உக்ரைன் அதிபருடன் எலான் மஸ்க் பேச்சுவார்த்தை.. டிரம்ப் அரசில் முக்கிய பொறுப்பா?

ரஷ்யா மற்றும் உக்ரைன் நாடுகளிடையே சில ஆண்டுகளாக போர் தொடர்ந்து வரும் நிலையில், இந்த போரை நிறுத்த ஐநா மற்றும் உலக நாடுகள் முயற்சித்து வருகின்றன. ஆனால், போர் இன்னும் தொடர்ந்து கொண்டே இருப்பதால் அமெரிக்க அதிபராக டிரம்ப் பதவியேற்றால் இந்த போரை அவர் நிறுத்துவார் என்றும் கூறப்பட்டது.

இந்த நிலையில், தற்போது ட்ரம்ப் வெற்றி பெற்று இன்னும் ஒரு சில நாட்களில் அமெரிக்க அதிபராக பதவி ஏற்க இருக்கும் நிலையில், உக்ரைன் அதிபர் ஜெலன்ஸ்கி உடன் ட்ரம்ப் முக்கிய பேச்சுவார்த்தை நடத்தியதாகவும், இந்த பேச்சுவார்த்தையின் போது எலான் மஸ்க் உடன் இருந்ததாகவும் கூறப்படுகிறது. தொலைபேசியில் நடந்த இந்த உரையாடலில், ஜெலன்ஸ்கி இடம் டிரம்ப் பேசிய பின், அவர் போனை எலான் மஸ்க் அவர்களிடம் கொடுத்ததாகவும், ஜெலன்ஸ்கி மற்றும் எலான் மாஸ்க் இருவரும் சில முக்கிய பேச்சுவார்த்தை நடத்தியதாகவும் கூறப்படுகிறது.

ஏற்கனவே புதின் மற்றும் ட்ரம்ப் ஆகிய இருவரும் நெருங்கிய நண்பர்கள் என்பதால், இந்த போர் முடிவுக்கு வருவது குறித்த அறிவிப்பு எப்போது வேண்டுமானாலும் வெளியாகலாம் என்று கூறப்படுகிறது. அதுமட்டுமின்றி, உக்ரைன் நாடு முழுவதும் ஸ்டார்லிங்க் செல்போனையும் அறிமுகப்படுத்த எலான் மஸ்க் திட்டமிட்டுள்ளதாக கூறப்படுகிறது. மேலும் டிரம்ப் அரசில் எலான் மஸ்க் அவர்களுக்கு ஒரு முக்கிய பொறுப்பு அளிக்கப்படும் என்றும் கூறப்படுவதால் பரபரப்பு ஏற்பட்டுள்ளது.