2026 தமிழக சட்டமன்ற தேர்தல் களம் தற்போதே சூடுபிடிக்க தொடங்கிவிட்டது. குறிப்பாக, ஆளுங்கட்சியான திமுக மற்றும் அதன் நீண்டகால கூட்டாளியான காங்கிரஸ் இடையே நிலவும் அதிகாரப் பகிர்வு குறித்த மோதல், வரும் தேர்தலில் பெரும் திருப்புமுனையாக அமையும் என எதிர்பார்க்கப்படுகிறது. 1967 முதல் தமிழகத்தை திராவிட கட்சிகளே தனிப்பெரும்பான்மையுடன் ஆண்டு வரும் நிலையில், இந்த முறை காங்கிரஸ் கட்சி வெறும் இடங்களை மட்டும் கேட்காமல், அமைச்சரவையில் பங்கையும் கேட்க தொடங்கியுள்ளது. இது திமுக தலைமைக்கு ஒரு தர்மசங்கடமான சூழலை உருவாக்கியுள்ளது. முதல்வர் ஸ்டாலின் கூட்டணி ஆட்சிக்கு தமிழகத்தில் இடமில்லை என்று திட்டவட்டமாகத் தெரிவித்துள்ள போதிலும், காங்கிரஸ் எம்.பி. மாணிக்கம் தாகூர் போன்றவர்கள் 2006-ல் செய்த தவறை மீண்டும் செய்ய மாட்டோம்” என பகிரங்கமாக பேசி வருகின்றனர்.
தமிழக அரசியலில் 2006-ம் ஆண்டு தேர்தல் ஒரு முக்கியமான பாடம். அப்போது திமுக 96 இடங்களில் மட்டுமே வெற்றி பெற்று, ஆட்சியமைக்க காங்கிரஸின் 34 எம்.எல்.ஏ-க்களின் ஆதரவை வெளியிலிருந்து பெற்றது. அப்போதே காங்கிரஸ் அமைச்சரவையில் பங்கு கேட்டிருக்க வேண்டும் என்றும், அதை செய்யாதது அக்கட்சி செய்த வரலாற்று பிழை என்றும் தற்போது காங்கிரஸ் நிர்வாகிகள் கருதுகின்றனர். இந்த முறை காங்கிரஸ் தரப்பில் சுமார் 40 முதல் 50 தொகுதிகள் வரை கேட்கப்படுவதாகவும், அப்படி ஒதுக்கப்பட்டு திமுகவின் பலம் குறைந்தால், நிச்சயம் கூட்டணி ஆட்சி அமைத்தே தீர வேண்டும் என்ற கட்டாயம் ஸ்டாலினுக்கு ஏற்படும். 2021-ல் திமுக 133 இடங்களில் வென்றது; ஆனால் இந்த முறை நிலவும் ஆட்சி எதிர்ப்பு அலை மற்றும் புதிய அரசியல் வரவுகளால் அந்த எண்ணிக்கை குறையும் பட்சத்தில், காங்கிரஸ் தனது “கிங் மேக்கர்” அந்தஸ்தை பயன்படுத்தி கொள்ள துடிக்கிறது.
கூட்டணி ஆட்சி என்பது திமுகவின் மரபுக்கு நேர் எதிரானது. கூட்டணி ஆட்சி என்ற பேச்சுக்கே இடமில்லை என்றும், இது சிலரால் திட்டமிட்டு பரப்பப்படும் சதி என்றும் ஸ்டாலின் சமீபத்தில் குறிப்பிட்டார். ஆனால், காங்கிரஸ் தரப்பிலோ “மக்களே முடிவெடுப்பார்கள்” என்ற பதில் வந்துள்ளது. திமுக தற்போதே 160 முதல் 170 தொகுதிகளில் போட்டியிட விரும்புவதாகவும், அதன் மூலம் 118 என்ற மேஜிக் எண்ணை தாண்டி தனிப்பெரும்பான்மை பெற துடிப்பதாகவும் செய்திகள் வருகின்றன. ஆனால், காங்கிரஸுக்கு அதிக இடங்களை ஒதுக்கினால் திமுகவின் வெற்றி வாய்ப்பு குறையக்கூடும் என்பதும், இடங்களை குறைத்தால் காங்கிரஸ் அதிருப்தி அடைந்து கூட்டணியை விட்டு வெளியேற கூடும் என்பதும் திமுகவுக்கு முன்னால் இருக்கும் இரட்டை சவால்கள்.
விஜய்யின் தமிழக வெற்றி கழகம் இந்த தேர்தலில் கணிசமான வாக்குகளை பிரிக்கும் என எதிர்பார்க்கப்படுகிறது. இது திமுகவின் வெற்றியை 118 இடங்களுக்கு கீழ் கொண்டு வரக்கூடும். அப்படி ஒரு சூழல் அமைந்தால், 2006-ல் இருந்தது போல வெளியிலிருந்து ஆதரவு என்ற நிலைக்கு காங்கிரஸ் இறங்கி வரும் என்று சொல்ல முடியாது. அமைச்சரவையில் பங்கு கிடைத்தால் மட்டுமே ஆதரவு என்ற பிடிவாதத்தில் காங்கிரஸ் இருந்தால், தமிழகம் முதல்முறையாக ஒரு கூட்டணி ஆட்சியை பார்க்க நேரிடும். இந்த இழுபறி நீடித்தால் அது கூட்டணிக்குள் விரிசலை ஏற்படுத்தி, தேர்தலில் வாக்குகளை சிதறச் செய்யும்; அது இறுதியில் எதிர்க்கட்சிகளுக்கே சாதகமாக முடியும்.
காங்கிரஸ் கட்சியை பொறுத்தவரை, அவர்கள் தமிழகத்தில் தங்கள் செல்வாக்கை மீண்டும் நிலைநாட்ட இதுவே கடைசி வாய்ப்பாக கருதுகின்றனர். ராகுல் காந்தி மற்றும் ஸ்டாலின் இடையிலான நட்பு எவ்வளவு வலுவாக இருந்தாலும், உள்ளூர் காங்கிரஸ் நிர்வாகிகள் ஆட்சியில் பங்கு பெறுவதில் மிக உறுதியாக இருக்கின்றனர். “யார் ஆள வேண்டும் என்பதை மக்கள் முடிவு செய்வார்கள், தலைவர்கள் அல்ல” என்று காங்கிரஸ் தலைவர்கள் கூறி வருவது, திமுகவின் மேலாதிக்கத்திற்கு விடுக்கப்படும் எச்சரிக்கையாகவே பார்க்கப்படுகிறது. ஒருவேளை திமுக 118 இடங்களுக்கு கீழ் தள்ளப்பட்டால், காங்கிரஸ் தனது காய்நகர்த்தல்களை மிகவும் கவனமாக செய்யும். இது ஸ்டாலினின் அரசியல் சாதுர்யத்திற்கு விடப்பட்ட மிகப்பெரிய சோதனையாகும்.
இறுதியாக, 2026 தேர்தலின் முடிவு என்பது வெறும் யார் வெற்றி பெறுவார்கள் என்பது மட்டுமல்ல, தமிழக அரசியல் சித்தாந்தமான தனிப்பட்ட திராவிட ஆட்சி தொடருமா அல்லது கூட்டணி ஆட்சி என்ற கலாச்சாரம் காலூன்றுமா என்பதையும் தீர்மானிக்கும். பிப்ரவரி 22-ம் தேதி முதல் தொடங்கவுள்ள அதிகாரப்பூர்வ தொகுதி பங்கீட்டு பேச்சுவார்த்தையில், திமுக இறங்கி வருமா அல்லது காங்கிரஸ் தனது பிடிவாதத்தை தளர்த்திக் கொள்ளுமா என்பது தெரிந்துவிடும். 118 இடங்களில் திமுக வெல்லவில்லை என்றால், தமிழக அரசியல் வரலாற்றில் ஒரு புதிய அத்தியாயம் தொடங்கும் என்பதில் சந்தேகமில்லை. ஆட்சி அமைக்க காங்கிரஸின் தயவு தேவைப்படும்போது, ஸ்டாலினின் திராவிட மாடல் ஆட்சியில் அமைச்சரவை இடங்களை மற்ற கட்சிகளுக்குப் பங்கிட்டு கொடுப்பதைத் தவிர வேறு வழியே இருக்காது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
