கரூரில் நடைபெற்ற மக்கள் சந்திப்பு நிகழ்ச்சியில் முதலமைச்சர் விஜய், தனது அரசின் மீதான விமர்சனங்களுக்குப் பதிலடி கொடுக்கும் வகையில் மிகுந்த ஆவேசத்துடன் உரையாற்றினார். கரூரில் நடைபெற்ற துயரச் சம்பவத்தில் தனது குடும்ப உறவுகளான தொண்டர்களை இழந்ததில் தான் மிகுந்த வேதனை அடைந்திருப்பதாக குறிப்பிட்ட அவர், அந்த சூழலிலும் தன்னைச் சிலர் ஏளனம் செய்ததை வன்மையாகக் கண்டித்தார்.
பெரம்பலூர் கூட்டத்தின் போது பாதுகாப்பு எச்சரிக்கை விடுத்த காவல்துறை, கரூரில் ஏன் அதேபோல் எச்சரிக்கவில்லை என்று கேள்வி எழுப்பிய அவர், காவல்துறை நினைத்திருந்தால் அந்த நெரிசலை தவிர்த்திருக்க முடியும் என்று குற்றம் சாட்டினார். தான் ஓடி ஒளிந்துவிட்டதாகப் பொய்யான பழிகளைச் சுமத்தியவர்களுக்குத் தனது கடுமையான கண்டனங்களைப் பதிவு செய்த அவர், இந்தத் துயரத்திலும் ஆதாயம் தேடும் எதிர்க்கட்சிகளின் செயல்களைச் சாடினார்.
பணத்தை விட மக்கள் தான் முக்கியம் என்பதை மீண்டும் வலியுறுத்திய விஜய், “பணமா ஜனமா என்று கேட்டால் ஜனம் தான்” என்று கெத்தாகப் பதிலளித்தார். தேர்தலில் பணம் கொடுக்காமல் வெற்றி பெற்ற கலாச்சாரத்தை உருவாக்கியிருப்பதாகவும், தமக்குக் குதிரை, கழுதை பேரமெல்லாம் தேவையில்லை என்றும் அவர் குறிப்பிட்டார்.
மேலும், ஊழல் மற்றும் லஞ்சத்திற்கு எதிராகத் தனது அரசு உறுதியாகச் செயல்பட்டு வருவதைச் சுட்டிக்காட்டிய அவர், மக்கள் இப்போது அரசு அலுவலகங்களில் வேலைகள் விரைவாகவும், லஞ்சமின்றியும் நடப்பதாகப் பாராட்டுவதாகப் பெருமிதத்துடன் தெரிவித்தார். தனது ஆட்சியைப் பற்றி டிசைன் டிசைனாகக் குறைகளைச் சொல்லும் எதிர்க்கட்சியினருக்கு, தம்மால் வெளிப்படையாகப் பேச முடிவது போல் அவர்களால் பேச முடியாது என்று அவர் சவால் விடுத்தார்.
மேலும் ஒருத்தர் வெளிநாட்டுக்கு ஓடிவிட்டார். உடனே ஸ்டாலின் சார் என நினைக்காதீங்க… எனக்கு ஸ்டாலின் சார் மீது தனிப்பாசம் உண்டு. வேற ஒருத்தர் சிகிச்சைக்காக சிங்கப்பூர் போனாரே… அத சொன்னேன். தமிழ்நாடு மக்களே உங்கள் அரசு உங்களுக்காக உழைக்கும். அடிப்படை உரிமைகளை நிறைவேற்ற வேண்டும். இந்த தீய சக்தி நம்மைப் பார்த்து வாஷிங் மிஷன், சோபா மாடல் என விமர்சிக்கிறார்கள்.
கடந்த கால ஆட்சிகளைச் சாடிய விஜய், ‘பார்ட்டி ஃபண்ட்’ என்ற பெயரில் அனைத்துத் துறைகளிலும் இரு கட்சிகளும் மாறி மாறி ஊழல் செய்துள்ளதாகக் குற்றம் சாட்டினார். சட்டமன்றத்தில் ‘பார்ட்டி ஃபண்ட்’ என்று குறிப்பிட்டாலே எதிர்க்கட்சியினர் அச்சத்தில் ஓட்டம் எடுப்பதாகக் கிண்டல் செய்த அவர், சென்னையில் பாலம் கட்டும் டெண்டரில் ஊழல் நடந்திருப்பதைச் சுட்டிக்காட்டினார்.
மேகதாது அணை விவகாரத்தில் எதிர்க்கட்சிகள் எழுப்பும் கேள்விகளுக்குப் பதிலளித்த அவர், அணை விவகாரத்தில் உச்ச நீதிமன்றம் நிராகரித்த போது யார் ஆட்சியில் இருந்தார்கள் என்பதை நினைவூட்டினார். வெறும் பேச்சோடு நின்று மக்களை நடுத்தெருவில் விட்டுவிடுவதே அவர்களது வாடிக்கை என்று விமர்சித்த அவர், தனது அரசு பணிகளை முடிப்பதில் மட்டுமே கவனம் செலுத்துவதாகக் குறிப்பிட்டார்.
நிர்வாக ரீதியாகத் தான் எடுத்து வரும் நடவடிக்கைகளை விளக்கிய முதலமைச்சர், எல்.என்.டி நிறுவனத்துடன் போடப்பட்டுள்ள ஒப்பந்தத்தின் மூலம் 8,000 பேருக்கு வேலைவாய்ப்பு கிடைக்கும் என்று அறிவித்தார். குறுவை சாகுபடிக்காகச் சிறப்புத் தொகுப்பை அறிவித்துள்ளதாகக் கூறிய அவர், விவசாயிகளுடன் அரசு உறுதுணையாக நிற்கும் என்று உறுதி அளித்தார். பெண்களின் பாதுகாப்பிற்காகச் ‘சிங்கப் பெண்’ திட்டம் செயல்படுத்தப்படும் என்றும், அண்ணா பிறந்த நாளில் ‘தாய்மாமன் தங்க மோதிரம்’ திட்டம் அறிமுகப்படுத்தப்படும் என்றும் அவர் அறிவித்தார். தான் வெறும் ‘ரீல்’ தாய்மாமன் அல்ல, ‘ரியல்’ தாய்மாமன் என்பதைத் தனது செயல்கள் நிரூபிக்கும் என்று அவர் கூறினார்.
தமிழகத்தின் உரிமைகளைப் பறிக்க நினைக்கும் எந்தச் சக்தியையும் ஏற்க முடியாது என்று எச்சரித்த விஜய், மத்திய அரசின் தொகுதி மறுவரையறை முயற்சியையும் கடுமையாக எதிர்த்தார். எதிர்க்கட்சிகளான திமுக மற்றும் அதிமுக ஆகிய இரு கட்சிகளையும் ‘கூட்டுக்களவாணிகள்’ என்று சாடிய அவர், அந்தத் தீய சக்திகளை இடைத்தேர்தலில் மக்கள் வெளுத்து வாங்க வேண்டும் என்று வேண்டுகோள் விடுத்தார். தமக்கு எதிராக நடக்கும் சதி மற்றும் சூழ்ச்சிகளை அடுத்த தலைமுறைக்குத் தெரியப்படுத்த கரூரில் ஒரு நினைவுச் சின்னம் அமைக்கப்படும் என்றும் அவர் அறிவித்தார்.
முடிவாக, மக்கள் அமைத்துக் கொடுத்த இந்த நல்லாட்சியை எதிர்க்கட்சிகள் சிதைக்கப் பார்த்தாலும், மக்கள் ஆதரவோடு தனது பயணம் தொடரும் என்று அவர் உறுதியளித்தார். எதிர்க்கட்சிகளின் விமர்சனங்களைச் சட்டை செய்யாமல் தனது பணியைத் தொடர்ந்து செய்வேன் என்று கூறிய விஜய், மக்கள் நீதிமன்றத்தில் அந்தத் தீய சக்திகளுக்குத் தண்டனை கிடைக்கும் என்று நம்புவதாகக் குறிப்பிட்டார். கரூரில் தமக்கு ஏற்பட்ட காயங்களுக்குச் சரியான பதிலடியைக் கொடுத்துவிட்டதாகக் கூறிய அவர், அந்தத் துயர நிகழ்வு எப்போதும் தனது மனதை விட்டு நீங்காது என்று மனப்பூர்வமாகக் கூறி தனது உரையை நிறைவு செய்தார்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
