2026 தமிழக சட்டமன்றத் தேர்தல் களம் தற்போது ஒரு மாபெரும் போர்க்களமாக மாறியுள்ளது. சமீபத்தில் வெளியாகியுள்ள பல்வேறு கருத்துக்கணிப்புகள் மற்றும் அரசியல் ஆய்வுகளின்படி, வரவிருக்கும் தேர்தலில் ஆளும் திமுகவுக்கும், புதிதாக களம் கண்டுள்ள நடிகர் விஜய்யின் தமிழக வெற்றிக் கழகத்திற்கும் இடையேதான் நேரடி போட்டி நிலவும் என தெரிகிறது. இருப்பினும், இந்த இருமுனை போட்டியின் இறுதியில் யாரும் எதிர்பாராத விதமாக அதிமுக பொதுச்செயலாளர் எடப்பாடி பழனிசாமி ஆட்சிக்கட்டிலில் அமர அதிக வாய்ப்புள்ளதாக பரபரப்புத் தகவல்கள் வெளியாகியுள்ளன.
தற்போதைய அரசியல் சூழலில், திமுகவின் வாக்கு வங்கியில் விஜய் ஒரு பெரிய ஓட்டையை போடுவார் என்று கணிக்கப்படுகிறது. குறிப்பாக, இளைஞர்கள், முதன்முறை வாக்காளர்கள், பெண்கள் மற்றும் ஆளும் கட்சி மீது அதிருப்தியில் உள்ளவர்களின் வாக்குகளை விஜய் அதிக அளவில் ஈர்ப்பார். திமுக கூட்டணி கட்சிகளின் வாக்குகளையும், நாம் தமிழர் கட்சியின் வாக்குகளையும் சூறையாடுகிறார். இவ்வாறு திமுகவின் வாக்குகள், அதன் கூட்டணி கட்சிகளின் வாக்குகள் பிரியும் போது, அது மறைமுகமாக அதிமுகவிற்கு சாதகமாக அமையும். விஜய் ஒருபுறம் திமுக வாக்குகளை பிரிப்பதாலும், மறுபுறம் திமுக தனது பலத்தை விஜய்யிடம் பறிகொடுப்பதாலும், இரு கட்சிகளுமே பெரும்பான்மைக்கு தேவையான இடங்களை பெறுவதில் சிக்கல் ஏற்படும்.
அதிமுகவைப் பொறுத்தவரை, அதன் பாரம்பரிய வாக்கு வங்கி சிதையாமல் அப்படியே இருப்பதாக கருதப்படுகிறது. திமுக மற்றும் தவெக ஆகிய கட்சிகள் ஒன்றுடன் ஒன்று மோதிக்கொண்டு வாக்குகளை சிதறடிக்கும் போது, அதிமுக தனது பலமான கூட்டணி கட்டமைப்பு மற்றும் தேர்தல் மேலாண்மை மூலம் அமைதியாக முன்னேறும். எடப்பாடி பழனிசாமி தலைமையிலான அதிமுக கூட்டணி, ஆளும் கட்சியின் மீதான அதிருப்தி அலை மற்றும் விஜய்யால் ஏற்படும் வாக்கு சிதறல் ஆகியவற்றை சரியாக பயன்படுத்தி கொண்டால், நூலிழையில் பெரும்பான்மையை பிடித்து ஆட்சி அமைக்க முடியும் என அரசியல் விமர்சகர்கள் கருதுகின்றனர்.
இந்தத் தேர்தலில் விஜய் ஒரு ‘கேம் சேஞ்சராக’ இருப்பார் என்பதில் ஐயமில்லை. அவர் விஜயகாந்த் போல சில தொகுதிகளில் மட்டும் வெல்லும் சக்தியாக இல்லாமல், மாநிலம் முழுவதும் ஒரு குறிப்பிடத்தக்க வாக்கு சதவீதத்தை பெறுவார். தவெக கட்சியின் சர்வேகளின்படி, அவர்கள் 30% வாக்கு சதவீதத்தை நெருங்குவதாக கூறப்படுகிறது. இது உண்மையாகும்பட்சத்தில், திமுக மற்றும் அதிமுக ஆகிய இரு திராவிட கட்சிகளின் கோட்டைகளும் பலவீனமடையும். ஆனால், ஆட்சியை தீர்மானிக்கும் ‘மேஜிக் நம்பரை’ யார் எட்டிப்பிடிப்பார்கள் என்பதில் தான் சிக்கல் உள்ளது.
அரசியல் சதுரங்கத்தில் எப்போதுமே இரண்டு பேர் தீவிரமாக மோதிக்கொள்ளும் போது, மூன்றாவது நபர் பலன் பெறுவது வழக்கம். அந்த வகையில், திமுக – தவெக மோதலை அதிமுக தனக்கான ஒரு வாய்ப்பாக பார்க்கிறது. 2026-ல் திமுக எதிர்ப்பு வாக்குகள் மற்றும் ஆளும் கட்சிக்கு மாற்றாக பார்க்கப்படும் புதிய கட்சி வாக்குகள் என பலமுனை போட்டிகள் உருவாகும் போது, அதிமுகவின் ஒருங்கிணைந்த வாக்குகள் அவர்களை வெற்றிப்பாதைக்கு அழைத்து செல்லக்கூடும். இது தமிழக வரலாற்றில் இதுவரை இல்லாத ஒரு மும்முனை போட்டியின் உச்சகட்டமாக இருக்கும்.
இறுதியாக, 2026 தேர்தல் என்பது வெறும் ஒரு ஆட்சி மாற்றம் மட்டுமல்ல, அது தமிழக அரசியலில் ஒரு புதிய துருவத்தை உருவாக்கும் தேர்தலாகும். எடப்பாடி பழனிசாமி மீண்டும் முதலமைச்சராக பதவியேற்பாரா அல்லது கருத்துக்கணிப்புகளை தவிடுபொடியாக்கி திமுகவோ அல்லது தவெகவோ சாதனை படைக்குமா என்பது இன்னும் சில மாதங்களில் தெரிந்துவிடும்.
எது எப்படியோ, தற்போதைய நிலவரப்படி அதிமுக முகாமில் உற்சாகமும், மற்ற இரு முகாம்களிலும் கடும் சவாலும் நிலவுவது மட்டும் உறுதி.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
