கேரளாவில் நடந்த உள்ளாட்சி தேர்தலில் காங்கிரஸ் தலைமையிலான ஐக்கிய ஜனநாயக முன்னணி அபார வெற்றி பெற்றிருப்பது, தேசிய அளவிலும், குறிப்பாக தமிழ்நாட்டிலும் அரசியல் விவாதங்களை எழுப்பியுள்ளது. நீண்டகாலமாக மாநில மற்றும் தேசிய அரசியலில் சறுக்கலை சந்தித்து வந்த காங்கிரஸ் கட்சிக்கு இந்த வெற்றி பெரும் நம்பிக்கையை கொடுத்துள்ளது. இந்த வெற்றி, தமிழ்நாட்டில் கூட்டணியில் உள்ள திமுகவிடம் அதிக இடங்களை கோருவதற்கு காங்கிரஸுக்கு ஒரு வலுவான பேர சக்தியை அளிக்குமா என்ற கேள்வி தற்போது எழுந்துள்ளது.
காங்கிரஸின் இந்த வெற்றி, நடிகர் விஜய்யின் ‘தமிழக வெற்றிக் கழகம்’ குறித்தும் சில சிந்தனைகளை தூண்டியிருக்கலாம். திராவிட கட்சிகளுக்கு மாற்றாக தனித்து நின்று வெற்றிபெற முடியும் என்று விஜய் கருதும் நிலையில், தேர்தல் களத்தில் வலுவான கூட்டணியின் கீழ் ஒரு தேசியக் கட்சி மீண்டும் எழுச்சி பெறுவது, தனித்து போட்டியிடும் உத்தியின் சாத்தியக்கூறுகளை மறுபரிசீலனை செய்ய வைக்கலாம். கேரளாவில், இடதுசாரி கூட்டணியான LDF-ஐ எதிர்த்து UDF பெற்ற வெற்றி, காங்கிரஸ் உடன் கூட்டணி வைக்கும் அவசியத்தை விஜய்க்கும் அவர் கட்சிக்கும் மறைமுகமாக உணர்த்தும் ஒரு செய்தியாக கருதப்படுகிறது.
கேரள வெற்றியை முன்வைத்து, தமிழ்நாட்டின் கூட்டணிப் பேச்சுவார்த்தையில் திமுகவிடம் காங்கிரஸ் தனது கோரிக்கைகளை அதிகரிக்க வாய்ப்புள்ளது. கடந்த காலங்களில், பீகார் போன்ற வட மாநில தேர்தல்களில் காங்கிரஸ் தோல்வியடைந்தபோது, “தேசிய அளவில் செல்வாக்கு குறைந்துவிட்டது” என்ற விமர்சனம் திமுகவின் தரப்பிலிருந்து எழுவதுண்டு. ஆனால், இப்போது கேரளாவில் கிடைத்திருக்கும் இந்த மகத்தான வெற்றியை சுட்டிக்காட்டி, ‘தாங்கள் வலுவான அடித்தளத்தைக் கொண்டிருப்பதனால், கூட்டணியில் அதிக முக்கியத்துவம் அளிக்கப்பட வேண்டும்’ என்று காங்கிரஸ் வலியுறுத்தலாம்.
“பீகாரில் தோற்றபோது சொன்னீர்களே, இப்போது கேரளாவில் நாங்கள் ஜெயித்திருக்கிறோம், இதற்கு என்ன சொல்கிறீர்கள்?” என்று திமுகவை நோக்கி காங்கிரஸ் தொண்டர்கள் மற்றும் தலைவர்கள் ‘கெத்து’ காட்டும் கேள்வியை எழுப்பி வருவதாக அரசியல் வட்டாரங்கள் தெரிவிக்கின்றன. இது வெறும் உணர்வுபூர்வமான கேள்வியாக இல்லாமல், எதிர்வரும் தேர்தலில் தங்களுக்கு அதிக தொகுதிகள் ஒதுக்கப்பட வேண்டும் என்ற அரசியல் அழுத்தத்தை உருவாக்கும் ஒரு உத்தியாகும்.
பொதுவாகவே, மாநில கட்சிகள் தேசிய கட்சிகளின் பலவீனத்தை பயன்படுத்தி தங்கள் ஆதிக்கத்தை நிலைநாட்ட முயலும். ஆனால், ஏற்கனவே தெலுங்கானா, கர்நாடகாவில் ஆளும் கட்சியாக இருக்கும் காங்கிரஸ், கேரளாவிலும் தற்போது வெற்றி பெற்றுள்ளதால், தென் மாநிலங்களில் காங்கிரஸ் மீண்டும் வலுப்பெறுவது, இந்திய கூட்டணிக்குள் சமநிலையை கொண்டு வர உதவும். காங்கிரஸின் இந்த புதிய உத்வேகம், தமிழ்நாட்டில் உள்ள கூட்டணி பங்காளியான திமுக, வரவிருக்கும் தேர்தலை அணுகும் விதத்தில் நிச்சயம் ஒரு மாற்றத்தை ஏற்படுத்தும்.
எனவே, கேரள உள்ளாட்சி தேர்தல் வெற்றி வெறும் மாநில செய்தியாக முடிந்துவிடாமல், தமிழ்நாட்டின் கூட்டணியை பேச்சுவார்த்தைகளிலும், விஜய்யின் அரசியல் வியூகங்களிலும், மேலும் திமுகவின் எதிர்வினையிலும் எதிரொலிக்கும் ஒரு முக்கிய நிகழ்வாக மாறி நிற்கிறது. இந்த வெற்றி, தேசிய அரசியலில் காங்கிரஸ் தன்னுடைய பேர சக்தியை மீண்டும் நிலைநாட்டவும், தமிழ்நாட்டில் தனது உரிமையை அழுத்தமாக பெறவும் ஒரு வலுவான வாய்ப்பை வழங்கியுள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
