்கு மண்டலத்தை பொறுத்தவரை, தேர்தலில் போட்டியிடும் வேட்பாளர்கள் தேர்வில், தான் குறிப்பிடும் வேட்பாளர்களுக்கே அதிக முக்கியத்துவம் அளிக்க வேண்டும் என்பதே அந்த நிபந்தனை. கொங்கு மண்டலத்தின் அரசியல் மற்றும் சமூக தளத்தை நன்கு அறிந்த செங்கோட்டையன், அங்கு அ.தி.மு.க.வின் செல்வாக்கை குறைக்க முடியும் என்று நம்புகிறார். இவ்வளவு வருட அரசியல் அனுபவத்தில் தனது ஆதரவாளர்கள் மற்றும் செல்வாக்குள்ள நபர்களை வேட்பாளர்களாக நிறுத்துவதன் மூலம் வெற்றியை பெற்றுத்தர முடியும் என்ற அவரது கோரிக்கையும் விஜய்யால் ஏற்கப்பட்டதாக தெரிகிறது.
விஜய்க்காக த.வெ.க.வில் இணைவதற்கு முன், செங்கோட்டையனை தங்கள் கட்சிக்குள் கொண்டு வர ஆளும் தி.மு.க. பல்வேறு முயற்சிகளை மேற்கொண்டது. தி.மு.க.வின் அமைச்சர்கள் மூலமாக, “எடப்பாடி பழனிசாமி தான் நம் இருவருக்கும் பொதுவான எதிரி. நீங்களும் தி.மு.க.வில் இணைந்தால், நாம் இருவரும் சேர்ந்து அவரை கட்டாயம் வீழ்த்தலாம். உங்களுக்கு பெரிய ஆஃபர்கள் கிடைக்கும்” என்று அழைப்பு விடுக்கப்பட்டதாகவும், ஆனால் அது செங்கோட்டையனால் நிராகரிக்கப்பட்டதாகவும் கூறப்படுகிறது. இவ்வளவு பெரிய ஆஃபரை செங்கோட்டையன் நிராகரித்ததன் பின்னணி, அவரது அரசியல் கொள்கை பிடிப்பிலேயே உள்ளது. தி.மு.க.விடம் அவர் கூறிய பதில் என்னவெனில் “நான் கிட்டத்தட்ட 50 ஆண்டுகாலம் தி.மு.க.வை எதிர்த்து அரசியல் செய்தவன். என் அரசியல் குருமார்களான எம்.ஜி.ஆர். மற்றும் ஜெயலலிதாவிடம் அரசியல் பாடம் கற்றவன். கொள்கை பிடிப்புடன் செயல்பட்டுவிட்டு, இப்போது தி.மு.க.வில் சேர்வது என் மனசாட்சிக்கு உகந்தது அல்ல” என்று தெளிவாக மறுத்துள்ளார்.
அவர் ஒரு உண்மையான ‘அ.தி.மு.க. மெட்டீரியல்’ என்றும், உதயநிதி ஸ்டாலின் போன்ற புதிய தலைவர்களின் கீழ் பணியாற்ற அவர் மனதளவில் தயாராக இல்லை என்றும், இதன் காரணமாகவே தி.மு.க.வின் கதவுகள் திறந்திருந்தும் அவர் அதை நிராகரித்தார் என்றும் அரசியல் வட்டாரங்கள் தெரிவிக்கின்றன. தி.மு.க.வின் பெரிய சலுகையை நிராகரித்த செங்கோட்டையன், ஒரு வளர்ந்து வரும் இளைஞரின் கட்சியில், எம்ஜிஆரை பெரிதும் மதிக்கும் விஜய்யின் கட்சியில் முக்கிய பொறுப்பு வகிப்பதன் மூலம் தனது சுயமரியாதையையும், அரசியல் அனுபவத்தின் மதிப்பையும் நிலைநாட்டி கொள்ள முடிவெடுத்துள்ளார். இந்த நகர்வு, எடப்பாடி பழனிசாமியின் அ.தி.மு.க.வுக்கு ஒரு பெரிய சவாலாகவும், த.வெ.க.வுக்கு மிகப்பெரிய பலமாகவும் மாறியுள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
