தமிழக அரசியல் களம் என்பது எப்போதுமே தேர்தல் முடிவுகளுக்கு பிந்தைய சுயபரிசோதனைகளாலும், தலைவர்களின் காரசாரமான விவாதங்களாலும் அனல் பறக்கும் ஒன்றாகவே இருந்து வருகிறது. அந்த வகையில், அண்மையில் நடந்து முடிந்த சட்டமன்ற தேர்தல் முடிவுகள் நாம் தமிழர் கட்சிக்குள்ளும், அதன் தலைமை ஒருங்கிணைப்பாளர் சீமானின் அரசியல் அணுகுமுறை மீதும் மிகப்பெரிய விமர்சன கணைகளை எழுப்பியுள்ளது. குறிப்பாக, தவெக தலைவர் விஜய் அறிவித்த ‘ஆண்டுக்கு 6 இலவச சிலிண்டர்கள்’ என்ற தேர்தல் வாக்குறுதியை நோக்கி, “விஜய் எப்படி வீட்டுக்கு 6 சிலிண்டர் தருவார் என்று நானும் பார்க்கிறேன்; அவர் என்ன ஈரான் நாட்டுக்கு சென்று பேசி, போரை நிறுத்தி அங்கிருந்து எரிவாயு கொண்டு வரப்போகிறாரா?” என்று சீமான் மேடைகளில் கேள்வி எழுப்பியிருந்தார். ஆனால், இந்த வெற்று கேலிகளையும் தாண்டி, தற்போது நாம் தமிழர் கட்சியின் அடிமட்ட தொண்டர்களும், அரசியல் விமர்சகர்களும் கட்சியின் பரிதாபகரமான தேர்தல் தோல்வி குறித்தும், சீமானின் எதேச்சதிகார போக்கு குறித்தும் கடுமையான கேள்விகளை எழுப்ப தொடங்கியுள்ளனர்.
நடந்து முடிந்த தேர்தலில் நாம் தமிழர் கட்சி அடைந்துள்ள வீழ்ச்சி என்பது அக்கட்சியின் வரலாற்றிலேயே மிக மோசமான ஒரு பின்னடைவாக பார்க்கப்படுகிறது. கடந்த காலங்களில் 8 சதவீதத்திற்கும் மேல் வாக்கு வங்கியை வைத்திருந்த நாம் தமிழர் கட்சி, இந்த தேர்தலில் வெறும் 4 சதவீத வாக்குகளை மட்டுமே பெற்று, தமிழக அரசியல் களத்தில் நான்காவது இடத்திற்கு தள்ளப்பட்டுள்ளது. காரைக்குடி உட்பட போட்டி இட்ட அத்தனை தொகுதிகளிலும் அக்கட்சியின் வேட்பாளர்கள் தங்களின் டெபாசிட்டை முற்றிலுமாக இழந்துள்ளனர். தங்களை மாற்று சக்தி என்று பறைசாற்றி கொண்ட ஒரு கட்சி, தற்போதைய சூழலில் பிரதான எதிர்க்கட்சியாக உருவெடுப்பது ஒருபுறமிருக்க, குறைந்தபட்சம் ஒரு தொகுதியில் கூட தனது தார்மீக பலத்தைக் காட்ட முடியாமல் போனது அக்கட்சியின் நிர்வாக தோல்வியையே அப்பட்டமாக வெளிச்சம் போட்டு காட்டுகிறது.
இந்த கொடூரமான தோல்வி குறித்து கட்சியின் மூத்த நிர்வாகிகள் சிலர் தங்களின் குமுறல்களை வெளிப்படையாகவே பேச தொடங்கியுள்ளனர். “திமுக என்னதான் டுபாக்கூர் வேலைகளை பார்த்தாலும், குடும்ப அரசியல் செய்தாலும், அவர்கள் அடிமட்ட அளவில் தேர்தல் வேலைகளை துல்லியமாக பார்த்து 59 இடங்களை கைப்பற்றி இன்று வலுவான எதிர்க்கட்சியாக உட்கார்ந்திருக்கிறார்கள்; ஆனால், நாம் தமிழர் கட்சி போட்ட அனைத்து இடங்களிலும் டெபாசிட் காலி செய்துள்ளதே, இதற்கு என்ன காரணம்?” என்று தங்களுக்குள் கேள்வி எழுப்புகிறார்கள். மே 18 போன்ற நினைவேந்தல் நிகழ்வுகளுக்கு லட்சக்கணக்கில் கூடும் இளைஞர்கள், தேர்தல் என்று வரும்போது ஏன் நாம் தமிழர் கட்சிக்கு வாக்களிக்க முன்வருவதில்லை என்ற கசப்பான யதார்த்தத்தை ஆராய கட்சியின் தலைமை இன்னும் முன்வராதது பெரும் ஏமாற்றத்தை அளித்துள்ளது.
கட்சியின் இந்த வீழ்ச்சிக்கு நிதி நிலைமை தான் காரணம் என்று சீமான் தரப்பு முட்டுக்கொடுக்க முயன்றாலும், அதை நடுநிலை தொண்டர்கள் யாரும் ஏற்றுக்கொள்ள தயாராக இல்லை. மற்ற கட்சிகளை போலக் கையில் காசை கொட்டி எம்.எல்.ஏ, அமைச்சர் ஆக வேண்டும் என்ற நோக்கத்தில் நாம் தமிழர் கட்சித் தம்பிகள் களப்பணி செய்யவில்லை; மாறாக சித்தாந்தத்தை நம்பியே உழைத்தனர். எனவே, தோல்விக்கு காரணம் பணப் பற்றாக்குறை அல்ல, மாறாகச் சீமானின் தனிநபர் அணுகுமுறையும், அவரது வாயில் இருந்து வரும் முதிர்ச்சியற்ற பேச்சுக்களும்தான் என்று கட்சியினரே குற்றம் சாட்டுகின்றனர். தேர்தல் தோல்விக்கு பிறகு, “ஏன் தோற்றோம்? எதனால் 8 சதவீத வாக்கு 4 சதவீதமாக குறைந்தது? பூத் கமிட்டி அமைத்தும் எங்கு தவறு நடந்தது?” என்று ஒரு உட்கட்சி ஆலோசனை கூட்டத்தை கூட கூட்டி தொண்டர்களிடம் கருத்து கேட்க சீமான் தயாராக இல்லை என்பதே பெரும் குறையாக பார்க்கப்படுகிறது.
கட்சிக்குள் தற்போதைய சூழலில், ஜனநாயக முறைப்படி விவாதங்களை நடத்துவதற்கோ அல்லது மாற்றுத் தரப்பு கருத்துக்களைச் சொல்வதற்கோ துளிகூட இடமில்லை என்ற அதிருப்தி நாளுக்கு நாள் அதிகரித்து வருகிறது. “கட்சியில் இருந்தால் இரு, இல்லையென்றால் போ; என் கட்சி என் இஷ்டப்படிதான் நடக்கும், யாருடைய ஆலோசனையும் தேவையில்லை” என்ற Attitude சீமானிடம் நீடிக்கும் வரை, நாம் தமிழர் கட்சி இன்னும் பல தேர்தல்கள் கடந்தாலும் ஒன்னத்துக்கும் உதவாத ஒரு கட்சியாகவே தேங்கி நிற்கும் என விமர்சகர்கள் தீர்க்கமாக கணிக்கின்றனர். அண்ணன் சீமான் இனிமேலாவது திருந்துவார், தனது தம்பிகளின் உழைப்பை வீணாக்காமல் சுயபரிசோதனை செய்துகொண்டு தனது அரசியல் அணுகுமுறையை மாற்றுவார் என்று எதிர்பார்ப்பதற்கும் எவ்வித வாய்ப்பும் இல்லை என்பது அவரது தற்போதைய பிடிவாதப் போக்கின் மூலமே தெளிவாகத் தெரிகிறது.
சுருக்கமாக சொன்னால், அடுத்தவர்களின் தேர்தல் வாக்குறுதிகளை கேலி செய்வதிலும், வெற்று வார்த்தை ஜாலங்களால் மேடைகளை அலங்கரிப்பதிலும் மட்டுமே கவனம் செலுத்திய நாம் தமிழர் கட்சி, தங்களின் சொந்த கட்டமைப்பை வலுப்படுத்த தவறிவிட்டது. தேர்தல் களத்தில் மக்கள் கொடுத்த இந்த சாட்டையடி தீர்ப்பு, வெறும் மேடைப்பேச்சை மட்டும் நம்பி அரசியல் செய்ய முடியாது என்பதை சீமானுக்கு உணர்த்தியுள்ளது. தவெக தலைவர் விஜய்யின் மக்கள் செல்வாக்கையும், தற்போதைய அரசின் நிர்வாக திறனையும் கண்டு மிரண்டுபோய் தொடுக்கும் இத்தகைய அவதூறுகள் இனி மக்களின் மத்தியில் செல்லுபடியாகாது. சீமான் தனது அநாகரிகமான அணுகுமுறையையும், சர்வாதிகார போக்கையும் கைவிடாதவரை, நாம் தமிழர் கட்சி தமிழக அரசியல் வரலாற்றில் ஒரு நிரந்தர தோல்வியடைந்த சக்தியாகவே எஞ்சி நிற்கும் என்பதில் எவ்வித மாற்று கருத்தும் இருக்க முடியாது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
