தமிழக அரசியல் களத்தில் 2026 சட்டமன்ற தேர்தலுக்கான வேட்புமனு தாக்கல் விறுவிறுப்பாக தொடங்க இருக்கும் நிலையில், மத்திய இணை அமைச்சர் எல். முருகன் அவிநாசி தொகுதியில் போட்டியிடப்போவதாக வரும் தகவல்கள் பெரும் விவாதத்தை கிளப்பியுள்ளன. டெல்லியில் செல்வாக்குமிக்க அமைச்சராக இருக்கும் ஒருவர், திடீரென தமிழக சட்டமன்ற தேர்தலுக்கு வருவது பல அரசியல் கணக்குகளை உள்ளடக்கியது. குறிப்பாக, பாஜக மேலிடம் இந்த முறை தமிழகத்தில் அதிகார பங்கீட்டை மிகவும் தீவிரமாக எதிர்பார்க்கிறது. அதிமுக கூட்டணியில் இருந்தாலும், ஆட்சி அமைக்கும் பட்சத்தில் துணை முதல்வர் பதவியை பெறுவதே அமித்ஷாவின் ‘மாஸ்டர் பிளான்’ என்று கூறப்படுகிறது. இதற்காகவே, கட்சியின் முக்கிய முகமான எல். முருகனை சட்டமன்றத்திற்குள் அனுப்பி, அங்கு ஒரு பலமான பிடியை உருவாக்க பாஜக தலைமை திட்டமிட்டுள்ளதாக தெரிகிறது.
அதிமுக பொதுச்செயலாளர் எடப்பாடி பழனிசாமி இந்த முறை 160-க்கும் மேற்பட்ட தொகுதிகளை குறிவைத்து தனது காய்களை நகர்த்தி வருகிறார். தனி பெரும்பான்மைக்குத் தேவையான 118 இடங்களை அதிமுகவே நேரடியாக பெற்றுவிட்டால், கூட்டணி கட்சிகளின் அழுத்தம் இருக்காது என்பது அவரது கணக்கு. ஆனால், ஒருவேளை அதிமுக 118 இடங்களை எட்ட முடியாமல் போனால், அங்குதான் பாஜக தனது ஆட்டத்தை தொடங்கும் என்று அரசியல் விமர்சகர்கள் கணிக்கின்றனர். ஆட்சியமைக்க தங்களின் ஆதரவு கட்டாயம் தேவை என்ற நிலை வரும்போது, துணை முதல்வர் பதவி மற்றும் முக்கிய துறைகளை மிரட்டி வாங்குவதற்கு எல். முருகன் போன்ற ஒரு ஆளுமை சட்டமன்றத்திற்குள் இருப்பது அவசியம் என அமித்ஷா கருதுவதாக தெரிகிறது.
“மெஜாரிட்டி கிடைத்தாலும் மிரட்டுவார்களா?” என்ற கேள்வி தற்போது அதிமுக தொண்டர்களிடையே அச்சத்தை ஏற்படுத்தியுள்ளது. மகாராஷ்டிரா மற்றும் பீகார் போன்ற மாநிலங்களில் பாஜக கையாண்ட அதே வியூகத்தை தமிழகத்திலும் செயல்படுத்த வாய்ப்புள்ளதாக கூறப்படுகிறது. டெல்லியில் இருக்கும் அதிகார பலத்தை பயன்படுத்தி, எடப்பாடி பழனிசாமியை பணிய வைத்து, எல். முருகனை துணை முதல்வராக்க சகல முயற்சிகளும் எடுக்கப்படும் என்ற பேச்சு பலமாக அடிபடுகிறது. இந்த ‘பிளாக்மெயில்’ அரசியலை முன்கூட்டியே மோப்பம் பிடித்த அதிமுகவின் ரத்தத்தின் ரத்தங்கள், தற்போது உஷாராக தொடங்கியுள்ளனர்.
இதற்கிடையில், எல்.முருகன் போட்டியிடும் அவிநாசியிலேயே அவருக்கு ஆப்பு வைக்க திட்டமிடப்பட்டுள்ளதாக தகவல்கள் கசிகின்றன. “நீ ஜெயிச்சாதானே துணை முதல்வர் பதவி பற்றி கேட்க முடியும்? உன்னை அவிநாசியிலேயே தோற்கடித்தால் அந்த பேச்சுக்கே இடம் இருக்காது” என்ற ரீதியில் அதிமுகவின் உள்ளூர் நிர்வாகிகள் மத்தியில் உள்ளடி வேலைகள் ஆரம்பமாகியுள்ளன. எல். முருகனுக்கு ஒதுக்கப்பட்ட அவிநாசி தொகுதி அதிமுகவிற்கு மிகவும் சாதகமான இடமாகும்; அங்கு அதிமுகவின் வாக்குகள் முழுமையாக பாஜகவிற்கு மாறினால் மட்டுமே அவரால் வெற்றி பெற முடியும். ஆனால், மேலிட மிரட்டல்களை தவிர்க்க, எல். முருகனை சட்டமன்றத்திற்கு செல்லவிடாமல் தடுப்பதே பாதுகாப்பானது என ஒரு தரப்பினர் கருதுகின்றனர்.
கொங்கு மண்டலத்தில் ஈபிஎஸ்-ஸின் பிடி மிகவும் பலமாக உள்ளது. அங்கு எல். முருகன் போன்ற ஒரு மத்திய அமைச்சர் வெற்றி பெற்று தன்னை ஒரு மாற்றாக வளர்த்து கொள்வதை ஈபிஎஸ் விரும்புவாரா என்பது சந்தேகமே. எனவே, மேடை பிரச்சாரங்களில் கூட்டணி தர்மம் என்று பேசினாலும், களத்தில் அதிமுகவினர் தங்களின் கோட்டையை காத்துக் கொள்ளவும், தேவையற்ற அதிகார பகிர்வை தவிர்க்கவும் மிகவும் சாதுர்யமாக செயல்படுவார்கள் என தெரிகிறது. பாஜகவின் அதீத எதிர்பார்ப்பு, அதிமுகவிற்கும் பாஜகவிற்கும் இடையிலான அந்த மெல்லிய உறவில் பெரும் விரிசலை ஏற்படுத்தியுள்ளது.
இறுதியாக, 2026 தேர்தல் களம் என்பது வெறும் ஆட்சி மாற்றத்திற்கான போர் மட்டுமல்ல, அது அதிமுகவின் இருப்பு மற்றும் தன்னுரிமைக்கான போராகவும் மாறியுள்ளது. டெல்லி மேலிடத்தின் ஆதிக்கத்தை சகித்துக் கொள்வதா அல்லது உள்ளடி வேலைகள் மூலம் தங்களின் செல்வாக்கை நிலைநாட்டுவதா என்ற இக்கட்டான நிலையில் அதிமுக உள்ளது. எல். முருகன் அவிநாசியில் வெற்றி பெற்று துணை முதல்வராக அமர்வாரா அல்லது ‘செக்-மேட்’ வைக்கப்பட்டு டெல்லிக்கே திருப்பி அனுப்பப்படுவாரா என்பது தேர்தல் முடிவுகளில் தெரிந்துவிடும். தற்போது நடந்து வரும் இந்த நிழல் யுத்தம், தேர்தல் நெருங்க நெருங்க இன்னும் தீவிரமடையும் என்பதில் மாற்று கருத்தில்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
