இந்தியா மற்றும் பாகிஸ்தானுக்கு இடையேயான வான்வழி மோதல்களின்போது, மிகவும் இரகசியமான இராணுவ உத்திகள் பயன்படுத்தப்பட்டதாக கூறப்படும் ஒரு சம்பவம் இப்போது வெளியாகியுள்ளது.
பாகிஸ்தான், இந்தியாவின் அதிநவீன எஸ்-400 (S-400) வான் பாதுகாப்பு ஏவுகணை அமைப்பின் நிலைகளை கண்டறியச் சீன செயற்கைக்கோள் தரவுகளை பயன்படுத்தியிருக்கலாம் என்று கருதப்படுகிறது.
இந்தியா தனது முக்கிய வான்பரப்புகளை பாதுகாப்பதற்காக ரஷ்யாவில் இருந்து வாங்கிய எஸ்-400 டிரம்ப் என்ற வான் பாதுகாப்பு ஏவுகணை அமைப்புகளை குறிப்பிட்ட இடங்களில் நிறுத்தியுள்ளது. இந்த அமைப்பு உலகின் மிகவும் சக்திவாய்ந்த வான் பாதுகாப்பு அமைப்புகளில் ஒன்றாக கருதப்படுகிறது.
சம்பவம் நடந்தபோது, இந்திய எல்லைக்குள் ஊடுருவ முயன்ற பாகிஸ்தானின் வான்வழி இலக்குகள் மீது எஸ்-400 ஏவுகணை அமைப்பு தாக்குதல் நடத்தியுள்ளது. இந்த தாக்குதல் வெற்றியடைந்ததும், அதன் வலிமையைக் கண்டு பாகிஸ்தான் இராணுவம் அதிர்ச்சியடைந்தது என்றும், இந்த அமைப்பின் இருப்பிடத்தை எப்படியாவது கண்டறிய வேண்டும் என்றும் முடிவெடுத்ததாகவும் கூறப்படுகிறது.
எஸ்-400 தளத்தின் இருப்பிடத்தை கண்டறிய பாகிஸ்தான், தனது நெருங்கிய நட்பு நாடான சீனாவின் உதவியை நாடியதாக தகவல்கள் தெரிவிக்கின்றன. சீனாவின் செயற்கைக்கோள்கள் இந்திய பகுதிகளை உன்னிப்பாக கண்காணித்து வருவதால், எஸ்-400 அமைப்பு ஏவுகணையை செலுத்திய இடத்தை துல்லியமாக கண்டறிய சீன செயற்கைக்கோள் தரவுகளை பயன்படுத்த பாகிஸ்தான் முயற்சித்துள்ளது. அந்த தளத்தை கண்டறிந்த பாகிஸ்தான், அதற்கு பதிலடி கொடுக்கும் நோக்கில் அந்த இடத்தில் தாக்குதல் தொடுக்க முயன்றது.
பாகிஸ்தானின் இந்த முயற்சி குறித்து இந்தியா நன்கு அறிந்திருந்தது என்றும், ஏனெனில் இது போன்ற இராணுவ நடவடிக்கைகளில் நடக்கும் இயல்பான உத்தி என்றும் கூறப்படுகிறது. ஒரு ஏவுகணை ஏவப்பட்டால், எதிரிப்படைகள் அதன் ஏவுமிடத்தை துல்லியமாக கண்டறிய ட்ரையாங்குலேஷன் (Triangulation) போன்ற தொழில்நுட்பங்களை பயன்படுத்தும் என்பதை இந்திய இராணுவம் நன்கு உணர்ந்திருந்தது. இதற்குப் பதிலளிக்கும் வகையில், இந்திய இராணுவம் மிக முக்கியமான Shoot and Scoot என்ற உத்தியை வெற்றிகரமாக பயன்படுத்தியது.
Shoot and Scoot என்பது ஓர் இடத்தில் இருந்து ஏவுகணையை செலுத்திய (Shoot ) உடனேயே, ஏவுதளங்களை அங்கிருந்து விரைவாக இடம் மாற்றி (Scoot) வேறு ஒரு இடத்திற்கு எடுத்து செல்வது. பாகிஸ்தான் பதிலடி தாக்குதலை தொடுத்தபோது, அவர்கள் குறிவைத்த இடத்தில் அதாவது, எஸ்-400 ஏவுகணை முன்னர் இருந்த இடத்தில் இந்திய ஏவுதளங்கள் எதுவும் இல்லை. இதனால் பாகிஸ்தானின் தாக்குதல் தோல்வியடைந்தது.
இந்த சம்பவம், இந்திய இராணுவம் எதிரியின் உத்திகளை முன்கூட்டியே கணித்து, அதற்கு தகுந்தாற்போல் நவீன இராணுவ உத்திகளை பயன்படுத்துவதை காட்டுவதாக அமைந்தது. பாதுகாப்பு அமைப்புகளின் இருப்பிடம் எப்போதும் நிலையாக இருக்காது என்பதையும், எதிரி நாடுகள் ஏவுகணை ஏவுமிடத்தை கண்டறிவது ஒரு சவால் என்பதையும் இது தெளிவாக உணர்த்துகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
