தமிழக அரசியல் வரலாற்றில் 2026 சட்டமன்ற தேர்தல் என்பது தேசிய கட்சியான காங்கிரஸிற்கு ஒரு வாழ்வா சாவா போராட்டமாக மாறியுள்ளது. “தமிழகத்தில் காங்கிரஸ் இல்லாத மாநிலமாக மாறுமா?” என்ற கேள்வி அரசியல் நோக்கர்கள் மத்தியிலும் எழுந்துள்ளது. ஒரு காலத்தில் தமிழகத்தை ஆண்ட பேரியக்கம், மத்தியில் அதிக ஆண்டுகள் ஆட்சி செய்த கட்சி, இன்று ஒரு மாநில கட்சியின் நிழலில் தஞ்சம் புகுந்து கொண்டு, ஒவ்வொரு தேர்தலுக்கும் தொகுதி பங்கீட்டிற்காக பேரம் பேசும் நிலைக்கு தள்ளப்பட்டுள்ளது. இந்த நிலை தொடர்ந்தால், வரும் தேர்தலில் காங்கிரஸ் கட்சி தனது இருப்பையே இழந்துவிடும் அபாயம் உள்ளது என்பதை அக்கட்சியின் மேலிடம் இன்னும் உணரவில்லை என்பதுதான் வேதனை.
திமுக கூட்டணிக்குள் இருந்துகொண்டே, அக்கட்சியின் நிர்வாகத்திற்கும் கொள்கைகளுக்கும் எதிராக காங்கிரஸ் தலைவர்கள் கொடுக்கும் “குடைச்சல்” திமுக தொண்டர்களிடையே பெரும் கொந்தளிப்பை ஏற்படுத்தியுள்ளது. கூட்டணி தர்மத்தை மீறி பொதுவெளியில் விமர்சனம் செய்வது, ஆட்சி அதிகாரத்தில் பங்கு கேட்பது போன்ற செயல்கள் திமுகவின் அடிமட்ட தொண்டர்களை எரிச்சலடைய செய்துள்ளது. தங்களது ரத்தத்தை சிந்தி உழைக்கும் திமுக தொண்டர்கள், தங்களை மதிக்காத ஒரு கூட்டணி கட்சிக்கு தேர்தல் களத்தில் எப்படி முழுமனதுடன் வேலை செய்வார்கள்? இத்தகைய விரிசல் நீடித்தால், தேர்தல் நேரத்தில் திமுகவின் மறைமுக பழிவாங்கலுக்கு காங்கிரஸ் ஆளாக நேரிடும் என்பதில் ஐயமில்லை.
வரலாற்றை திரும்பிப் பார்த்தால், 2011 சட்டமன்ற தேர்தலில் திமுகவை மிரட்டி 63 தொகுதிகளை காங்கிரஸ் வாங்கியது இன்னும் பலருக்கு நினைவிருக்கும். அன்று டெல்லி மேலிடத்தின் செல்வாக்கை பயன்படுத்தி திமுகவை மண்டியிட செய்த காங்கிரஸின் முடிவு, இறுதியில் படுதோல்வியிலேயே முடிந்தது. போட்டியிட்ட 63 இடங்களில் வெறும் 5 இடங்களில் மட்டுமே வெற்றி பெற முடிந்தது. அந்த தேர்தல் திமுகவையும் ஆட்சியில் இருந்து அகற்றியது மட்டுமல்லாமல், காங்கிரஸின் செல்வாக்கையும் தமிழகத்தில் அதலபாதாளத்திற்கு தள்ளியது. மிரட்டி வாங்கும் இடங்கள் வெற்றியை தராது என்பதற்கு அந்த தேர்தலே ஒரு சாட்சியாக அமைந்தது.
அரசியல் களத்தில் “கூட்டணிக்குள் வைத்துக்கொண்டே பழிவாங்கும்” நுட்பமான கலை திராவிட கட்சிகளுக்குக் கைவந்த கலை. ஒரு கட்சி தன்னை மீறி ஆதிக்கம் செலுத்த நினைத்தால், அந்த கட்சியின் தொகுதிகளில் மறைமுகமாக வேலை செய்து அவர்களை தோற்கடிப்பதில் திராவிட கட்சிகள் வல்லமை படைத்தவை. இதுகூட தெரியாமல் இன்னும் பேரம் பேசிக் கொண்டிருக்கும் காங்கிரஸ் தலைவர்கள், தமிழக அரசியலின் எதார்த்தத்தை புரிந்து கொள்ளவில்லை என்றே சொல்ல வேண்டும். தங்களது பலத்தை மீறி அதிக இடங்களை கேட்பது, இறுதியில் இருக்கும் செல்வாக்கையும் இழக்கவே வழிவகுக்கும்.
தமிழகத்தில் காங்கிரஸ் கட்சி மீண்டும் வளர வேண்டுமென்றால், அது மற்ற கட்சிகளின் தயவின்றி தனித்து நின்று தனது பலத்தை நிரூபிக்க வேண்டும். ஆனால், பல ஆண்டுகளாக திமுகவின் தோளில் ஏறிப் பயணம் செய்வதால், காங்கிரஸின் தனித்துவமான வாக்கு வங்கி என்பது தற்போது அடையாளம் தெரியாமல் அழிந்துவிட்டது. “ஒன்று பேரம் பேசாமல் கொடுக்கப்படும் இடங்களை ஏற்றுக்கொண்டு கூட்டணிக்குள் இருங்கள், அல்லது துணிச்சலாக வெளியேறி தனித்து போட்டியிட்டு உங்கள் பலத்தைக் காட்டுங்கள்” என்பதுதான் அரசியல் விமர்சகர்களின் அறிவுரையாக உள்ளது. இரண்டையும் செய்யாமல் “ரெண்டுங்கெட்டான்” நிலையில் இருப்பது கட்சியின் அழிவிற்கே வித்திடும்.
2026 தேர்தல் என்பது தமிழக அரசியலில் ஒரு பெரிய சுத்திகரிப்பை ஏற்படுத்தும் என்று எதிர்பார்க்கப்படுகிறது. இதில் பலவீனமான கட்சிகளும், கொள்கை பிடிப்பற்ற கூட்டணிகளும் காணாமல் போக வாய்ப்புள்ளது. காங்கிரஸ் கட்சி இப்போதும் விழித்துக்கொள்ளவில்லை என்றால், வரும் தேர்தலில் அவர்கள் பெரும் பின்னடைவை சந்திப்பார்கள். திமுகவின் தயவை மட்டுமே நம்பியிருக்கும் ஒரு கட்சி, அந்த தயவு விலகும் போது நடுத்தெருவில் நிற்க வேண்டிய நிலை வரும். எனவே, மிரட்டல் அரசியலை விடுத்து, எதார்த்தமான அரசியலை முன்னெடுப்பதே காங்கிரஸிற்கு எஞ்சியிருக்கும் ஒரே வழி.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
