தமிழக அரசியல் வரலாற்றில் 2026 சட்டமன்ற தேர்தல் என்பது ஒரு திருப்புமுனையாக அமையப்போகிறது என்பதற்கான அறிகுறிகள் இப்போதே தென்பட தொடங்கிவிட்டன. குறிப்பாக, சினிமா நட்சத்திரம் என்ற பிம்பத்தை தாண்டி ஒரு அரசியல் தலைவராக தன்னை நிலைநிறுத்தி கொள்ளத் துடிக்கும் விஜய் மற்றும் பாஜகவின் மாநில தலைவராக இருந்து, தமிழக அரசியலில் ஒரு புதிய அதிர்வை ஏற்படுத்திய அண்ணாமலை ஆகிய இருவரின் கூட்டணியே தற்போதைய இளைய தலைமுறையினரின் பெரும் எதிர்பார்ப்பாக உள்ளது.
“இரண்டு கைகள் நான்கானால் இருவருக்கே தான் எதிர்காலம்” என்ற பாடல் வரிகளுக்கு ஏற்ப, இவர்கள் இருவரின் இணைவு என்பது வெறும் தேர்தல் உடன்படிக்கை மட்டுமல்ல, அது தமிழகத்தின் அரை நூற்றாண்டு கால திராவிட அரசியலுக்கு மாற்றான ஒரு புதிய அதிகார மையத்தின் தொடக்கமாக பார்க்கப்படுகிறது.
தமிழகத்தின் தற்போதைய சூழலில், நீண்டகாலமாக திராவிட கட்சிகளுக்கு மாற்றாக கருதப்பட்ட காங்கிரஸ் கட்சி இன்று தனது தனித்துவத்தை இழந்து, ஒரு கூட்டணி சார்ந்து இயங்கும் கட்சியாக தேய்ந்து போயுள்ளது. இத்தகைய நிலையில், காங்கிரஸுடன் கூட்டணி வைப்பதால் விஜய்க்கு எவ்வித பெரிய லாபமும் கிடைக்க போவதில்லை என்பது அரசியல் விமர்சகர்களின் கருத்தாக உள்ளது. கடந்த காலத் தேர்தல்களில் காங்கிரஸின் வாக்கு வங்கி மெல்ல மெல்ல குறைந்து வருவதையும், அவர்களால் ஒரு தொகுதியில் கூட தனித்து நின்று வெற்றி பெற முடியாத நிலையையும் மக்கள் பார்த்துக் கொண்டிருக்கிறார்கள். எனவே, புதிய மாற்றத்தை விரும்பும் விஜய், தேய்ந்து போன ஒரு பழைய சக்தியுடன் கை கோர்ப்பது அவரது அரசியல் எதிர்காலத்திற்கு வலு சேர்க்காது என்பதே நிதர்சனம்.
மறுபுறம், பிரதான எதிர்க்கட்சியான அதிமுகவுடன் கூட்டணி அமைப்பதிலும் விஜய்க்கு பெரிய சவால்கள் உள்ளன. கொள்கை ரீதியாக பாஜக அரசியலை விமர்சித்துவிட்டு, மீண்டும் ஒரு பாஜக அங்கம் வகிக்கும் கூட்டணியுடன் சமரசம் செய்து கொள்வது விஜய்யின் ‘மாற்று அரசியல்’ என்ற முழக்கத்திற்கே ஆபத்தாக முடியும். எடப்பாடி பழனிசாமி தலைமையிலான அதிமுகவில் தற்போது நிலவும் உட்கட்சி பூசல்கள் மற்றும் தலைமை குறித்த அதிருப்திகள் விஜய்க்கு பின்னடைவையே தரும். மேலும், கொள்கை எதிரியுடன் கைகோர்க்கும் போது தனது கட்சியின் தனித்துவத்தை விஜய் இழக்க வேண்டிய நிலை வரும். இது அவரது தீவிர தொண்டர்கள் மற்றும் நடுநிலை வாக்காளர்கள் மத்தியில் ஒருவிதமான அவநம்பிக்கையை உருவாக்கிவிடும்.
அதேபோல், தமிழக அரசியலில் ஒரு காலத்தில் நல்ல வாக்கு வங்கியாக இருந்த தேமுதிக மற்றும் பாமக போன்ற கட்சிகளை தற்போது கூட்டணிக்குள் இழுப்பதன் மூலமும் பெரிய அளவில் எதையும் சாதிக்க முடியாது என்ற கருத்து நிலவுகிறது. விஜயகாந்த் காலத்து தேமுதிக தற்போது இல்லை என்பதும், பாமகவின் இரண்டாக உடைந்து வாக்கு வங்கி ஒரு குறிப்பிட்ட சமூகத்திற்குள் சுருங்கிப் போய்விட்டதும் வெளிப்படையான உண்மைகள். “பழைய குருடி கதவைத் திறடி” என்பது போல, மீண்டும் அதே தேய்ந்து போன கூட்டணி கணக்குகளை வைத்து கொண்டு விஜய்யால் ஆளுங்கட்சியின் பலத்தை எதிர்கொள்ள முடியாது. காலாவதியான இந்த அரசியல் சக்திகளை சுமப்பதை காட்டிலும், புதிய மற்றும் துடிப்பான சக்திகளுடன் இணைவதே விஜய்க்கு சரியான வியூகமாக இருக்கும்.
விஜய் கட்சி ஆரம்பிப்பதற்கு முன்பே, தமிழகத்தில் திமுகவின் ஊழல்களையும், நிர்வாக சீர்கேடுகளையும் துணிச்சலாக தட்டிக் கேட்ட ஒரு அரசியல் ஹீரோவாக அண்ணாமலை மக்கள் மத்தியில் இடம்பிடித்திருந்தார். காவல்துறையில் உயர் அதிகாரியாக இருந்துவிட்டு அரசியலுக்கு வந்த அவரது பின்னணியும், புள்ளிவிவரங்களுடன் அவர் பேசும் விதமும் படித்த இளைஞர்களை பெரிதும் கவர்ந்துள்ளது. விஜய் தனது திரைத்துறையின் பிரம்மாண்டமான புகழுடன் களமிறங்கியுள்ள நிலையில், அண்ணாமலையின் களப்பணியும் விஜய்யின் மக்கள் செல்வாக்கும் இணைந்தால் அது ஒரு ‘வெற்றி கூட்டணியாக’ மாறும் என்பதில் ஐயமில்லை. திராவிட அரசியலுக்கு மாற்றான ஒரு தேசிய மற்றும் தமிழ் தேசியம் கலந்த புதிய சிந்தனையை இவர்கள் இருவரும் வழங்க முடியும்.
சுருக்கமாக சொன்னால், 2026-ல் தமிழக மக்கள் ஒரு பெரிய மாற்றத்தை எதிர்பார்த்து காத்து கொண்டிருக்கிறார்கள். அந்த மாற்றத்தின் முகங்களாக விஜய்யும் அண்ணாமலையும் தெரிகிறார்கள். இவர்கள் இருவரும் தனித்தனியாக போட்டியிட்டு ஓட்டுக்களை பிரிப்பதை காட்டிலும், ஒருமித்த கருத்துடன் ஒரு புதிய அணியாக திரண்டால், தமிழக மக்கள் நிச்சயம் அவர்களுக்கு ஒருமுறை வாய்ப்பு கொடுப்பார்கள். இந்த கூட்டணி அமைந்தால், அது வெறும் ஓட்டு அரசியலாக மட்டுமன்றி, தமிழகத்தின் நிர்வாக திறனை மேம்படுத்தும் ஒரு புரட்சிகரமான மாற்றமாகவும் அமையும். பழைய கட்சிகளின் பிடியில் இருந்து தமிழகத்தை மீட்க இந்த “இரட்டைக் குழல் துப்பாக்கி” கூட்டணி காலத்தின் கட்டாயமாக உள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
