திரை உலகில் பெரும் வெற்றியை பெற்ற மாஸ் நடிகர்கள் அரசியல் கட்சி தொடங்கி வெற்றி பெறுவது என்பது அவ்வளவு எளிதான காரியமல்ல. தென்னிந்தியாவில், குறிப்பாக கேரளா போன்ற மாநிலங்களில், நடிகர்களின் புகழை தாண்டிய அரசியல் ஸ்திரத்தன்மை தேவைப்படுகிறது. மலையாள சினிமாவின் ஜாம்பவான்களான மோகன்லால் மற்றும் மம்முட்டி போன்றவர்கள் மிகப்பெரிய மக்கள் செல்வாக்குடன் சிறந்த நடிகர்களாக இருந்தாலும், அவர்கள் ஒரு கட்சி ஆரம்பித்து அரசியல் களத்தில் இறங்கினால், அவர்கள் தோல்வியை தழுவவே வாய்ப்புள்ளது என்று அரசியல் பார்வையாளர்கள் கூறுகின்றனர். காரணம், மக்களின் அரசியல் விசுவாசம் என்பது, தனிப்பட்ட நடிகரின் புகழை மட்டும் சார்ந்திருப்பதில்லை.
தமிழக அரசியலை பொறுத்தவரை, நடிகர்களின் அரசியல் நுழைவு எப்போதும் விவாதிக்கப்படும் ஒரு விஷயமாக உள்ளது. சூப்பர் ஸ்டார் ரஜினிகாந்த் அரசியலுக்கு வருவார் என்று பல ஆண்டுகளாக எதிர்பார்க்கப்பட்டாலும், அவர் இறுதியில் முடிவில் இருந்து பின்வாங்கினார். இதற்கான முக்கிய காரணமாக, தமிழகத்தில் உள்ள மொத்த வாக்குகளில் 5 முதல் 10 சதவீதம் மட்டுமே தன்னால் பிரிக்க முடியும் என்பதை அவர் நன்கு உணர்ந்ததே என்று சொல்லப்படுகிறது. அத்தகைய குறைந்த சதவீத வாக்குகள், தமிழகத்தின் ஆளுங்கட்சிகளை தோற்கடிப்பதற்கோ அல்லது ஆட்சியை பிடிப்பதற்கோ போதுமானதல்ல என்ற யதார்த்தத்தை அவர் ஏற்றுக்கொண்டார்.
மற்றொரு மாபெரும் நடிகரான கமல்ஹாசன் முழு நம்பிக்கையுடன் அரசியல் களத்தில் குதித்து, மக்கள் நீதி மய்யம் என்ற கட்சியை தொடங்கினார். அவரும் குறிப்பிடத்தக்க பங்களிப்பை அளித்தும், சட்டமன்ற தேர்தலும், நாடாளுமன்ற தேர்தலிலும் வெற்றியை பெற முடியவில்லை. அவரே தேர்தல் களத்தில் தோல்வி அடைந்தார். இது, வெறும் நடிப்புத் திறனோ, அறிவுசார்ந்த பேச்சுகளோ அல்லது திரை புகழோ மட்டும் ஒரு நடிகரை அரசியல்வாதியாக வெற்றியடைய செய்துவிடாது என்பதை நிரூபிக்கிறது. அரசியலில் வெற்றி பெற, இந்த அடிப்படை தகுதிகளுடன் சேர்த்து, மக்களை காந்தம் போல ஈர்க்கும் ஒரு “கரீஷ்மா” தேவைப்படுகிறது.
அந்த ‘கரீஷ்மா’ எனும் தனித்துவமான ஈர்ப்பு சக்தி, தற்போது விஜய்யுடன் மட்டுமே இருப்பதாக அரசியல் ஆய்வாளர்கள் உறுதியாக கூறுகின்றனர். விஜய்யின் ரசிகர் பட்டாளம் என்பது வெறும் பார்வையாளர்களை கடந்து, அவரது ஒவ்வொரு சமூக மற்றும் அரசியல் அசைவிலும் தீவிரமாக பங்கெடுக்கும் ஒரு கட்டமைக்கப்பட்ட அமைப்பாக உருவெடுத்துள்ளது. மேலும், அவர் தனது ஆரம்ப காலத்திலிருந்தே சமூக பிரச்சினைகளில் காட்டும் ஆர்வம், இளைஞர்கள் மற்றும் விளிம்பு நிலை மக்களிடையே ஆழமான நம்பிக்கையை விதைத்துள்ளது. இதுவே, அவரை மற்ற நடிகர்களிடமிருந்து தனித்து காட்டும் பிரதான காரணியாக உள்ளது.
விஜய்யின் இந்த கரீஷ்மா, வெறும் தமிழகத்துடன் நின்றுவிடாமல், தமிழக வெற்றி கழகத்தின் தாக்கத்தை அண்டை மாநிலங்களிலும் உருவாக்க வாய்ப்புள்ளது. குறிப்பாக, அவரது படங்களுக்கு அதிக வரவேற்பு உள்ள கேரளா மற்றும் புதுச்சேரி ஆகிய மாநிலங்களிலும் அவரது அரசியல் முடிவுகள் எதிரொலிக்கும் வாய்ப்பு உள்ளது. ரஜினிகாந்த் அடைய தவறிய 5-10 சதவீத வாக்குகளை விட, விஜய் தன்னுடைய ரசிகர் மன்றங்களின் ஒருங்கிணைக்கப்பட்ட பலம் மற்றும் இளைய தலைமுறையின் மாற்றம் குறித்த ஆவல் ஆகியவற்றின் மூலம், அதைவிட பெரிய தாக்கத்தை ஏற்படுத்துவார் என்று நம்பப்படுகிறது.
எனவே, வெறுமனே ஒரு மாஸ் நடிகர் கட்சி ஆரம்பித்ததால் வெற்றி கிடைக்கும் என்று கூறுவது தவறானது. ஆனால், அந்த நடிகர் ‘கரீஷ்மா’ எனும் தனித்துவமான ஈர்ப்பு சக்தியையும், ஒழுங்கமைக்கப்பட்ட மக்கள் பலத்தையும், மாற்றத்திற்கான லட்சியத்தையும் கொண்டிருந்தால் வெற்றி சாத்தியமே. அந்த வாய்ப்பு தற்போது விஜய்க்கு மட்டுமே உள்ளது. இதன் விளைவாக, தமிழ்நாடு, புதுச்சேரி, மற்றும் கேரளா ஆகிய மூன்று தென் மாநிலங்களிலும் அவரது கட்சி அல்லது அவரது ஆதரவுடன் கூடிய கூட்டணிக்கு குறிப்பிடத்தக்க வெற்றி கிடைக்கும் சாத்தியக்கூறுக பிரகாசமாக தெரிகின்றன என அரசியல் ஆய்வாளர்கள் கணித்துள்ளனர்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
