தமிழகத்தில் இதுவரை இருந்த அரசியல் சூழலில், திமுக மற்றும் அதிமுக ஆகிய இரு கட்சிகளில் ஏதேனும் ஒன்றை தோற்கடிக்க வேண்டும் என்ற வலுவான மனநிலை மக்கள் மத்தியில் இருந்தது. ஒருவேளை, “திமுகவை வீழ்த்த வேண்டும்” அல்லது “அதிமுகவை வீழ்த்த வேண்டும்” என்ற முடிவு பொதுமக்களிடம் உறுதியாகிவிட்டால், அந்த கட்சியை வீழ்த்தும் திறன் யாருக்கு அதிகம் இருக்கிறதோ, அவருக்கே மக்கள் தங்கள் வாக்குகளை அளிப்பார்கள். ஆனால், தற்போதுள்ள நிலவரப்படி, இந்த இரு திராவிட கட்சிகளும் மட்டுமே ஆட்சியை பிடிக்க முடியும் என்ற எண்ணம் மக்கள் மத்தியில் குறைந்துள்ளது. இது, புதிய தலைமைக்கான தேடலையும், ஒரு மாற்று சக்திக்கான எதிர்பார்ப்பையும் அதிகரித்துள்ளது.
இந்த எதிர்பார்ப்பு மற்றும் மாற்று அரசியல் தேவை என்ற பின்னணியில்தான், நடிகர் விஜய்யின் அரசியல் நகர்வுகள் தீவிர கவனத்தை பெறுகின்றன. அவர் தொடங்கியுள்ள தமிழக வெற்றிக் கழகம் பல ஆண்டுகளாக ஸ்திரமான கூட்டணியில் இருந்த திராவிட கட்சிகளுக்கு ஒரு புதிய சவாலாக உருவெடுத்துள்ளது. விஜய் ஒரு மாற்று சக்தியாக மக்கள் மத்தியில் எழும்போது, பல வருடங்களாக திராவிடக் கட்சிகளுக்கே வாக்களித்து வந்த பாரம்பரியமான வாக்காளர்களின் மனப்போக்கில் ஒரு மாற்றம் ஏற்பட்டுள்ளது. இதனால், விஜய் அல்லது அவரது கட்சிக்கு ஆதரவு அளித்தால், இரு திராவிட கட்சிகளையும் வீழ்த்த முடியும் என்ற நம்பிக்கை மெல்ல பரவி வருகிறது.
அரசியல் விமர்சகர்களின் கணிப்புப்படி, விஜய் தலைமையிலான தவெக-வும் காங்கிரஸ் கட்சியும் கூட்டணி அமைத்தால், அது தமிழக அரசியலில் ஒரு பெரிய திருப்புமுனையாக அமையும். விஜய்-காங்கிரஸ் கூட்டணி, திரட்டப்படும் வாக்குகளின் மூலம் திமுகவின் வாக்கு வங்கியில் ஒரு கணிசமான பிளவை ஏற்படுத்தும். தற்போது ஆளுங்கட்சியாக இருக்கும் திமுகவை வீழ்த்துவதற்கு விஜய் ஒரு கருவியாக மாறலாம் என அரசியல் வட்டாரங்களில் பேசப்படுகிறது.
விஜய்யுடன் கூட்டணி அமைப்பது என்பது காங்கிரஸ் கட்சிக்கு தமிழக அளவில் பலம் மட்டுமல்லாமல், தென்னிந்திய அளவிலும் பலம் சேர்க்கும் ஒரு நீண்ட கால திட்டமாக பார்க்கப்படுகிறது. குறிப்பாக, காங்கிரஸ் கட்சியின் கவனம் தமிழகத்தை ஒட்டிய மாநிலங்கள் மீதும் திரும்பியுள்ளது. கேரளாவில் விஜய்யுடன் கூட்டணி வைத்தால், அவர் அதிக சதவிகித வாக்குகளை கொண்டு வர முடியும் என்று காங்கிரஸ் நம்புகிறது. கேரளா போன்ற மிகவும் இறுக்கமான போட்டி நிலவும் ஒரு மாநிலத்தில் விஜய்யுடன் கூட்டணி என்பது ஆட்சியை கைப்பற்றுவதிலோ அல்லது கூட்டணிக்கு பெரும்பான்மை கிடைப்பதிலோ பெரிய மாற்றத்தை உருவாக்க முடியும்.
விஜய்யின் நட்சத்திர செல்வாக்கு மற்றும் இளைஞர்கள் மீதான அவரது தாக்கம், கேரளா மற்றும் புதுச்சேரி ஆகிய யூனியன் பிரதேசத்திலும் எதிரொலிக்கும் என்று காங்கிரஸ் கருதுகிறது. கேரளாவில் சில குறிப்பிட்ட சட்டமன்ற தொகுதிகளிலும், புதுச்சேரி யூனியன் பிரதேசத்திலும் விஜய்யின் கூட்டணி காங்கிரஸுக்கு கணிசமான வெற்றிகளை தேடித் தரலாம். இதன்மூலம், காங்கிரஸ் தலைமையிலான கூட்டணி, இந்த இரு பிராந்தியங்களிலும் மீண்டும் ஆட்சியை பிடிக்கும் வாய்ப்பை உருவாக்க முடியும் என்ற இலக்குடன் காங்கிரஸ் நகர்வுகளை மேற்கொள்வதாக அரசியல் ஆய்வாளர்கள் தெரிவிக்கின்றனர்.
விஜய்-காங்கிரஸ் போன்ற புதிய அல்லது மாற்று அணிகள் களமிறங்கும்போது, ஆளுங்கட்சியின் அதிருப்தி வாக்குகளை திசை திருப்பும் சக்தியாக அவை செயல்படக்கூடும். திராவிடக் கட்சிகளுக்கு மட்டுமே வாக்களிப்பேன் என்ற மனநிலையிலிருந்து மக்கள் வெளியேறுவது, ஒரு நான்கு முனைப் போட்டிக்கு வழி வகுத்துள்ளது. இது, தமிழக அரசியல் வரலாற்றில் ஒரு திருப்புமுனையாக அமையக்கூடும்; இதில் எந்த அணி வெற்றி பெறும் என்பதைவிட, திராவிட கட்சிகளின் செல்வாக்கு குறையுமா என்பதே பிரதான கேள்வியாக மாறியுள்ளது..
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
