2026-ஆம் ஆண்டு நடைபெறவுள்ள தமிழக சட்டமன்ற தேர்தல், முன்னெப்போதும் இல்லாத வகையில் ஒரு மிகப்பெரிய அரசியல் மாற்றத்தை நோக்கி நகர்ந்து கொண்டிருப்பதை சமூக வலைதள பதிவுகள் பறைசாற்றுகின்றன. குறிப்பாக, தமிழக வெற்றி கழகத்தின் தொண்டர்கள் பதிவிடும் கருத்துக்கள் இணையத்தில் விவாத புயலை கிளப்பியுள்ளன. பல ஆண்டுகளாக தமிழக அரசியலில் தீர்மானிக்கும் சக்திகளாக திகழ்ந்த பாமக, தேமுதிக, விசிக மற்றும் மதிமுக போன்ற கட்சிகள் இந்த முறை ஒரு தொகுதியில் கூட வெற்றி பெற வாய்ப்பில்லை என்பதே தவெகவினரின் பிரதான வாதமாக உள்ளது. ஒரு காலத்தில் வாக்கு வங்கியை தீர்மானித்த இந்த இடைநிலை கட்சிகளின் செல்வாக்கு, விஜய்யின் வருகையால் முற்றிலுமாக சரிந்துவிட்டதாக அவர்கள் பதிவிட்டு வருகின்றனர்.
நாம் தமிழர் கட்சியை பொறுத்தவரை, ஒவ்வொரு தேர்தலிலும் வாக்கு சதவீதத்தை உயர்த்தினாலும், இந்த முறையும் அவர்கள் வழக்கம் போல் டெபாசிட் கூட வாங்க முடியாத நிலையே ஏற்படும் என்று தவெகவினர் விமர்சிக்கின்றனர். சீமான் முன்வைக்கும் அரசியலை விட, விஜய்யின் ‘செயல்முறை அரசியல்’ மக்களை ஈர்த்துள்ளதாக கருதும் அவர்கள், தவெகவின் எழுச்சி மற்ற மாற்று அரசியலை பேசும் கட்சிகளின் இடத்தை காலி செய்துவிட்டதாக கூறுகின்றனர். சமூக வலைதளங்களில் தெறிக்கவிடும் இத்தகைய பதிவுகள், தவெக தொண்டர்களின் அசைக்க முடியாத நம்பிக்கையையும், மற்ற கட்சிகள் மீதான அவர்களின் கடும் விமர்சனத்தையும் வெளிப்படுத்துகின்றன.
தமிழகத்தின் பிரதான சக்திகளான திமுக, அதிமுக மற்றும் வளர்ந்து வரும் பாஜக ஆகிய கட்சிகளுக்கே இந்த முறை தொகுதிகளை கைப்பற்றுவதில் மிகப்பெரிய திணறல் ஏற்படும் என்பதுதான் தற்போதைய அரசியல் கணிப்பாக உள்ளது. பண பலம், அதிகார பலம் மற்றும் நீண்டகால கட்டமைப்பு இருந்தும், விஜய்க்கு பின்னால் அணிவகுக்கும் தன்னார்வ மக்கள் சக்தியை சமாளிக்க முடியாமல் இக்கட்சிகள் திணறி வருகின்றன. நட்சத்திர அந்தஸ்தை தாண்டி, ஒரு அரசியல் தலைவராக விஜய் முன்வைக்கும் கொள்கைகளும், அவரது அமைதியான அணுகுமுறையும் பாரம்பரிய அரசியல் கணக்குகளை தலைகீழாக மாற்றியுள்ளன.
தேசிய கட்சியான காங்கிரஸின் நிலையை தவெகவினர் மிகவும் கூர்மையாக விமர்சிக்கின்றனர். திமுக கூட்டணியில் இருந்தாலும் அல்லது தனித்து நின்றாலும், தவெகவுடன் கூட்டணி அமைக்காதவரை காங்கிரஸால் ஒரு தொகுதியில் கூட வெற்றி பெற முடியாது என்றும், அவர்களின் நிலை ‘ஜீரோ’ தான் என்றும் பதிவுகள் குவிகின்றன. தமிழகத்தில் காங்கிரஸ் தனது இருப்பை தக்கவைத்து கொள்ள வேண்டுமென்றால், அது விஜய்யின் தயவை நாடியே ஆக வேண்டும் என்கிற பிம்பத்தை இத்தகைய பதிவுகள் உருவாக்குகின்றன. இது காங்கிரஸ் தொண்டர்களிடையே சலசலப்பை ஏற்படுத்தினாலும், தவெகவினர் தங்கள் நிலைப்பாட்டில் உறுதியாக உள்ளனர்.
இவை அனைத்தும் ‘ஒற்றை ஆளாக’ விஜய் நிகழ்த்தி வரும் அதிரடி மாற்றங்கள் என்பதுதான் இங்கு ஆச்சரியமான விஷயம். எந்தவொரு அரசியல் பின்னணியும் இல்லாமல், தனது ரசிகர் மன்றங்களை மக்கள் இயக்கமாக மாற்றி, இன்று ஒரு முழுநேர அரசியல் கட்சியாக வளர்த்தெடுத்த விஜய்யின் ‘பவர்’ எதிர்த்தரப்பினரை மிரள வைக்கிறது. கடந்த காலங்களில் பல நடிகர்கள் அரசியலுக்கு வந்திருந்தாலும், விஜய்யின் வருகை என்பது ஒரு கட்டமைக்கப்பட்ட சிஸ்டத்தை உடைப்பதாக அமைந்துள்ளது. இதனால்தான் தவெகவினர் “ஒரே ஒருத்தன் வந்து எல்லாருடைய தூக்கத்தையும் கெடுத்துட்டான்” என்று பெருமையுடன் பதிவிட்டு வருகின்றனர்.
இறுதியாக, சமூக வலைதளங்களில் தெறிக்கும் இந்த பதிவுகள் வெறும் உணர்ச்சிவசப்பட்ட பதிவுகள் மட்டுமல்ல, அவை அடிமட்ட அளவில் ஏற்பட்டுள்ள அரசியல் மாற்றத்தின் எதிரொலியாகவே பார்க்கப்படுகின்றன. 50 ஆண்டுகால திராவிட அரசியலையும், இதர சாதிய மற்றும் மதவாத அரசியலையும் ஒற்றை ஆளாக எதிர்கொண்டு, ஒட்டுமொத்த தமிழகத்தின் கவனத்தையும் தன் பக்கம் ஈர்த்துள்ள விஜய்யின் அரசியல் பயணம் 2026-இல் ஒரு மிகப்பெரிய திருப்பத்தை ஏற்படுத்தும் என்பதில் ஐயமில்லை. இந்த ‘விஜய் மேனியா’ தேர்தல் முடிவுகளில் எப்படி பிரதிபலிக்க போகிறது என்பதை காண ஒட்டுமொத்த தமிழகமும் ஆவலுடன் காத்திருக்கிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
