தமிழக சட்டசபை தேர்தல் களம் இறுதிக்கட்டத்தை எட்டியுள்ள நிலையில், தற்போதைய அரசியல் போட்டியை நான்குமுனை போட்டி’ என்று அழைப்பதே தவறு என சமூக வலைதளங்களில் நெட்டிசன்கள் கடும் விமர்சனங்களை முன்வைத்து வருகின்றனர்.
குறிப்பாக, கடந்த 15 ஆண்டுகளாக தேர்தல் களத்தில் இருக்கும் நாம் தமிழர் கட்சி, இதுவரை ஒரு தொகுதியில் கூட வெற்றி பெறாததுடன், பெரும்பாலான இடங்களில் டெபாசிட் கூட வாங்க முடியாத நிலையில் இருப்பதை சுட்டிக்காட்டி ஆவேசமான விவாதங்கள் எழுந்துள்ளன.
ஒரு அரசியல் கட்சி என்பது மக்களாட்சி தத்துவத்தின்படி அதிகாரத்தை பெற்று மாற்றத்தை உருவாக்க வேண்டும்; ஆனால், இத்தனை ஆண்டுகளாக போட்டியிட்டும் ஒரு சிறிய ஊராட்சியிலோ அல்லது நகராட்சி வார்டிலோ கூட ஒரு கவுன்சிலர் பதவியை கூட வெல்ல முடியாத கட்சியை பெரிய கட்சிகளுடன் ஒப்பிடுவது நகைப்புக்குரியது என பலரும் பதிவிட்டு வருகின்றனர்.
சமூக வலைதளங்களில் நாம் தமிழர் கட்சிக்கு இருக்கும் செல்வாக்கு என்பது வெறும் “டிஜிட்டல் நீர்க்குமிழி” போன்றது என்றும், அது வாக்குப்பெட்டியாக மாறுவதில்லை என்றும் விமர்சனங்கள் முன்வைக்கப்படுகின்றன. மேடை பேச்சுகளில் வீராவேசம் காட்டுவதும், மற்ற தலைவர்களை தரக்குறைவாக விமர்சிப்பதும் ஒரு கட்சியின் வளர்ச்சியை தீர்மானிக்காது என்பதற்கு அக்கட்சியின் கடந்தகால தேர்தல் முடிவுகளே சாட்சி என நெட்டிசன்கள் வாதிடுகின்றனர். குறிப்பாக, சீமான் பேசும் உணர்ச்சிப்பூர்வமான அரசியலை விட, மக்கள் தங்களின் அன்றாட தேவைகளை பூர்த்தி செய்யும் நடைமுறை அரசியலையே விரும்புகிறார்கள் என்பதை புரியாமல், தொடர்ந்து அதே பாதையில் பயணிப்பது அக்கட்சியை தேக்க நிலைக்கு கொண்டு சென்றுள்ளது.
இந்த தேர்தலில் தமிழக வெற்றி கழகம் போன்ற புதிய மற்றும் வலிமையான சக்திகளின் வருகை, நாம் தமிழர் கட்சியின் வாக்கு வங்கியை பெரிய அளவில் பாதிக்கும் என்று எதிர்பார்க்கப்படுகிறது. இதுவரை திராவிட கட்சிகளுக்கு மாற்றாக சீமானை பார்த்த இளைஞர்கள், இப்போது அதைவிட தெளிவான திட்டங்களுடனும் மிகப்பெரிய மக்கள் ஆதரவுடனும் களம் இறங்கியுள்ள விஜய் கட்சியின் பக்கம் நகர தொடங்கியுள்ளனர். இதனால், இந்த தேர்தல் நாம் தமிழர் கட்சிக்கு ஒரு வாழ்வா சாவா போராட்டமாக மாறியுள்ளது. அக்கட்சி வாங்கும் வாக்குகள் வெறும் சிதறல்களாகவே இருக்குமே தவிர, அவை ஒருபோதும் ஆட்சியையோ அல்லது அதிகாரத்தையோ தீர்மானிக்கும் சக்தியாக மாறாது என்று அரசியல் ஆய்வாளர்கள் கருத்து தெரிவிக்கின்றனர்.
குறிப்பாக, ஒரு கவுன்சிலர் சீட் கூட ஜெயிக்க முடியாத ஒரு தலைவர், தமிழகத்தின் முதலமைச்சராக போவதாகப் பேசுவது யதார்த்தத்திற்கு புறம்பானது என்று கடுமையாக சாடப்படுகிறது. “வாய் சொல்லில் வீரம்” காட்டும் அரசியலுக்கு மக்கள் இம்முறை முற்றுப்புள்ளி வைப்பார்கள் என்றும், இந்த தேர்தலோடு நாம் தமிழர் கட்சியின் அரசியல் அத்தியாயம் முடிவுக்கு வந்துவிடும் என்றும் நெட்டிசன்கள் ஆவேசமாக பகிர்ந்து வருகின்றனர். மற்ற மாநில கட்சிகள் ஒரு சில ஆண்டுகளிலேயே சட்டமன்றத்தில் தடம் பதிக்கும்போது, 15 ஆண்டுகள் ஆகியும் இன்னும் தொடக்க புள்ளியிலேயே நிற்கும் அக்கட்சியின் வியூகம் தோல்வியடைந்துவிட்டதாகவே கருதப்படுகிறது.
இறுதியாக, மே 4-ஆம் தேதி வெளியாகவுள்ள தேர்தல் முடிவுகள், தமிழக அரசியலில் யார் உண்மையான போட்டியாளர்கள் என்பதை தீர்மானிக்கும். அப்போது, தற்போதைய சமூக வலைதள விமர்சனங்கள் உண்மையாகுமா அல்லது சீமான் ஏதேனும் அதிசயம் நிகழ்த்துவாரா என்பது தெரிந்துவிடும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
