தமிழக அரசியலில் தேர்தல் களமும், பண பலமும் எப்போதும் பிரிக்க முடியாத கூறுகளாக பார்க்கப்படுகின்றன. குறிப்பாக, 2026 சட்டமன்ற தேர்தலை முன்னிட்டு மூத்த பத்திரிகையாளர் துக்ளக் ரமேஷ் போன்றோர் முன்வைக்கும் கருத்துக்கள் தமிழக அரசியலின் “பணப் புழக்கம்” குறித்த ஒரு கவலையான சித்திரத்தை வரைந்து காட்டுகின்றன.
ஒரு தொகுதிக்கு 50 முதல் 100 கோடி ரூபாய் வரை செலவிடப்படலாம் என்ற அவரது கணிப்பு, வாக்காளர்களிடையே மட்டுமல்லாது ஜனநாயகத்தை நேசிப்பவர்களிடமும் ஒருவித அதிர்ச்சியை ஏற்படுத்தியுள்ளது. இந்த தரவுகளின்படி பார்த்தால், ஒரு தொகுதியின் சராசரி செலவு 100 கோடி என்றால், தமிழகத்தின் 234 தொகுதிகளுக்கும் சேர்த்து ஒரு முக்கிய கட்சியின் தேர்தல் பட்ஜெட் மட்டும் சுமார் 23,400 கோடி ரூபாய் என்ற மலைக்கவைக்கும் தொகையை எட்டும்.
திராவிட கட்சிகளுக்கு இடையிலான போட்டி என்பது பல நேரங்களில் கொள்கைகளை தாண்டி “யார் அதிகப் பணம் கொடுக்கிறார்கள்?” என்ற இடத்திற்குத் தள்ளப்பட்டுவிடுகிறது. ஒரு முன்னணி திராவிட கட்சி 23,400 கோடி ரூபாய் செலவு செய்யத் தயாராகிறது என்றால், அதற்கு போட்டியாக இருக்கும் மற்றொரு திராவிட பேரியமும் அதே அளவு அல்லது அதற்கும் மேலாக செலவு செய்ய வேண்டிய கட்டாயத்திற்குத் தள்ளப்படும். இதன் விளைவாக, ஒரு தேர்தலுக்காக தமிழகத்தில் மட்டும் சுமார் 50,000 கோடி ரூபாய்க்கும் அதிகமான பணம் தேர்தல் களத்தில் விளையாடும் சூழல் உருவாகிறது. இந்த தொகையானது பல சிறிய மாநிலங்களின் ஆண்டு பட்ஜெட்டிற்கு சமமானதாகும் என்பது குறிப்பிடத்தக்கது.
வாக்காளர்களுக்கு ஒரு ஓட்டுக்கு 1000 முதல் 2000 ரூபாய் வரை விநியோகிக்கப்படலாம் என்ற தகவல், தேர்தல் என்பது ஒரு ஜனநாயகக் கடமை என்பதிலிருந்து மாறி, ஒரு வியாபாரமாக மாறிவிட்டதை காட்டுகிறது. விஜய்யின் தமிழக வெற்றி கழகம் போன்ற புதிய சக்திகள் களத்திற்கு வரும்போது, போட்டியை சமாளிக்க பழைய கட்சிகள் இன்னும் கூடுதல் பணத்தை வாரி இறைக்க கூடும். விஜய் பக்கம் சில சிறிய கட்சிகள் சாயும் பட்சத்தில், திராவிட கட்சிகள் தங்கள் செல்வாக்கை தக்கவைக்க பண ஆயுதத்தை இன்னும் வீரியமாக பயன்படுத்தும் வாய்ப்புள்ளது. இது தேர்தலை மிக காஸ்ட்லியான ஒன்றாக மாற்றிவிடுகிறது.
தேர்தல் ஆணையத்தை பொறுத்தவரை, இது ஒரு மிகப்பெரிய சவாலாகும். முந்தைய தேர்தல்களில் வேலூர் மற்றும் ஆர்.கே. நகர் போன்ற தொகுதிகளில் பணப்புழக்கம் காரணமாக தேர்தல்கள் ரத்து செய்யப்பட்ட வரலாறுகள் உண்டு. 2026 தேர்தலுக்காக தேர்தல் ஆணையம் ஏற்கனவே தனது ஆயத்த பணிகளை தொடங்கிவிட்டது. 234 தொகுதிகளுக்கும் தேர்தல் நடத்தும் அலுவலர்களை நியமித்து, பறக்கும் படைகளை தயார் நிலையில் வைத்துள்ளது. இருப்பினும், பணம் பாதாளம் வரை பாயும் என்ற நிலையில், தேர்தல் ஆணையத்தின் சோதனைகளை தாண்டிப் பணம் விநியோகிக்கப்படும் நுணுக்கமான உத்திகளை தடுத்து நிறுத்துவது என்பது ஒரு பூனைக்கும் எலிக்கும் நடக்கும் போராட்டமாகவே இருக்கும்.
இந்தியாவிலேயே தமிழகம் தான் வாக்காளர்களுக்குப் பணம் கொடுப்பதில் முதலிடத்தில் இருப்பதாக சில புள்ளிவிவரங்கள் அடிக்கடி சுட்டிக்காட்டுகின்றன. கடந்த 2024 மக்களவை தேர்தலின் போதே சுமார் 1,300 கோடி ரூபாய் மதிப்பிலான பணம் மற்றும் பொருட்கள் பறிமுதல் செய்யப்பட்டன. அப்படியிருக்கையில், ஆட்சியை கைப்பற்றத் துடிக்கும் 2026 சட்டமன்ற தேர்தலில், இந்த வேட்டை இன்னும் தீவிரமாக இருக்கும். தேர்தல் ஆணையம் அப்பாவி வியாபாரிகள் மற்றும் பொதுமக்கள் கொண்டு செல்லும் பணத்தை மட்டுமே கைப்பற்றும் நடவடிக்கையில் இருப்பதாகவும், அரசியல்வாதிகள் கொண்டு செல்லும் கோடிகளை வெறும் வேடிக்கை பார்க்கும் அமைப்பாக இருப்பதாகவும் ஒரு குற்றச்சாட்டு உள்ளது. தேர்தல் ஆணையம் பண விநியோகத்தில் ஈடுபடும் பெரும் தலைகள் மீது வேட்டையை ஆரம்பித்தால் மட்டுமே ஆணையம் மீது மக்களுக்கு நம்பிக்கை ஏற்படும்.
இறுதியாக, தேர்தல் சீர்திருத்தங்கள் மற்றும் வாக்காளர்களின் விழிப்புணர்வு மட்டுமே இந்த பணப்புழக்கத்திற்கு முற்றுப்புள்ளி வைக்க முடியும். ஒரு ஜனநாயக நாட்டில், மக்கள் பிரதிநிதிகளை தேர்ந்தெடுக்கும் உரிமையானது பணத்திற்கு விலை போகுமானால், அது நீண்ட கால அடிப்படையில் மாநிலத்தின் வளர்ச்சியை பாதிக்கும். அரசியல் கட்சிகள் கோடிக்கணக்கில் செலவு செய்து வெற்றி பெறும்போது, அந்த பணத்தை மீண்டும் ஈட்ட ஊழலில் ஈடுபடுவது ஒரு சங்கிலி தொடராக தொடர்கிறது. 2026 தேர்தல் தமிழக அரசியலின் போக்கை மட்டுமல்ல, இந்திய தேர்தல் முறையிலேயே ஒரு பாடமாக அமையப்போகிறது என்பதில் ஐயமில்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
