தமிழக அரசியலில் கூட்டணி பேச்சுவார்த்தைகள் சூடுபிடித்துள்ள நிலையில், காங்கிரஸ் கட்சியின் நிலைப்பாடு குறித்தும், அதன் செயல்பாடுகள் குறித்தும் அரசியல் விமர்சகர் மணி என்பவர் தனது கருத்தை ஆழமாக முன்வைத்துள்ளார். காங்கிரஸின் தமிழக அரசியல் அணுகுமுறை குறித்த கடுமையான விமர்சனங்களை அவர் அடுக்கியுள்ளார்.
“காங்கிரஸுக்கு சட்டமன்றத் தேர்தல் எதற்கு?” என்று கேள்வியை முன்வைத்தே தனது விமர்சனத்தை தொடங்கிய மணி, கடந்த நான்கரை ஆண்டுகளாக தமிழகத்தில் ஆளும் கட்சிக்கு எதிரான மக்கள் பிரச்சினைகளுக்காகவோ அல்லது சமூக சவால்களுக்காகவோ காங்கிரஸ் கட்சியில் இருந்து ஒரு வலுவான குரல்கூட எழவில்லை என்று குற்றம் சாட்டினார். மக்கள் நலன் சார்ந்த விவகாரங்களில் இவ்வளவு நீண்ட காலமாக மௌனம் காக்கும் ஒரு கட்சிக்கு சட்டமன்ற தேர்தலில் போட்டியிடுவது அவசியமா என்ற கேள்வியை அவர் எழுப்பினார்.
கட்சியின் அமைப்பு ரீதியான செயல்பாடுகளிலும் தமிழக காங்கிரஸ் முற்றிலும் செயலிழந்துவிட்டதாக மணி விளாசினார். “கட்சியின் அமைப்பை கட்டியெழுப்ப கடந்த காலத்தில் ஒரு மாநாடுகூட நடத்தப்படவில்லை, ஒரு பெரிய பேரணியும் நடத்தப்படவில்லை” என்று அவர் சுட்டிக்காட்டினார். சட்டமன்ற தேர்தலில் போட்டியிட விரும்பும் ஒரு தேசியக் கட்சி, தனது தொண்டர்களையும் மக்களையும் ஒருங்கிணைக்க எந்தவித முயற்சிகளையும் எடுக்காமல் இருப்பது, அதன் தேர்தல் நோக்கத்தை கேள்விக்குள்ளாக்குவதாகவும் அவர் தெரிவித்தார்.
காங்கிரஸ் கட்சி 25 தொகுதிகளை பெற்று, அதில் 15 தொகுதிகளில் வெற்றி பெறுவதன் மூலம் என்ன பெரிய மாற்றத்தை சாதிக்கப் போகிறது என்று மணி வினவினார். “சட்டமன்றத்தில் 15 உறுப்பினர்களைக் கொண்டிருப்பது, ஆளும் கட்சியின் முடிவுகளில் எந்தவிதமான பாதிப்பையும் ஏற்படுத்தப் போவதில்லை,” என்று அவர் குறிப்பிட்டார். இதனால், சட்டமன்ற தேர்தலில் போட்டியிட்டு வளங்களை குறைத்துக்கொள்வதைவிட, நாடாளுமன்றத் தேர்தலில் 10 இடங்களை மட்டும் பெற்று, மத்திய அரசியலில் கவனம் செலுத்துவதே காங்கிரஸுக்கு உகந்ததாக இருக்கும் என்றும் அவர் ஆலோசனையை முன்வைத்தார்.
காங்கிரஸ் தமிழகத்தில் எந்த கூட்டணிக்குச் சென்றாலும், அது கூட்டணிக்கு ஒரு சுமைதான் என்று கருதப்படுகிறது. சொந்த பலம் இல்லாத ஒரு கட்சி, தொடர்ந்து அதிக தொகுதிகளை கேட்டுப் பெறுவது, கூட்டணியின் ஒட்டுமொத்த வெற்றி வாய்ப்பை குறைக்கவே வழிவகுக்கும் என்றும் தமிழகத்தில் காங்கிரஸை தவிர மற்ற கட்சிகள் சுறுசுறுப்பாகவும் மக்கள் மத்தியில் இயங்கியும் வருகின்றன என்றும் ஏற்கனவே பல அரசியல் விமர்சகர்கள் கருத்து தெரிவித்துள்ளனர்.
தமிழக அரசியல் களத்தில் காங்கிரஸ் மீண்டும் தன்னை ஒரு பலமான சக்தியாக நிலைநிறுத்த விரும்பினால், தேர்தல் நேரத்தில் மட்டும் சுறுசுறுப்பாக இருப்பதை நிறுத்திவிட்டு, முதலில் மக்கள் பிரச்சினைகளுக்காக போராட வேண்டும் என்றும், கட்சி கட்டமைப்பை பலப்படுத்த மாநாடுகள், பேரணிகள் நடத்த வேண்டும் என்றும் வலியுறுத்தப்படுகிறது. இல்லையெனில், தொடர்ச்சியாக தமிழக அரசியல் களத்தில் காங்கிரஸ் கட்சி ஒரு தேக்க நிலையிலேயே நீடிக்கும் என்றும் கூறப்பட்டு வருகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
