தமிழக அரசியல் களம் 2026 சட்டமன்ற தேர்தலை நோக்கி ஒரு பெரும் சூறாவளியை சந்தித்து வருகிறது. குறிப்பாக, அதிமுக மற்றும் தமிழக வெற்றி கழகம் இடையிலான கூட்டணி பேச்சுவார்த்தைகள் மற்றும் இடப்பங்கீடு குறித்த தகவல்கள் அக்கட்சியின் உள்ளேயே பெரும் சலசலப்பை ஏற்படுத்தியுள்ளன. விஜய் முன்வைத்ததாக கூறப்படும் “100-100” இடப் பங்கீடு மற்றும் அதிக இடங்களில் வெல்பவருக்கே முதலமைச்சர் என்ற நிபந்தனையை ஏற்றுக்கொண்டு தேர்தலை சந்திப்பதே புத்திசாலித்தனம் என்று அதிமுகவின் இரண்டாம் கட்டத் தலைவர்கள் எடப்பாடி பழனிசாமிக்கு கடும் அழுத்தம் கொடுத்து வருவதாக கூறப்படுகிறது. பாஜகவை மட்டும் நம்பி தேர்தலை சந்தித்தால், கட்சி மூன்றாவது இடத்திற்கு தள்ளப்படும் அபாயம் இருப்பதாகவும், அது அதிமுகவின் இருப்பையே கேள்விக்குறியாக்கும் என்றும் அவர்கள் எச்சரிக்கின்றனர்.
அதிமுகவின் முக்கிய பிரமுகர்கள் மற்றும் மாவட்ட செயலாளர்கள் மத்தியில் நிலவும் பிரதான கவலை என்னவென்றால், திமுக என்ற மாபெரும் சக்தியை வீழ்த்த ஒரு வலுவான வாக்கு வங்கி அவசியம் என்பதாகும். விஜய்யின் தமிழக வெற்றி கழகம் இளைஞர்கள் மற்றும் முதல்முறை வாக்காளர்களைத் தன்வசம் வைத்துள்ள நிலையில், அதிமுகவின் பாரம்பரிய வாக்கு வங்கியுடன் அது இணையும்போது மட்டுமே வெற்றி சாத்தியம் என்பது அவர்களின் வாதம். “முதலமைச்சர் பதவி இப்போது இல்லை என்றாலும், திமுகவை அதிகாரத்தில் இருந்து இறக்கிய திருப்தி நமக்கு கிடைக்கும்; மேலும் ஆளுங்கட்சி கூட்டணி என்ற பெயருடன் ஆட்சியில் பங்கு பெறலாம்” என்று எடப்பாடி பழனிசாமியை எச்சரித்து வருவதாக கூறப்படுகிறது.
இந்த உள்கட்சி அழுத்தங்களுக்கு மத்தியில், டெல்லி மேலிடமும் எடப்பாடி பழனிசாமிக்கு மறைமுகமாக சில சமிக்ஞைகளை அனுப்பி வருகிறது. தமிழகத்தில் திமுகவுக்கு மாற்றாக ஒரு மெகா கூட்டணியை உருவாக்க வேண்டும் என்பதில் உறுதியாக இருக்கும் பாஜக தலைமை, விஜய்யை அக்கூட்டணிக்குள் கொண்டு வர எடப்பாடி பழனிசாமி இறங்கி வர வேண்டும் என்று விரும்புவதாக தெரிகிறது. தனித்து நின்றால் வாக்குகள் சிதறி மீண்டும் திமுகவுக்கே சாதகமாகிவிடும் என்பதை சுட்டிக்காட்டும் டெல்லி பிரமுகர்கள், விஜய்யின் “50-50” ஃபார்முலாவை ஒரு கௌரவ பிரச்சினையாக பார்க்காமல், திமுகவை தோற்கடிக்க வேண்டும் என்ற ஒற்றை கொள்கையாக கருத வேண்டும் என்று எடப்பாடிக்கு அழுத்தம் கொடுத்து வருவதாகவும் கூறப்படுகிறது.
எடப்பாடி பழனிசாமியை பொறுத்தவரை, அவர் ஒரு இக்கட்டான நிலையில் உள்ளார். பல போராட்டங்களுக்கு பிறகு கட்சியை தனது முழுமையான கட்டுப்பாட்டிற்கு கொண்டு வந்த அவர், இப்போது முதலமைச்சர் வேட்பாளர் என்ற தகுதியை விட்டுக்கொடுக்க தயங்குகிறார். 100 இடங்களை மட்டும் பெற்றுக்கொண்டு தேர்தலை சந்திப்பது என்பது அதிமுகவின் செல்வாக்கை குறைத்துவிடும் என்றும், அது தொண்டர்கள் மத்தியில் ஒருவிதமான பின்னடைவை ஏற்படுத்தும் என்றும் அவர் கருதுகிறார். ஆனால், கட்சியின் இரண்டாம் கட்டத் தலைவர்கள், “பதவிக்காக பிடிவாதம் பிடித்தால் கட்சியே இல்லாமல் போய்விடும்” என்ற ரீதியில் பேசுவது அவரை ஆழமாக யோசிக்க வைத்துள்ளது.
விஜய்யின் டீலை ஏற்றுக்கொண்டால், அதிமுக கூட்டணியின் 2026 வெற்றி என்பது கிட்டத்தட்ட உறுதியாகிவிடும் என்று அரசியல் விமர்சகர்கள் கணிக்கின்றனர். அதிமுகவுக்கு இருக்கும் கிராமப்புற வாக்கு வங்கியும், விஜய்க்கு இருக்கும் நகர்ப்புற மற்றும் இளைஞர் செல்வாக்கும் இணையும்போது, அது தமிழக வரலாற்றில் ஒரு மிகப்பெரிய தேர்தல் வெற்றியை பதிவு செய்யும். இந்த டீலை ஒத்துக்கொண்டால் என்.டி.ஏ கூட்டணி மிக எளிதாக 200 இடங்களுக்கு மேல் அடிக்கும் என்பதால், எடப்பாடி பழனிசாமி தனது தனிப்பட்ட விருப்பங்களை ஒதுக்கி வைத்துவிட்டு, கட்சியின் எதிர்காலத்தைக் கருத்தில் கொண்டு முடிவெடுக்க வேண்டும் என்ற கோரிக்கை வலுத்து வருகிறது. கடந்த தேர்தலில் அமமுகவையும், ஓபிஎஸ்-ஐயும் அவர் கெளரவம் பார்க்காமல் கூட்டணியில் சேர்த்திருந்தால் ஆட்சியை பிடித்திருக்கலாம், அதே தவறை அவர் மீண்டும் செய்யக்கூடாது என்பது தான் அதிமுக தொண்டர்களின் எண்ணமாக உள்ளது.
மொத்தத்தில் எடப்பாடி பழனிசாமி என்ன செய்யப் போகிறார் என்பதுதான் இப்போது தமிழக அரசியலின் ‘கிளைமாக்ஸ்’. ஒருபுறம் கட்சியின் சீனியர் தலைவர்களின் அழுத்தம், மறுபுறம் டெல்லி மேலிடத்தின் கறாரான அறிவுறுத்தல், இன்னொரு பக்கம் விஜய்யின் உறுதியான நிலைப்பாடு என எடப்பாடி நாலாபுறமும் நெருக்கடிகளை சந்தித்து வருகிறார். வரும் நாட்களில் அவர் எடுக்கப்போகும் முடிவுதான் தமிழக அரசியலில் ஒரு புதிய அத்தியாயத்தை தொடங்குமா அல்லது பழைய நடைமுறையே நீடிக்குமா என்பதை தீர்மானிக்கும். எதுவாக இருந்தாலும், 2026 தேர்தல் என்பது எடப்பாடி பழனிசாமியின் அரசியல் சாணக்கியத்தனத்திற்கு ஒரு மிகப்பெரிய சோதனையாக அமையப்போகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
