தமிழக அரசியல் வரலாற்றில் தேர்தல் என்பது ஒரு சடங்காகவும், வாக்களிப்பது என்பது விடுமுறை தினமாக கருதப்பட்டு வந்த ஒரு காலத்தை கடந்து, இன்று தனது ஜனநாயக உரிமையை நிலைநாட்டத் துடிக்கும் ஒரு புதிய தலைமுறையை நாம் பார்த்து வருகிறோம். கடந்த 45 ஆண்டுகளில் பல தேர்தல்களை கண்ட அனுபவசாலிகள் கூட இதுவரை கண்டிராத ஒரு வியப்பத்தக்க மாற்றம் தற்போது நிகழ்ந்து கொண்டிருக்கிறது.
இதற்கு முன்பு வரை, வாக்காளர் பட்டியலில் பெயர் இல்லை என்றாலோ அல்லது வாக்காளர் அடையாள அட்டை வரவில்லை என்றாலோ, “விடுங்கள், ஒரு ஓட்டு போடவில்லை என்றால் என்ன ஆகப்போகிறது” என்று சாதாரணமாக கடந்து சென்ற மக்களே அதிகம். ஆனால், இந்த தேர்தலில் “எனக்கு இன்னும் ஓட்டர் ஐடி வரவில்லை, நான் எப்போது ஓட்டுப் போடுவேன்?” என்று மக்கள் தங்களின் உரிமையை நோக்கி குரல் எழுப்ப தொடங்கியிருப்பது ஒரு மாபெரும் அரசியல் விழிப்புணர்வை காட்டுகிறது.
வாக்களிப்பது என்பது வெறும் கடமை மட்டுமல்ல, அது ஒரு குடிமகனின் அதிகாரம் என்பதை தமிழகத்தின் சாதாரண மக்களிடம் கொண்டு சேர்த்த பெருமை ஒரு புதிய தலைமைக்கு சேரும். ஒரு தலைவன் என்பவன் வெறும் வாக்குறுதிகளை மட்டும் வழங்குபவன் அல்ல; மக்களிடையே மங்கி போயிருந்த ஜனநாயக உணர்வை தட்டியெழுப்புபவனே உண்மையான தலைவன். “எனது ஓட்டு எங்கே?” என்று மக்களை பேச வைத்ததன் மூலமே அந்த தலைவன் தனது முதல் வெற்றியை பெற்றுவிட்டார். ஜாதி, மத மற்றும் பண பலத்தால் கட்டமைக்கப்பட்ட அரசியல் கோட்டைகளுக்கு மத்தியில், தனது ஓட்டுரிமைக்காக மக்களை ஏங்க வைத்திருப்பது தமிழக அரசியலில் ஒரு ஆரோக்கியமான மாற்றத்தின் அறிகுறியாகும்.
மக்களின் இந்த தாகத்திற்குப் பின்னால் ஒரு தீர்க்கமான நம்பிக்கை ஒளிந்திருக்கிறது. தங்களின் ஒரு வாக்கு மாற்றத்தை உருவாக்கும் என்ற நம்பிக்கை இல்லாத வரை, எந்த ஒரு குடிமகனும் வாக்காளர் அடையாள அட்டைக்காக இவ்வளவு மெனக்கெட மாட்டான். “வந்தால்தான் நான் ஓட்டு போடுவேன், எனக்கு எப்போது உரிமை கிடைக்கும்?” என்று மக்கள் கேட்கிறார்கள் என்றால், அந்த உரிமையை பயன்படுத்த ஒரு தகுதியான காரணம் அவர்களுக்குக் கிடைத்துள்ளது என்றுதான் அர்த்தம். மக்கள் தங்கள் உரிமையை இவ்வளவு தீவிரமாக தேடி செல்வதற்குக் காரணமாக இருக்கும் அந்த தலைவன், மக்களின் மனங்களை வென்ற ஒரு மக்கள் தலைவனாக உருவெடுத்துள்ளார்.
ஒரு நல்ல ஆட்சியாளராக வருவதற்கு முன்னரே, ஒரு சிறந்த வழிகாட்டியாக திகழ்வதுதான் ஒரு தலைவனுக்கு அழகு. மக்களிடம் ஜனநாயக பண்புகளை விதைப்பது, அவர்களை சட்டத்தின் வழிநடத்துவது மற்றும் தங்களின் உரிமைகளுக்காக போராடத் தூண்டுவது என அந்தத் தலைவன் ஒரு புதிய அரசியல் பாதையை வகுத்துள்ளார். திராவிட கட்சிகளின் பிடியில் சிக்கியிருந்த வாக்காளர் மனநிலையை மாற்றி, “உன் ஓட்டு உன் உரிமை” என்பதை ஆழமாக பதிய வைத்திருப்பது மிகப்பெரிய சாதனை. இது போன்ற விழிப்புணர்வு நிலவும் ஒரு மாநிலத்தில், இனி எந்தக் கட்சியும் மக்களை எளிதாக ஏமாற்றிவிட முடியாது.
இறுதியாக, தமிழகத்தின் இந்த மாற்றமானது வரும் மே 4-ம் தேதி தேர்தல் முடிவுகளில் ஒரு மிகப்பெரிய திருப்பத்தை ஏற்படுத்தும் என்பதில் ஐயமில்லை. வாக்காளர் அட்டைக்காக காத்திருந்த அந்த ஆயிரக்கணக்கான கண்கள், மாற்றத்திற்கான தீர்ப்பை வழங்கத் தயாராக உள்ளன. ஒரு தலைவன் மக்களை சிந்திக்க வைத்தால் அந்த நாடு முன்னேறும் என்பதற்கு தமிழகமே தற்போது சாட்சியாக மாறியுள்ளது. மக்கள் தங்கள் உரிமையை தேடி செல்லும் இந்த பயணம், தமிழகத்தின் அதிகார பீடத்தில் ஒரு புதிய ரத்தத்தை பாய்ச்ச போவது உறுதி. இந்த எழுச்சியே அந்தத் தலைவன் ஒரு சிறந்த ஆட்சியாளராக வருவதற்கான அச்சாரமாகும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
