கடந்த பல ஆண்டுகளாக உலக வர்த்தகத்தில் ஆதிக்கம் செலுத்தி வந்த அமெரிக்க டாலரின் நிலை, இப்போது ஆட்டம் கண்டு வருகிறது. அமெரிக்காவின் வர்த்தக கொள்கைகள் மற்றும் டாலரின் ஏற்ற இறக்கங்களால் ஏற்பட்ட அதிருப்தி காரணமாக, உலக நாடுகள் டாலருக்கு மாற்றாக ஒரு பொதுவான நாணயத்தை தேடி வருகின்றன. இந்த முயற்சியின் பின்னால், இந்தியா, ரஷ்யா, சீனா போன்ற நாடுகள் முக்கிய பங்கை வகிக்கின்றன.
டாலருக்கு எதிரான அலை: மோடியின் புதுமையான அணுகுமுறை
சமீப காலமாக, இந்தியா, ரஷ்யாவிடம் இருந்து கச்சா எண்ணெய் வாங்கும் போது டாலருக்கு பதிலாக இந்திய ரூபாயில் வர்த்தகம் செய்து வருகிறது. இந்த நடைமுறை, மற்ற நாடுகளுக்கும் ஒரு முன்னுதாரணமாக அமைந்துள்ளது. குறிப்பாக, ஈரான் உள்ளிட்ட அரபு நாடுகளும் ரூபாயில் வர்த்தகம் செய்ய விருப்பம் தெரிவித்துள்ளன.
அமெரிக்காவின் நிதி மற்றும் வர்த்தக ஆதிக்கத்தை எதிர்த்து, பிரிக்ஸ் நாடுகள் ஒரு பொதுவான நாணயத்தை உருவாக்கும் திட்டத்தை முன்வைத்தன. இதற்கு அமெரிக்கா கடும் எதிர்ப்பு தெரிவித்தது. ஆனால், இந்த பிரச்சனைக்கு ஒரு மாற்றத்தை உருவாக்கியவர் பிரதமர் நரேந்திர மோடி. “டாலரில் வர்த்தகம் செய்வதற்கு பதிலாக, தங்கத்தில் வர்த்தகம் செய்யலாம்” என்ற அவரது யோசனையை ரஷ்யா, சீனா உட்பட பல நாடுகள் உடனடியாக ஏற்றுக்கொண்டன.
தங்கம் ஏன் பொது நாணயமாக தேர்ந்தெடுக்கப்பட்டது?
கடந்த சில ஆண்டுகளாக, சீனா, ரஷ்யா, துருக்கி போன்ற பல நாடுகள் தங்கத்தை அதிக அளவில் வாங்கி குவித்து வந்தன. தங்கம் என்பது, அனைத்து நாடுகளாலும் ஏற்றுக்கொள்ளப்படும் ஒரு உலகளாவிய மதிப்புமிக்க உலோகம். டாலரின் மதிப்பு குறைந்தால் கூட தங்கத்தின் மதிப்பு குறையாது. இது, தங்கள் நாணயங்களின் மதிப்பு நிலையற்றதாக இருக்கும் நாடுகளுக்கு ஒரு பாதுகாப்பான வழியாக இருக்கும்.
இந்தியா தங்கத்தில் வர்த்தகம் செய்வதற்கான பலம்:
இந்தியாவிடம் ஏற்கனவே சுமார் 800 டன் அரசு தங்கம் இருப்பு உள்ளது. அதுமட்டுமின்றி இந்திய குடும்ப பெண்களிடம் சுமார் 20,400 டன் தங்கம் உள்ளது. இது உலகின் மிகப்பெரிய தங்க இருப்புக்களில் ஒன்றாகும். இந்த பலமான தங்க இருப்பின் காரணமாக, தங்கத்தில் வர்த்தகம் செய்வதில் இந்தியாவுக்கு எந்த பிரச்சனையும் இருக்காது.
டாலரின் ஆதிக்கம் குறையும் தருணம்
உலகம் முழுவதும் இல்லையென்றாலும், ஆசியா மற்றும் அரபு நாடுகள் தங்கத்தில் வர்த்தகம் செய்ய ஆரம்பித்தால், டாலரின் மதிப்பு குறைய தொடங்கும். இது ஐரோப்பிய மற்றும் ஆப்பிரிக்க நாடுகளையும் டாலர் வர்த்தகத்தை நிறுத்தி, தங்கத்தில் வர்த்தகம் செய்ய ஊக்குவிக்கும். இதன் விளைவாக, அமெரிக்காவின் ஆதிக்கம் படிப்படியாக குறையத் தொடங்கும். அமெரிக்கா ஒரு வல்லரசாக இருப்பதற்கான முக்கிய காரணம் டாலரின் உலகளாவிய பயன்பாடுதான். அந்த டாலரின் வீழ்ச்சி, அமெரிக்காவின் செல்வாக்கை குறைத்துவிடும்.
“பூனைக்கு மணி கட்டியது மோடி”:
அமெரிக்காவின் இந்த ஆதிக்கத்திற்கு எதிராக யாரும் பேச துணியாத நிலையில், பிரதமர் மோடி, தங்கத்தில் வர்த்தகம் என்ற யோசனையை முன்வைத்து, “பூனைக்கு மணி கட்டியது” போல ஒரு துணிச்சலான நடவடிக்கையை எடுத்துள்ளார்.
அடுத்தகட்ட நடவடிக்கைகள் மற்றும் டிரம்ப்பின் எதிர்வினை
தற்போது பல நாடுகளும் தங்கத்தில் வர்த்தகம் செய்ய தயாராக இருக்கும் நிலையில், அடுத்தகட்ட நடவடிக்கைகள் என்னவாக இருக்கும் என்பதை பொறுத்திருந்துதான் பார்க்க வேண்டும். டிரம்ப் தனது கோபத்தில் இந்தியா மற்றும் பிற நாடுகள் மீது வரி விதிப்பு போன்ற நடவடிக்கைகளை மேற்கொள்வார். ஆனால், இந்த வர்த்தக போர், டிரம்ப்பின் வர்த்தகக்கொள்கைகளுக்கு எதிரான உலகளாவிய எதிர்ப்பை மேலும் அதிகரிக்கும்.
உலக நாடுகளின் இந்த ஒருங்கிணைந்த முயற்சி, அமெரிக்காவுக்கும் டாலருக்கும் ஒரு புதிய சவாலை உருவாக்கியுள்ளது. டிரம்ப் இதற்கு எவ்வாறு பதிலளிப்பார், மற்றும் உலக பொருளாதாரம் எந்த திசையில் நகரும் என்பதை காலம்தான் சொல்லும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
