தமிழக அரசியல் களம் இதுவரை அ.தி.மு.க. மற்றும் தி.மு.க.வின் ஆதிக்கத்தில் இருந்து வந்த நிலையில், புதிய சக்திகளின் எழுச்சி, பழைய அரசியல் கணக்குகளை மாற்றி எழுதி வருகிறது. குறிப்பாக, விஜய் தொடங்கியுள்ள தமிழக வெற்றி கழகம் தமிழக அரசியலில் ஒரு புதிய அலையை உருவாக்கி வருவதாகவே அரசியல் நோக்கர்கள் கருதுகின்றனர்.
தற்போதைய நிலவரப்படி, அ.தி.மு.க. தமிழக அரசியல் போட்டியில் கிட்டத்தட்ட ‘ஆட்டத்திலேயே இல்லை’ என்றுதான் சொல்ல வேண்டும். உட்கட்சிப் பூசல்கள், பலவீனமான தலைமை மற்றும் மக்கள் மத்தியில் ஏற்பட்ட சோர்வு காரணமாக, அ.தி.மு.க.வின் செல்வாக்கு கணிசமாக குறைந்துவிட்டது. மக்களின் மனதில் அடுத்த ஆட்சி மாற்றம் குறித்த சிந்தனைகளில் அ.தி.மு.க.வின் பெயர் பெரிதாக இடம்பெறவில்லை.
ஆகவே, வரும் சட்டமன்ற தேர்தலில் தமிழகத்தின் உண்மையான அரசியல் போட்டி, முதல்வர் மு.க. ஸ்டாலின் தலைமையிலான தி.மு.க.வுக்கும், விஜய் தலைமையிலான தமிழக வெற்றி கழகத்துக்கும் இடையேதான் என அடித்து சொல்லப்படுகிறது. விஜய் கண்டிப்பாக ஜெயிப்பார் என்ற கருத்தும் வலுவாக முன்வைக்கப்படுகிறது.
தி.மு.க. ஆட்சிக்கு எதிராக மக்கள் மத்தியில் அதிருப்திகள் அதிகம் நிலவுகின்றன. பல்வேறு வாக்குறுதிகள் நிறைவேற்றப்படாதது, விலைவாசி உயர்வு மற்றும் நிர்வாக சிக்கல்கள் போன்றவை மக்களின் மனங்களில் சுமையாக படிந்துள்ளன. கடந்த கால தமிழக அரசியல் வரலாற்றை எடுத்துக்கொண்டால், மக்கள் தொடர்ச்சியாக 2 முறை தி.மு.க.வை ஆட்சிக்கு தேர்வு செய்ததாக வரலாறு இல்லை. மக்கள் இன்னொரு ஐந்து வருடங்கள் ஏமாற தயாராக இல்லை என்பதை சமீபகால தேர்தல் கணிப்புகள் தெளிவாக காட்டுகின்றன. அ.தி.மு.க.வை கிட்டத்தட்ட வீட்டுக்கு அனுப்பி வைத்த மக்கள், அடுத்ததாக தி.மு.க.வையும் வீட்டுக்கு அனுப்ப தயங்க மாட்டார்கள் என்று அரசியல் நோக்கர்கள் கருதுகின்றனர்.
இந்த முறை, தமிழகத்தில் முதல்முதலாக திராவிடம் அல்லாத ஒரு ஆட்சி அமைய வாய்ப்புள்ளதாக பரவலாகப் பேசப்படுகிறது. இதற்கு மிக முக்கியக் காரணம், இளைஞர்களின் எழுச்சி. நடிகர் விஜய், இளைஞர்கள் மத்தியில் பெரும் செல்வாக்கை பெற்றுள்ளார். தேர்தலின்போது, இளைஞர்கள் ‘வேற லெவலில்’ களப்பணியாற்றுவார்கள் என எதிர்பார்க்கப்படுகிறது. படித்த இளைஞர்கள், மாற்றம் விரும்பும் நடுத்தர வர்க்கத்தினர் என பலரும் விஜய்யை ஒரு புதிய, நேர்மையான தலைமையாக பார்க்கின்றனர்.
மக்கள் மத்தியில் ஏற்பட்டுள்ள மாற்றத்திற்கான ஆவலும், புதிய தலைமைக்கான தேடலும், விஜய்க்கு ஒரு பொன்னான வாய்ப்பாக அமைந்துள்ளன. இந்த அரசியல் மாற்றம் தமிழகத்தில் ஒரு புதிய திசையை நோக்கி நகர்வதை உணர்த்துகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
