தமிழக அரசியல் களம் 2026 சட்டமன்ற தேர்தலை நோக்கி நகர்கையில், தற்போதைய நகர்வுகள் பெரும் வியூக போராக மாறியுள்ளன. குறிப்பாக, அதிமுக தலைமையிலான தேசிய ஜனநாயகக் கூட்டணியில் டிடிவி தினகரன் தலைமையிலான அமமுக இணைந்திருப்பது ஒரு திருப்புமுனையாக பார்க்கப்படுகிறது.
கடந்த 2021 தேர்தலின் போது, சுமார் 21 தொகுதிகளில் எடப்பாடி பழனிசாமி தலைமையிலான அதிமுகவின் வெற்றியை தடுத்தவர் தினகரன். தற்போது அந்த வாக்கு வங்கிகள் மீண்டும் ஒன்றிணைவது, ஆளும் திமுகவுக்கு பெரும் சவாலாக அமையும் என அரசியல் விமர்சகர்கள் கணிக்கின்றனர். பிரிந்து கிடந்த சக்திகள் ஒன்றாக சேருவது கூட்டணிக்கு ஒரு புதிய உத்வேகத்தையும், களத்தில் கூடுதல் பலத்தையும் அளித்துள்ளது.
அரசியலில் நிரந்தர நண்பனும் இல்லை, நிரந்தர எதிரியும் இல்லை என்பதற்கு தினகரன் மற்றும் எடப்பாடி பழனிசாமி இணைப்பு ஒரு சிறந்த உதாரணம். கடந்த காலங்களில் ஒருவரை ஒருவர் மிக கடுமையாக விமர்சித்துக்கொண்ட போதிலும், ‘திமுக என்ற பொது எதிரியை வீழ்த்த வேண்டும்’ என்ற ஒற்றை புள்ளியில் இவர்கள் இணைந்திருப்பது தொண்டர்களிடையே உற்சாகத்தை ஏற்படுத்தியுள்ளது. “விட்டுக்கொடுப்பவர்கள் கெட்டுப்போவதில்லை” என்ற தத்துவத்தின் அடிப்படையில், அதிமுக தலைமையிலான இந்த கூட்டணி 2026-ல் திமுகவின் கோட்டையை அசைத்து பார்க்கும் ஒரு வலிமையான சக்தியாக உருவெடுத்துள்ளது.
மறுபுறம், திமுக தரப்பில் இந்த மாற்றங்கள் ஒருவித பதற்றத்தை உருவாக்கியுள்ளதாக தெரிகிறது. பாஜகவின் மிரட்டலால்தான் இந்தக் கூட்டணி உருவானது என்ற விமர்சனங்கள் ஒருபுறம் இருந்தாலும், திமுகவும் தனது கடந்த கால அரசியல் வரலாற்றில் இத்தகைய காய்நகர்த்தல்களை செய்துள்ளது என்பதை மறந்துவிட முடியாது. குறிப்பாக 2ஜி விவகாரத்தின் போது காங்கிரஸ் தலைமையுடன் திமுக மேற்கொண்ட சமரசங்கள் இன்று நினைவுபடுத்தப்படுகின்றன. தற்போது வைத்திலிங்கம் போன்ற அதிமுகவின் முக்கியப் புள்ளிகள் திமுகவில் இணைவது ஆளும் கட்சிக்கு சாதகமாக தெரிந்தாலும், அது உள்ளூர் மட்டத்திலிருக்கும் திமுக நிர்வாகிகளிடையே எத்தகைய சலசலப்பை ஏற்படுத்தும் என்பது போகப்போகத்தான் தெரியும்.
சமூக வலைதளங்களில் தற்போதைய பேசுபொருளாக இருப்பது நடிகர் விஜய்யின் நீண்ட மௌனம். ‘விசில்’ சின்னம் மற்றும் தவெக தொண்டர்களின் ஆர்வம் ஒருபுறம் இருந்தாலும், மக்கள் பிரச்சனைகளில் விஜய் மௌனம் காப்பது அவரது வாக்கு வங்கியில் சரிவை ஏற்படுத்த வாய்ப்புள்ளதாக பத்திரிகையாளர் மணி போன்றவர்கள் எச்சரிக்கின்றனர். அரசியல் என்பது “நெருப்பாற்றில் ரோமங்களால் ஆன பாலத்தை கடப்பது போன்றது” என்று வர்ணிக்கப்படுகிறது. அத்தகைய சவாலான களத்தில் விஜய் எப்போது தனது மௌனத்தை உடைப்பார் என்பதுதான் மில்லியின் டாலர் கேள்வியாக உள்ளது.
இந்த தேர்தலில் ஜாதி அரசியல் மற்றும் தனிநபர் செல்வாக்கு ஆகியவற்றையும் தாண்டி, ‘ஆளுங்கட்சி எதிர்ப்பு’ என்ற காரணம் மிக முக்கியப் பங்கு வகிக்கும். 2021-ல் திமுகவுக்கு இருந்த சாதகமான சூழல் இன்று மாறியுள்ளது. 10 ஆண்டுகால அதிமுக ஆட்சிக்கு எதிராக இருந்த மக்களின் மனநிலை, இப்போது திமுகவின் 5 ஆண்டுகால நிர்வாகத்தைப் பரிசீலிக்கத் தொடங்கியுள்ளது. இந்தச் சூழலில் அதிமுக, பாஜக, அமமுக உள்ளிட்ட கட்சிகள் ஒருமித்த கூட்டணியாகத் தேர்தலைச் சந்திப்பது வாக்குகள் சிதறுவதைத் தடுக்கும். இது திமுகவின் தனிப்பெரும்பான்மை கனவுக்கு முட்டுக்கட்டையாக அமையலாம்.
முடிவாக, தமிழக அரசியல் ஒரு மிகப்பெரிய மாற்றத்தை நோக்கிப் பயணித்துக் கொண்டிருக்கிறது. ஒருபுறம் பலமான கூட்டணி அமைத்துத் தயாராகும் எதிர்க்கட்சிகள், மறுபுறம் கூட்டணிக் கட்சிகளின் சீட் கோரிக்கைகளைச் சமாளிக்கும் நிலையில் இருக்கும் ஆளுங்கட்சி, இவற்றுக்கு நடுவே மர்மம் நீடிக்கும் விஜய் ஃபேக்டர் என 2026 களம் அனல் பறக்கப்போகிறது. யார் யாரை மிரட்டினார்கள், யார் யாரிடம் சரணடைந்தார்கள் என்பதைத் தாண்டி, மக்களின் உண்மையான பிரச்சனைகளுக்குத் தீர்வு தரும் கூட்டணியே வரும் தேர்தலில் அரியணை ஏறும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
