தமிழக அரசியலில் பல ஆண்டுகளாக வேரூன்றி போயிருக்கும் பாரம்பர்ய அரசியல் நடைமுறைகளை நடிகர் விஜய் தனது ‘தமிழக வெற்றிக் கழகம்’ மூலம் ஒட்டுமொத்தமாக புரட்டிப் போட்டுள்ளார். வழக்கமாக ஒரு கட்சி தனது வேட்பாளர்களை செய்தியாளர் சந்திப்பு நடத்தி அறிவிப்பதும், பின் ஒவ்வொரு தொகுதிக்கும் நேரில் சென்று அறிமுகம் செய்வதும் காலங்காலமாக தொடரும் ஒரு சடங்காகவே இருந்து வருகிறது. ஆனால், விஜய் அந்த பாதையை தேர்ந்தெடுக்காமல், ஒரு புதிய அரசியல் கலாச்சாரத்தை முன்னெடுத்துள்ளார். மற்றவர்கள் பின்பற்றும் அதே பழைய பாணிகளை பின்பற்றினால் அது மாற்றமாக இருக்காது என்பதை உணர்ந்து, எவ்வித ஆரவாரமும் இன்றி தனது வியூகங்களை அவர் அமைத்து வருகிறார்.
ஊர் ஊராக சென்று தெருமுனை கூட்டங்களில் ஓட்டு கேட்பது என்ற வழக்கமான பிரச்சார முறையையும் விஜய் தவிர்த்துள்ளார். ஊடகங்களின் கேமராக்களுக்கு முன்னால் நின்று பதில் சொல்வதோ அல்லது ஒரு குறிப்பிட்ட பிம்பத்தை உருவாக்க முயற்சிப்பதோ அவருக்கு தேவையில்லை என்ற நிலைப்பாடு பலரையும் வியப்பில் ஆழ்த்தியுள்ளது.
திராவிடக் கட்சிகள் பொதுவாக தங்களது பிரச்சாரத்தை ‘டெல்லிக்கும் எங்களுக்கும் தான் போட்டி’ என்று ஒரு தேசிய அளவிலான மோதலாக மடைமாற்றி, அதன் மூலம் ஆட்சியின் குறைகளை மறக்கடித்து வாக்குகளை சேகரிக்கும் உத்தியை கையாளும். ஆனால், விஜய் அத்தகைய திசைதிருப்பல் அரசியலில் ஈடுபடாமல், தமிழகத்தின் அடிப்படை தேவைகள் மற்றும் இளைஞர்களின் எதிர்காலத்தை மட்டுமே தனது அரசியலின் மையப்புள்ளியாக வைத்துள்ளார்.
பாரம்பர்ய அரசியல்வாதிகள் ஒரு தொகுதியில் வேட்பாளரை அறிமுகம் செய்யும் போது காட்டும் பிரம்மாண்டத்தை விட, மக்களுடன் நேரடியாக தொடர்பு கொள்வதில் விஜய் அதிக ஆர்வம் காட்டுகிறார். ஊடகங்களின் ஆதரவு அல்லது செய்தியாளர் சந்திப்புகளின் தயவின்றி, தொழில்நுட்பத்தின் துணையோடு ஒவ்வொரு வாக்காளரின் மொபைல் போனிற்கும் தனது கொள்கைகளை கொண்டு சேர்ப்பதே அவரது பாணியாக இருக்கிறது. இது திராவிட கட்சிகள் வகுத்து வைத்திருக்கும் ‘அரசியல் பார்முலாவை உடைத்தெறிந்துள்ளது. இடைத்தரகர்களோ அல்லது ஒரு குறிப்பிட்ட ஊடக கட்டமைப்போ இன்றி, மக்களுக்கும் தனக்கும் இடையிலான தூரத்தை அவர் குறைத்துள்ளார்.
விஜய்யின் இந்த வித்தியாசமான அணுகுமுறை, “மாற்றம்” என்பது வெறும் வார்த்தையில் மட்டும் இல்லாமல், செயல்பாட்டிலும் இருக்க வேண்டும் என்பதை உறுதிப்படுத்துகிறது. காலம் காலமாக பின்பற்றி வரும் எதையும் தானும் பின்பற்ற வேண்டும் என்ற கட்டாயம் தனக்கில்லை என்பதை அவர் தனது ஒவ்வொரு நகர்வின் மூலமும் நிரூபித்து வருகிறார். மற்ற கட்சிகள் வேட்பாளர் பட்டியலை வெளியிட்டுவிட்டு ஆதரவை தேடி அலையும் வேளையில், விஜய் ஏற்கனவே மக்கள் மனதில் ஒரு வலுவான இடத்தை உருவாக்கிவிட்டு அமைதியாக தனது பணிகளை செய்து வருகிறார். இது ஒரு நிழல் யுத்தம் போல இருந்தாலும், அதன் தாக்கம் களத்தில் மிக ஆழமாக உணரப்படுகிறது.
இறுதியாக, 2026 சட்டமன்ற தேர்தல் என்பது தமிழக வரலாற்றில் ஒரு திருப்புமுனையாக அமைய போவதை விஜய்யின் இந்த மாறுபட்ட அரசியல் பாணி உறுதிப்படுத்துகிறது. மற்றவர்கள் வெளிச்சத்திற்காக போராடும் போது, விஜய் தனது சொந்த பாதையில் யாருடைய தயவுமின்றி பயணிக்கிறார். பாரம்பர்ய அரசியல் விதிகளை தகர்த்தெறிந்துவிட்டு, ஒரு புதிய நவீன அரசியலை அவர் அறிமுகப்படுத்தியுள்ளார். “இதுவரை பார்த்த அரசியல் வேறு, இனி பார்க்கப்போகும் அரசியல் வேறு” என்பதற்கு விஜய்யின் இந்தத் தனித்துவமான உத்திகளே சாட்சி. இது தேர்தல் முடிவுகளில் ஒரு மிகப்பெரிய மாற்றத்தை ஏற்படுத்தும் என்பதில் ஐயமில்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
