தமிழக அரசியல் களத்தில் “பங்காளிச் சண்டை” என்பது நீண்டகாலமாக திமுக மற்றும் அதிமுக ஆகிய இரு துருவங்களுக்கு இடையே மட்டுமே இருந்து வந்தது. “ஒன்னு நீ வரணும், இல்ல நான் வரணும்; ஆனா மூணாவதா ஒருத்தன் உள்ளே வந்துடக் கூடாது” என்ற எழுதப்படாத விதியை பல ஆண்டுகளாஅ இந்த இரு கட்சிகளும் வெற்றிகரமாக பின்பற்றி வந்தன. அந்த வகையில் 2026 சட்டமன்ற தேர்தல் களத்தில் விஜய் தலைமையிலான தமிழக வெற்றிக் கழகத்தின் அதிரடி வரவு, இந்த பாரம்பரியமான அதிகார பகிர்வை அடியோடு நிலைகுலைய செய்துள்ளது. தவெகவின் மாநாடுகள் மற்றும் கூட்டங்களுக்குத் திரளும் கட்டுக்கடங்காத மக்கள் கூட்டத்தைக் கண்டு, இப்போது ஆளுங்கட்சியும் எதிர்க்கட்சியும் ஒருசேர அதிர்ச்சியில் ஆழ்ந்துள்ளன.
விஜய்யின் அரசியல் வருகையை தொடக்கத்தில் சாதாரணமாக கருதிய திமுக மற்றும் அதிமுக, இப்போது அவரது வாக்கு வங்கியின் வலிமையை புரிந்து கொண்டு தற்காப்பு நிலைக்குத் தள்ளப்பட்டுள்ளன. முன்னெப்போதும் இல்லாத வகையில், இரு திராவிட கட்சிகளும் ஒரே குரலில் விஜய்யை விமர்சிக்க தொடங்கியிருப்பது அரசியல் வட்டாரங்களில் “இரு துருவங்கள் இணைந்து ஒரு மூன்றாம் சக்தியை எதிர்க்கும்” விசித்திரமான சூழலை உருவாக்கியுள்ளது. விஜய்யின் அரசியல் இன்னும் முழுமையாக பரிட்சிக்கப்படவில்லை என்றாலும், அவர் ஏற்படுத்தியுள்ள தாக்கம் இரு கட்சிகளின் வாக்கு வங்கிகளிலும் ஒரு மிகப்பெரிய விரிசலை உண்டாக்கியிருப்பதை யாராலும் மறுக்க முடியாது. குறிப்பாக, இளைஞர்கள் மற்றும் நடுநிலை வாக்காளர்களின் கவனம் விஜய் பக்கம் குவிந்திருப்பது இரு தரப்புக்கும் பெரும் நடுக்கத்தை ஏற்படுத்தியுள்ளது.
விஜய் எத்தனை தொகுதிகளில் வெற்றி பெறுவார் அல்லது அவரது துல்லியமான வாக்கு சதவீதம் எவ்வளவு இருக்கும் என்பது இப்போதைக்கு ஒரு புதிராகவே இருக்கலாம். ஆனால், அவர் பெறும் ஒவ்வொரு வாக்கும் திமுக அல்லது அதிமுக ஆகிய இருவரின் கணக்கிலிருந்துதான் பிரிய போகிறது என்பது உறுதி. “விஜய் ஜெயிக்கிறாரோ இல்லையோ, ஆனா இவங்க ரெண்டு பேர்ல ஒருத்தருக்கு பெரிய ஆப்பு வைக்கப் போறாரு” என்பதுதான் இன்றைய அரசியல் விமர்சகர்களின் ஒருமித்த கருத்தாக உள்ளது. கடந்த காலங்களில் விஜயகாந்த் ஏற்படுத்திய தாக்கத்தை விட பல மடங்கு பெரிய அதிர்வை விஜய் உருவாக்கியுள்ளதால், இந்த தேர்தல் முடிவுகள் தமிழக அரசியலில் ஒரு புதிய திசையை தீர்மானிக்கும் என்று எதிர்பார்க்கப்படுகிறது.
வடக்கே பெரம்பூர், மத்திய தமிழகத்தில் திருச்சி கிழக்கு என தனது தேர்தல் வியூகத்தை மிக நேர்த்தியாக அமைத்துள்ள விஜய், தான் போட்டியிடும் இடங்களை தாண்டி அருகிலுள்ள தொகுதிகளிலும் ஒரு தாக்கத்தை ஏற்படுத்தி வருகிறார். இந்த பகுதிகளில் விஜய்க்கு கிடைக்கும் வரவேற்பை பார்க்கும் போது, திராவிட கட்சிகளின் பாரம்பரிய வாக்குகள் சிதறி, அது தவெகவிற்கு சாதகமாக மாறும் சூழல் தெரிகிறது. இதனால் பதற்றமடைந்துள்ள திமுக மற்றும் அதிமுக தலைமை, தங்களின் வியூகங்களை மாற்றியமைக்க வேண்டிய கட்டாயத்திற்கு தள்ளப்பட்டுள்ளன. விஜய்யை அரசியல் ரீதியாக கட்டுப்படுத்த எடுக்கப்படும் முயற்சிகள் யாவும், மாறாக அவருக்கு இன்னும் அதிகப்படியான மக்கள் அனுதாபத்தையும் ஆதரவையுமே பெற்று தந்து கொண்டிருக்கின்றன.
மொத்தத்தில் 2026 தேர்தல் என்பது வெறும் ஒரு ஆட்சி மாற்றத்திற்கான தேர்தல் மட்டுமல்ல; அது தமிழகத்தின் அரை நூற்றாண்டுகால இருமுனை அரசியலுக்கு முற்றுப்புள்ளி வைக்கும் ஒரு வரலாற்று திருப்புமுனையாக அமையக்கூடும். விஜய் பெற்றுள்ள இந்த அசுர வேக வளர்ச்சி, தேர்தல் முடிவுகளுக்கு பின் ஒரு புதிய அதிகார மையத்தை உருவாக்கும் என்பதில் ஐயமில்லை. திராவிட கட்சிகள் இப்போதே தங்களின் பலத்தை காக்க போராட தொடங்கிவிட்ட நிலையில், விஜய்யின் இந்த பயணம் யாரை வீழ்த்தப் போகிறது, யாரை வாழ வைக்கப் போகிறது என்பது மே 4-ம் தேதி வெளியாகும் முடிவுகளில்தான் முழுமையாக தெரியும். அதுவரை தமிழக அரசியல் களம் ஒரு மிகப்பெரிய சஸ்பென்ஸ் திரைப்படத்தை போலவே நகரும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
