பொதுவாக பூஜை அறையில் வீட்டில் சொம்பு வைத்து அதில் நீர் நிரப்பி வைப்பார்கள். இது பெரும்பாலானவருக்கு எதற்காக என்று தெரியாது. நம்ம முன்னோர்கள் ஏதாவது செய்தால் அதில் அர்த்தம் இல்லாமல் இருக்காது. ஆனால் அதைத் தெரிந்து கொள்ள பலரும் ஆர்வம் காட்டுவதில்லை. எல்லாரும் செய்கிறார்கள். நாமும் செய்வோம் என்றுதான் செய்வார்கள்.
இவர்கள் இந்தக் கேள்விக்கு ஆர்வம் காட்டவில்லையே தவிர யாராவது சொன்னால் ஆர்வத்துடன் கேட்பார்கள். அடடா, இவ்ளோ நாளா இது தெரியாமப் போச்சேன்னு அப்புறம்தான் சொல்வாங்க. அந்த வகையில் பூஜை அறையில் சொம்புல தண்ணீர் வைப்பது எதற்கு? பிரசாதம் என்ற பெயர் வந்தது எப்படின்னு பார்க்கலாமா…
வீட்டில் பூஜை செய்யும் போது, சிறு செம்பு கிண்ணங்களில் நீர் வைக்கிறார்கள். இதில் புண்ணிய நதிகளின் நீரை நிரப்ப வேண்டும். இதற்கு எல்லாருக்கும் வசதியிருக்காது. எனவே, வீட்டிலுள்ள நிறை குடத்து நீரை, காவிரி, கங்கை, தாமிரபரணி, வைகை போன்ற புண்ணிய தீர்த்தங்களாகக் கருதி பக்தியுடன் நிரப்ப வேண்டும். உங்கள் இஷ்ட தெய்வம் அந்த புனிதநீரில் வந்து எழுந்தருள வேண்டும் என உருக்கமாக வேண்டிக் கொள்ள வேண்டும்.
பூஜை முடிந்ததும் அதை பக்தியுடன் பருக வேண்டும். ஏதேனும் ஒரு சாதம், கல்கண்டு, பழம், வெற்றிலை, பாக்கு படைக்க வேண்டும். “ப்ர என்றால் “கடவுள். நாம் படைக்கும் வெறும் சாதம், “ப்ர என்ற கடவுளுடன் சம்பந்தப்படும் போது, “ப்ரசாதம் (பிரசாதம்) ஆகி விடுகிறது. இதை உண்ணும் போதும், பருகும்போதும், நம்மை தீய சக்திகள் அணுகாது. மனோபலம் பெருகும்.
