தமிழக அரசியலில் 2026 சட்டமன்ற தேர்தலை நோக்கிய நகர்வுகள் தற்போதே உச்சகட்டத்தை எட்டியுள்ள நிலையில், திமுக மற்றும் காங்கிரஸ் இடையிலான பல ஆண்டுகால கூட்டணியில் இதுவரை இல்லாத அளவிற்கு விரிசல் ஏற்பட்டுள்ளதாக தெரிகிறது. குறிப்பாக, தமிழகத்தில் காங்கிரஸ் கட்சிக்கு சொல்லிக்கொள்ளும் அளவிற்கு தனிப்பட்ட வாக்கு வங்கி இல்லை என்பதும், அக்கட்சிக்கு இருந்த சிறுபான்மையினரின் வாக்குகளை நடிகர் விஜய்யின் தமிழக வெற்றி கழகம் கணிசமாக பிரித்து சென்றுவிட்டதும் திமுக தலைமையை கவலையடையச் செய்துள்ளது.
ஒரு தேசியக் கட்சியாக பாஜகவை எதிர்க்க டெல்லி அளவில் காங்கிரஸ் தேவைப்பட்டாலும், தமிழகத்தின் தற்போதைய களநிலவரப்படி அக்கட்சியைச் சுமப்பது திமுகவிற்கு பாரமாகவே இருக்கும் என்ற எண்ணம் ஆளுங்கட்சி வட்டாரத்தில் மேலோங்கியுள்ளது.
கடந்த தேர்தல்களில் காங்கிரஸ் கட்சிக்கு ஒதுக்கப்பட்ட தொகுதிகளில் பலவற்றில் அவர்கள் வெற்றி பெற்றாலும், அந்த வெற்றி திமுகவின் உழைப்பாலும் அதன் வாக்கு வங்கியாலுமே சாத்தியமானது என்ற கருத்தை திமுகவின் இரண்டாம் கட்டத் தலைவர்கள் தொடர்ந்து வலியுறுத்தி வருகின்றனர்.
காங்கிரஸிற்கு ஒருவேளை 25 முதல் 30 தொகுதிகள் வரை ஒதுக்கினால், அது மற்ற கூட்டணி கட்சிகளான விசிக மற்றும் கம்யூனிஸ்ட் கட்சிகளிடையே அதிருப்தியை ஏற்படுத்தும். இதனால், காங்கிரஸை ஒரு சுமையாக கருதும் திமுக, வரும் தேர்தலில் அவர்களைக் கழட்டி விடவும் தயங்காது என்ற பேச்சுகள் அரசியல் வட்டாரத்தில் பலமாக அடிபடுகின்றன.
காங்கிரஸிற்கு ஒதுக்கப்படும் அந்த 25 இடங்களை, தற்போது கூட்டணியில் இல்லாத தேமுதிக மற்றும் பாமக போன்ற கட்சிகளுக்கு பிரித்துக் கொடுப்பதன் மூலம் வட தமிழகம் மற்றும் கொங்கு மண்டலங்களில் தனது பலத்தை அதிகரிக்க முதலமைச்சர் ஸ்டாலின் திட்டமிட்டுள்ளதாக தெரிகிறது. தேமுதிகவிற்கு 12 இடங்களை கொடுத்து அவர்களை உள்ளே இழுப்பதன் மூலம், அந்த வாக்குகள் அதிமுகவிற்கு செல்வதைத் தடுக்க முடியும். அதேபோல், பாமகவு13 சீட் கொடுத்து கூட்டணிக்குள் கொண்டு வந்தால், வன்னியர் வாக்குகளை தக்கவைக்கலாம் என்பது திமுகவின் கணக்காக உள்ளது. காங்கிரஸ் போன்ற ‘சீட்’களை மட்டுமே குறிவைக்கும் கட்சிகளை விட, தங்களுக்கு சாதகமான வாக்கு வங்கியை வைத்திருக்கும் கட்சிகளே மேல் என்ற முடிவிற்கு திமுக வந்துள்ளது.
மறுபுறம், காங்கிரஸின் நிலைமை தற்போது மிகவும் பரிதாபமாக மாறியுள்ளது. திமுக கைவிட்டால் அடுத்து எங்கே செல்வது என்ற குழப்பத்தில் அக்கட்சி தலைவர்கள் ஆழ்ந்துள்ளனர். விஜய் ஒரு தனித்துவமான அரசியலை முன்னெடுக்க விரும்புவதால், பழைய காங்கிரஸ் முகங்களை சேர்த்துக்கொள்வது தனது ‘புதிய அரசியல்’ என்ற பிம்பத்திற்கு பாதிப்பை ஏற்படுத்தும் என்று அவர் நினைக்கலாம். விஜய்யும் காங்கிரஸை சேர்த்துக்கொள்ள மறுக்கும் பட்சத்தில், தமிழகத்தில் காங்கிரஸின் நிலைமை என்பது ‘பூஜ்யம்’ என்ற அளவிலேயே போய் முடியும் என்ற அச்சம் தொண்டர்களிடையே பரவியுள்ளது.
தமிழக காங்கிரஸ் கமிட்டிக்குள் நிலவும் உட்கட்சி பூசல்களும், ராகுல் காந்தி – பிரியங்கா காந்தி ஆதரவாளர்களுக்கிடையே நிலவும் பனிப்போரும் திமுகவிற்கு ஒரு வாய்ப்பாக அமைந்துவிட்டது. டெல்லி மேலிடத்திற்கு தமிழக காங்கிரஸின் உண்மையான நிலவரத்தை சொல்லி, குறைந்த தொகுதிகளில் போட்டியிட சொல்லி அழுத்தம் கொடுக்க திமுக முடிவு செய்துள்ளது. “இவ்வளவு சீட்கள் தான் தருவோம், விருப்பமிருந்தால் இருங்கள், இல்லையென்றால் வெளியேறுங்கள்” என்ற ரீதியில் திமுக கறாரான அணுகுமுறையை எடுக்க தயாராகிவிட்டது. இது காங்கிரஸை ஒரு இக்கட்டான நிலைக்கு தள்ளியுள்ளதுடன், கட்சியின் இருப்பையே கேள்விக்குறியாக்கியுள்ளது.
இறுதியாக, 2026 தேர்தல் என்பது தமிழகத்தின் பாரம்பரிய கூட்டணிகளில் ஒரு மாபெரும் மாற்றத்தை ஏற்படுத்தும் ஆண்டாக அமையும் என்பதில் மாற்று கருத்தில்லை. காங்கிரஸ் போன்ற கட்சிகள் தங்களது வாக்கு சதவீதத்தை உயர்த்த எவ்வித முயற்சியும் எடுக்காமல், திராவிட கட்சிகளின் தோளில் ஏறி வெற்றி பெற நினைக்கும் காலாவதியான உத்தியை இனி திமுக அனுமதிக்க போவதில்லை. ஒருவேளை காங்கிரஸ் கூட்டணியிலிருந்து வெளியேற்றப்பட்டால், அது தமிழகத்தில் அக்கட்சியின் அஸ்தமனமாகக்கூட அமையலாம். ஸ்டாலினின் இந்த அதிரடி திட்டமானது, வரும் ஜனவரி அல்லது பிப்ரவரி மாதங்களில் கூட்டணி பேச்சுவார்த்தைகள் சூடுபிடிக்கும்போது முழுமையாக வெளிச்சத்திற்கு வரும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
