பாகிஸ்தான் தற்போது தனது வரலாற்றிலேயே மிக மோசமான பொருளாதார மற்றும் அரசியல் நெருக்கடியை சந்தித்து வருகிறது. நாட்டின் அந்நிய செலாவணி கையிருப்பு அதலபாதாளத்திற்கு சென்றுள்ள நிலையில், திவாலாவதிலிருந்து தப்பிக்க சர்வதேச நாணய நிதியத்திடம் ஒரு பில்லியன் டாலர் கடனுதவிக்காக அந்த நாடு கையேந்தி நிற்கிறது. இருப்பினும், ஐஎம்எஃப் அமைப்பு பாகிஸ்தானுக்கு கடன் வழங்க கடுமையான நிபந்தனைகளை விதித்துள்ளது. குறிப்பாக, பட்ஜெட் பற்றாக்குறையை குறைத்தல், எரிபொருள் விலையை அதிரடியாக உயர்த்துதல் மற்றும் மின்சார மானியங்களை ரத்து செய்தல் போன்ற கோரிக்கைகளை முன்வைத்துள்ளது. பாகிஸ்தான் அரசு இதுவரை மேற்கொண்ட சீர்திருத்தங்கள் போதுமானதாக இல்லை என்று கருதும் ஐஎம்எஃப், கூடுதல் வரி விதிப்புகளை அமல்படுத்தினால் மட்டுமே அடுத்தகட்ட நிதியுதவி வழங்கப்படும் என்பதில் உறுதியாக உள்ளது.
இந்த நிதி நெருக்கடிக்கு மத்தியில், பெஷாவரில் உள்ள அமெரிக்கத் தூதரகம் மூடப்பட்டிருப்பது உலக நாடுகளின் கவனத்தை ஈர்த்துள்ளது. அதிகாரப்பூர்வமாக இது ஒரு பாதுகாப்பு நடவடிக்கை என்று கூறப்பட்டாலும், இது பாகிஸ்தானுக்கு அமெரிக்கா வழங்கும் ஒரு மறைமுக எச்சரிக்கையாகவே பார்க்கப்படுகிறது. கடந்த சில ஆண்டுகளாகவே அமெரிக்கா பாகிஸ்தான் மீது அதிருப்தியில் இருந்து வரும் நிலையில், இந்தத் தூதரக மூடல் என்பது ஒரு அழுத்த தந்திரமாகும். கைபர் பக்துன்க்வா மாகாணத்தில் நிலவும் பாதுகாப்பற்ற சூழல் மற்றும் பயங்கரவாத அச்சுறுத்தல்கள் காரணமாக அமெரிக்கா தனது அதிகாரிகளை அங்கிருந்து வெளியேற்றியுள்ளது. இது பாகிஸ்தான் ராணுவத்திற்கும் அரசுக்கும் வழங்கப்பட்ட ஒரு பலமான அரசியல் செய்தியாக கருதப்படுகிறது.
நிதி உதவியை பெற வேறு வழியில்லாத சூழலில், பாகிஸ்தான் ராணுவ தளபதி ஆசிம் முனீர் மற்றும் பிரதமர் ஷாபாஸ் ஷெரீப் ஆகியோர் சவுதி அரேபியாவிற்கு பயணம் மேற்கொண்டுள்ளனர். ஐஎம்எஃப் நிதியுதவி கிடைக்காவிட்டால் உலக வங்கி மற்றும் இதர வளைகுடா நாடுகளிடமிருந்து கடன் பெறுவது கடினம் என்பதால், சவுதி அரேபியாவின் உதவியை பாகிஸ்தான் பெரிதும் நம்பியுள்ளது. ஆனால், சவுதி அரேபியாவும் இம்முறை இலவசமாக எதையும் வழங்க தயாராக இல்லை. பாகிஸ்தானின் சிறந்த போர் விமானிகள் மற்றும் ரேடார் தொழில்நுட்பங்களை சவுதிக்கு வழங்க வேண்டும் என்றும், பிராந்திய மோதல்களில் சவுதிக்கு ஆதரவாக பாகிஸ்தான் ராணுவம் செயல்பட வேண்டும் என்றும் நிபந்தனைகள் விதிக்கப்படுவதாக தெரிகிறது.
மத்திய கிழக்கு பிராந்தியத்தில் ஈரான், இஸ்ரேல் மற்றும் அமெரிக்கா இடையே நிலவும் போர் பதற்றங்கள் பாகிஸ்தானை சங்கடமான நிலையில் நிறுத்தியுள்ளன. ஈரான் மற்றும் அமெரிக்கா ஆகிய இரு தரப்பிற்கும் இடையே சமநிலை பேண பாகிஸ்தான் முயன்றாலும், அமெரிக்காவின் அழுத்தம் காரணமாக ஈரானுடனான உறவில் விரிசல் ஏற்பட்டுள்ளது. குறிப்பாக, சீனா-ஈரான் இடையிலான பொருளாதார பாதையை முடக்க அமெரிக்கா பாகிஸ்தானை பயன்படுத்துகிறது. தாலிபான்களுக்கு எதிரான போரில் தீவிரம் காட்ட வேண்டும் என்றும், ஈரானுடன் எவ்விதமான மறைமுக ஒப்பந்தங்களையும் வைத்து கொள்ளக் கூடாது என்றும் அமெரிக்கா பாகிஸ்தானை வற்புறுத்தி வருகிறது.
பாகிஸ்தானில் சீனாவின் முதலீடான ‘சிபெக்’ மற்றும் குவாடர் துறைமுக திட்டங்கள் அமெரிக்காவிற்கு பெரும் கவலையை அளித்து வருகின்றன. குவாடர் துறைமுகத்தில் சீனாவின் ஆதிக்கத்தை குறைக்க அமெரிக்கா அழுத்தம் கொடுத்து வருகிறது. இதன் ஒரு பகுதியாகவே, சமீபகாலமாக குவாடர் பகுதியில் உள்ள சீன கட்டுமானங்கள் மீது தாக்குதல்கள் நடத்தப்படுவதாக அரசியல் ஆய்வாளர்கள் கருதுகின்றனர். சீனாவுடனான தனது உறவை துண்டித்துக் கொள்ளுமாறு பாகிஸ்தானுக்கு கட்டளையிடப்பட்டுள்ளது. இதனை செய்யத் தவறினால், ஐஎம்எஃப் நிதியுதவி மற்றும் சர்வதேச நாடுகளின் ஆதரவு நிரந்தரமாக துண்டிக்கப்படும் என்ற அச்சம் பாகிஸ்தான் ராணுவத்திற்கு ஏற்பட்டுள்ளது.
இறுதியாக, பாகிஸ்தான் ஒரு இரட்டை ஆட்டத்தை ஆடிக் கொண்டிருப்பதாக அமெரிக்கா கருதுகிறது. உக்ரைன் போர் மற்றும் ஆப்கானிஸ்தான் விவகாரங்களில் பாகிஸ்தானின் செயல்பாடுகள் அமெரிக்காவிற்கு திருப்தி அளிக்கவில்லை. இதனால், இந்தியாவின் அச்சுறுத்தல்களை சுட்டிக்காட்டி பாகிஸ்தானை அமெரிக்கா பணிய வைக்கிறது. நாங்கள் சொல்லும்படி கேட்காவிட்டால், இந்தியாவுடனான மோதலின் போது நாங்கள் தலையிட மாட்டோம்” என்ற தொனியில் எச்சரிக்கைகள் விடுக்கப்படுகின்றன. தற்போதைய சூழலில், பாகிஸ்தான் தனது இறையாண்மையை அடகு வைத்தாவது கடனை பெற்று உயிர் பிழைக்க போராடி வருகிறது. ஆசிம் முனீர் தலைமையிலான ராணுவம் அமெரிக்காவின் நிபந்தனைகளுக்கு கட்டுப்படுமா அல்லது சீனாவின் பிடியில் நீடிக்குமா என்பது அடுத்த சில வாரங்களில் தெரியவரும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
