நடிகர் விஜய்யின் அரசியல் நுழைவு மற்றும் அவரது கட்சியின் தாக்கம் குறித்து பல்வேறு அரசியல் விமர்சனங்களும், விவாதங்களும் எழுந்துள்ளன. குறிப்பாக, அவரது முதல் பொதுக்கூட்டத்திற்கு கிடைத்த வரவேற்பு, தமிழக அரசியல் கட்சிகளிடையே ஒரு புதிய பார்வையை ஏற்படுத்தியுள்ளது.
சினிமா பிரபலங்கள் அரசியலுக்கு வரும்போது, அவர்களின் வாக்கு வங்கி 8 முதல் 10 சதவீதத்திற்கு மேல் இருக்காது என்பது பொதுவாக நிலவிவரும் ஒரு கருத்து. விஜயகாந்த், கமல்ஹாசன் போன்ற நடிகர்கள் பெற்ற வாக்குகளை வைத்து, விஜய் அதிகபட்சமாக 8 முதல் 10% வாக்குகளை பெறலாம் என்று பலரும் கணித்துள்ளனர். உதாரணமாக விஜயகாந்தின் அதிகபட்ச வாக்கு சதவீதம் 10.28% மட்டுமே.
ஆனால், கள நிலவரம் வேறுவிதமாக இருப்பதாக அரசியல் ஆய்வாளர்கள் கூறுகின்றனர். சில தொகுதிகளில், விஜய்யின் கட்சி 20 முதல் 25% வாக்குகளை பெற வாய்ப்புள்ளதாக தெரிகிறது. கொங்கு மண்டலம் போன்ற அதிமுக மற்றும் பாஜகவின் கோட்டைகளாக கருதப்படும் பகுதிகளிலும், விடுதலை சிறுத்தைகள் கட்சி பலமாக உள்ள பகுதிகளிலும் கூட விஜய்க்கு எதிர்பாராத ஆதரவு பெருகி வருவதாக தெரிவிக்கின்றனர்.
விஜய்யின் வருகை, தமிழக அரசியல் களத்தில் ஒரு புதிய சவாலை உருவாக்கியுள்ளது. அவர் திமுக, அதிமுக, மற்றும் சீமான் ஆகிய மூன்று கட்சிகளின் வாக்குகளையும் பிரிப்பதாக கூறப்படுகிறது.
திமுகவுக்கு எதிரான வாக்குகளை பிரிப்பதில் விஜய் முக்கிய பங்காற்றுவார் என தெரிகிறது. குறிப்பாக, அண்ணா மற்றும் எம்.ஜி.ஆர். படங்களை பயன்படுத்துவதன் மூலம், அதிமுகவின் பாரம்பரிய வாக்கு வங்கியை அவர் குறிவைக்கிறார். விஜய்யின் 25% வாக்குகள், அதிமுகவின் வெற்றி வாய்ப்பை பெரிதும் பாதிக்கக்கூடும்.
இலவச பேருந்து மற்றும் உரிமைத் தொகை போன்ற திமுகவின் திட்டங்களால் ஈர்க்கப்பட்டிருந்த பெண் வாக்காளர்கள் கூட விஜய்க்கு மாறுவதாக தெரிகிறது. மேலும் இளம் தலைமுறை வாக்காளர்களையும் விஜய் கவர்ந்து வருகிறார்.
சீமானின் தமிழ் தேசிய கொள்கைகளால் ஈர்க்கப்படாத, ஆனால் திராவிட கட்சிகளுக்கு எதிரான மனநிலையில் இருக்கும் வாக்காளர்கள் விஜய்யின் பக்கம் செல்லலாம். அதேபோல், தேமுதிக மற்றும் பாமக போன்ற கட்சிகளின் வாக்கு வங்கியிலும் விஜய் ஓட்டுகளை பெறுவார் என எதிர்பார்க்கப்படுகிறது.
தற்போது தனியாக இயங்கி வரும் விஜய்யின் கட்சிக்கு, பல சிறிய கட்சிகள் கூட்டணி அமைக்க ஆர்வம் காட்டுவதாக தெரிகிறது. டி.டி.வி. தினகரன் மற்றும் ஓ.பன்னீர்செல்வம் போன்ற தலைவர்கள் விஜய்யுடன் கூட்டணிக்கு தயாராக இருப்பதாக வெளிப்படையாகவே கூறியுள்ளனர். ஆனால், விஜய்யின் தரப்பில் இருந்து எந்த பதிலுமோ அல்லது பேச்சுவார்த்தைக்கான குழுவோ இன்னும் அமைக்கப்படவில்லை. தனது செல்வாக்கையும் கூட்டத்தையும் முழுமையாக நிரூபித்த பின்னர், அதாவது டிசம்பரில் மக்கள் சந்திப்பு கூட்டம் முடிந்த பின்னர் வலுவான ஒரு கூட்டணியை உருவாக்க அவர் திட்டமிட்டிருக்கலாம் என்று அரசியல் நோக்கர்கள் கருதுகின்றனர்.
விஜய்யின் அரசியல் பிரவேசத்திற்கு பின்னால் சில மத அமைப்புகள் இருப்பதாக அவ்வப்போது சர்ச்சைகள் எழுகின்றன. ஆனால், இந்த வாதங்களை அரசியல் விமர்சகர்கள் மறுக்கின்றனர். எந்தவொரு அரசியல் கட்சிக்கும், குறிப்பாக புதிதாக வரும் கட்சிகளுக்கு நிதியுதவி கிடைப்பது இயல்பானது. ஆனால், யாரோ ஒருவரின் தூண்டுதலின் பேரில், ஒரு பெரிய நடிகர் அரசியலுக்கு வருகிறார் என்பது நம்புவதற்கு கடினமான ஒரு வாதம். விஜய் தனது சொந்த விருப்பத்திலும், ரசிகர்களின் ஆதரவிலும் தான் அரசியல் களத்தில் இறங்கியுள்ளதாக தெரிகிறது என்று கூறுகின்றனர்..
மொத்தத்தில் விஜய்யின் அரசியல் வருகை, தமிழக அரசியலில் ஒரு பெரிய மாற்றத்தை ஏற்படுத்தக்கூடும். இது, திமுகவுக்கும் அதிமுகவுக்கும் மாற்றாக ஒரு மூன்றாவது சக்தியாக உருவெடுக்கும் என கணிக்கப்படுகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
