தமிழக அரசியலில் தேர்தல் களம் சூடுபிடிக்க தொடங்கியுள்ள வேளையில், கூட்டணி கணக்குகளும் கொள்கை மோதல்களும் புதிய விவாதங்களை உருவாக்கியுள்ளன. குறிப்பாக, பல ஆண்டுகளாக தமிழக அரசியலில் நீடிக்கும் திமுக – காங்கிரஸ் கூட்டணிக்கு எதிராக, அதே காங்கிரஸின் அடிமட்ட தொண்டர்கள் மற்றும் மாற்றத்தை விரும்பும் ஒரு சாரார் நடிகர் விஜய்யின் தமிழக வெற்றி கழகத்தை நோக்கி திரும்பியிருப்பது ஒரு முக்கிய அரசியல் நகர்வாக பார்க்கப்படுகிறது. திமுகவிடம் இருந்து தேர்தல் நிதியோ அல்லது இதர ஆதாயங்களோ பெற்றுக்கொண்டு கூட்டணி வைத்துள்ளதாக விமர்சிக்கப்படும் தற்போதைய காங்கிரஸ் தலைமைக்கு எதிராக, எந்த பிரதிபலனும் எதிர்பார்க்காத ‘உண்மையான’ காங்கிரஸ் விசுவாசிகள் தவெகவுடன் கைகோர்க்க தயாராகி வருகின்றனர்.
பணம் மற்றும் பதவிக்காக தங்களது கட்சியின் தனித்துவத்தை அடகு வைக்கும் நிர்வாகிகள் வேண்டுமானால் திமுகவிற்கு ஆதரவாக தேர்தல் வேலைகளை செய்யலாம், ஆனால் உண்மையான காங்கிரஸ் சித்தாந்தத்தை நேசிக்கும் ஒரு தொண்டன் எதற்காக மற்றுமொரு திராவிட கட்சிக்கு வாக்களிக்க வேண்டும் என்ற கேள்வி எழுப்பப்படுகிறது.
நீண்டகாலமாகத் தமிழகத்தில் ஒரு தேசிய கட்சியின் ஆட்சி அமைய வேண்டும் அல்லது ஒரு புதிய மாற்று சக்தி உருவாக வேண்டும் என விரும்பும் அடிமட்ட தொண்டர்கள், இப்போது விஜய்யின் தலைமைத்துவத்தில் ஒரு நம்பிக்கையை காண்கின்றனர். நிர்வாகிகள் தங்கள் சுயநலத்திற்காக எடுக்கும் முடிவுகள் தொண்டர்களை கட்டுப்படுத்தாது என்பதையே இந்த அரசியல் சூழல் உணர்த்துகிறது.
நிர்வாகிகள் திமுகவின் நிழலில் தஞ்சம் புகுந்தாலும், அடிமட்ட தொண்டர்களின் வாக்குகள் தவெகவின் பக்கம் பாயும் போது அது தேர்தல் முடிவுகளில் மிகப்பெரிய தாக்கத்தை ஏற்படுத்தும். “காசு வாங்கிக் கொண்டு கூட்டணி வைப்பவர்கள் தலைவர்களாக இருக்கலாம், ஆனால் கொள்கையை நேசிப்பவர்களே உண்மையான தொண்டர்கள்” என்ற முழக்கம் இப்போது ஒலிக்க தொடங்கியுள்ளது.
தேர்தல் நேரத்தில் பணம் பட்டுவாடா செய்யும் நிர்வாகிகளின் பேச்சை கேட்காமல், தமிழகத்தின் எதிர்காலத்தை முன்னிறுத்தி நேர்மையான அரசியலை முன்னெடுக்கும் விஜய்க்கு வாக்களிப்பதே சிறந்தது என்ற மனநிலை காங்கிரஸ் தொண்டர்கள் மத்தியில் பரவி வருகிறது.
இந்த மறைமுக ஆதரவு, வரும் தேர்தலில் தவெகவிற்கு ஒரு பலமான அடித்தளத்தை அமைத்து கொடுக்கும் என்பதில் மாற்று கருத்து இருக்க முடியாது. நிர்வாகிகளின் கணக்கை தொண்டர்களின் வாக்குகள் தவிடுபொடியாக்கும் ஒரு ‘அமைதிப் புரட்சிக்கு’ தமிழகம் தயாராகி வருவதையே இது காட்டுகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
