தமிழக அரசியல் வரலாற்றில் 2026 சட்டமன்ற தேர்தல் ஒரு மிகப்பெரிய திருப்புமுனையாக அமையப்போகிறது என்பதற்கான அறிகுறிகள் இப்போதே தென்பட தொடங்கிவிட்டன. குறிப்பாக, நடிகர் விஜய் தலைமையிலான தமிழக வெற்றி கழகத்தின் அதிரடியான அரசியல் பிரவேசம், பல ஆண்டுகளாக தமிழகத்தை ஆண்டு வரும் திராவிடக் கட்சிகளின் அடித்தளத்தையே அசைத்து பார்த்துள்ளது.
பெருநகரங்கள் முதல் குக்கிராமங்கள் வரை விஜய்யின் தாக்கம் என்பது வெறும் சினிமா ரசிகர்களோடு நின்றுவிடாமல், ஒரு மாற்று அரசியலை எதிர்பார்க்கும் சாமானிய மக்களின் குரலாக மாறியுள்ளது. இது திமுக மற்றும் அதிமுக ஆகிய இருபெரும் துருவங்களுக்கு மட்டுமல்லாமல், சாதியையும் மதத்தையும் முன்னிறுத்தி அரசியல் செய்யும் சிறிய கட்சிகளுக்கும் ஒரு மிகப்பெரிய அச்சுறுத்தலாக உருவெடுத்துள்ளது.
பெருநகரங்களை பொறுத்தவரை, திமுகவின் கோட்டையாக கருதப்படும் சென்னை உள்பட பல இடங்களிலேயே விஜய்யின் வருகை அந்த பாரம்பரிய வாக்கு வங்கியில் பெரும் விரிசலை ஏற்படுத்தியுள்ளது. குறிப்பாக, மாற்றத்தை விரும்பும் இளைஞர்கள் மற்றும் நடுத்தர வர்க்கத்தினர் மத்தியில் விஜய்யின் சமத்துவ கொள்கைகள் ஈர்ப்பை ஏற்படுத்தியுள்ளன. இதனால் நகர்ப்புறங்களில் திமுகவின் வாக்குகள் பெருமளவில் பிரியும் சூழல் உருவாகியுள்ளது.
அதேநேரம், சிறு நகரங்கள் மற்றும் கிராமப்புறங்களில் அதிமுகவின் பலமாக இருக்கும் வாக்கு வங்கியை விஜய் குறிவைத்து தகர்த்து வருகிறார். எம்.ஜி.ஆருக்கு பிறகு கிராமப்புற எளிய மக்களின் ஆதரவை ஒரு சினிமா ஆளுமை இவ்வளவு வேகமாக பெறுவது இதுவே முதல்முறை என்பதால், அதிமுக கூடாரத்தில் கலக்கம் ஏற்பட்டுள்ளது.
சாதிவாரியான கட்சிகளின் நிலைமை இந்த தேர்தலில் மிகவும் பரிதாபகரமாக மாறும் என்று அரசியல் ஆய்வாளர்கள் கணிக்கின்றனர். இதுவரை ஒரு குறிப்பிட்ட சமூகத்தின் வாக்குகளை ஒட்டுமொத்தமாக தங்கள் வசம் வைத்திருந்த சாதிக்கட்சிகள், இப்போது விஜய்யின் வருகையால் தங்கள் பிடியை இழந்து வருகின்றன. விஜய்யின் அரசியல் என்பது ஒரு குறிப்பிட்ட சாதிக்கு உட்பட்டது அல்ல என்பதால், அந்தந்த சமூகத்தை சேர்ந்த இளைஞர்கள் தங்கள் சாதி தலைவர்களை புறக்கணித்துவிட்டு, விஜய்யை நோக்கி அணிவகுக்கின்றனர். இதனால் பல ஜாதி கட்சிகளின் ‘சோலி’ இந்த தேர்தலோடு முடிவுக்கு வரும் நிலைக்கு தள்ளப்பட்டுள்ளன.
ஒரே ஒரு மனிதன் இத்தனை பெரிய அரசியல் அமைப்புகளையும், பாரம்பரியம் மிக்க கட்சிகளையும் ஒட்டுமொத்தமாக கதறவிடுவது தமிழக அரசியலில் இதுவரை கண்டிராத ஒரு விந்தை. விஜய் எவ்வித அதிகார பின்னணியும் இல்லாமல், தனது ரசிகர் மன்றங்களை மக்கள் இயக்கமாக மாற்றி, இன்று ஒரு பெரும் அரசியல் சக்தியாக உயர்ந்து நிற்கிறார். இது மற்ற கட்சிகளுக்கு வெறும் வாக்கு இழப்பு மட்டுமல்ல, அவர்களின் இருப்புக்கே விடுக்கப்பட்ட சவாலாக உள்ளது. ஒவ்வொரு தேர்தலிலும் சிறிய கட்சிகள் காட்டும் ‘பேரம் பேசும் சக்தி’ விஜய்யின் வருகையால் இந்த முறை எடுபடாமல் போகும் சூழல் உருவாகியுள்ளது.
திமுகவின் நீண்டகால வாக்கு வங்கியையும், அதிமுகவின் விசுவாசமான தொண்டர் படையையும் ஒரே நேரத்தில் குறிவைக்கும் விஜய்யின் உத்தி, தமிழகத்தின் ஒட்டுமொத்த தேர்தல் ஆட்டத்தையே கலைத்து போட்டுள்ளது. மற்ற கட்சிகள் ஒருவரை ஒருவர் தாக்கி பேசிக் கொண்டிருக்கும் வேளையில், விஜய் அமைதியாகவும் அதே சமயம் ஆழமாகவும் தனது களப்பணியை செய்து வருகிறார். இதனால் பெரிய கட்சிகள் தங்களின் கோட்டைகளை பாதுகாப்பதா அல்லது விஜய்யின் எழுச்சியை தடுப்பதா என்று தெரியாமல் திணறி வருகின்றன. சிறிய கட்சிகளோ தங்களின் அடையாளத்தையே இழக்கும் அபாயத்தில் இருப்பதால், எங்கு செல்வது என்ற குழப்பத்தில் உள்ளன.
முடிவாக, 2026 தேர்தல் என்பது திராவிட கட்சிகளுக்கும் ஒரு புதிய மாற்றத்திற்கும் இடையிலான இறுதி போராக இருக்கும். விஜய் எனும் ஒற்றை ஆளுமை இத்தனை கட்சிகளையும் பதற்றமடைய செய்திருப்பது, தமிழக மக்கள் மாற்றத்திற்கு தயாராகிவிட்டனர் என்பதையே காட்டுகிறது. பண பலம், அதிகார பலம் மற்றும் சாதி பலத்தை மட்டுமே நம்பியிருந்த கட்சிகளுக்கு, விஜய்யின் இந்த எழுச்சி ஒரு மிகப்பெரிய பாடமாக அமையும்.
இந்த அரசியல் மாற்றமானது நீண்ட காலத்திற்கு பிறகு தமிழகத்தில் ஒரு புதிய ஜனநாயக பாதையை உருவாக்கும் என்பதில் ஐயமில்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
