தமிழக அரசியலில் தி.மு.க. மற்றும் அ.தி.மு.க. ஆகிய இரு கட்சிகளும் வெளிப்படையாக எதிரிகள் போல தோன்றினாலும், அவர்களுக்கு இடையே ஒரு வகையான மறைமுக ‘புரிதல்’ அல்லது ‘ஒத்துழைப்பு’ நிலவுகிறதா என்ற சந்தேகம் அரசியல் பார்வையாளர்கள் மத்தியில் வலுப்பெற்று வருகிறது. இந்த இரு கட்சிகளின் தலைவர்களும் தேர்தல் பிரச்சாரங்களின்போது ஊழல் குற்றச்சாட்டுகளை பகிரங்கமாக முன்வைப்பதும், ஆட்சிக்கு வந்தால் எதிராளிகளை சிறைக்கு அனுப்புவோம் என்று சூளுரைப்பதும் வாடிக்கை. ஆனால், நடைமுறையில் இந்த குற்றச்சாட்டுகள் சட்டரீதியான விளைவுகளை ஏற்படுத்துவதில்லை என்பதே நிதர்சனம்.
முன்னாள் முதல்வர் எடப்பாடி பழனிசாமி தலைமையிலான அ.தி.மு.க. ஆட்சியில் நடந்ததாக கூறப்படும் ஊழல்கள் குறித்த தி.மு.க.வின் நிலைப்பாடு இந்த சந்தேகத்தை மேலும் வலுப்படுத்துகிறது. 2021 சட்டமன்றத் தேர்தலின்போது, தி.மு.க. தலைவர் மு.க. ஸ்டாலின், கோடநாடு கொலை மற்றும் கொள்ளை வழக்கில் தொடர்புடைய உண்மையான குற்றவாளிகளை கூண்டில் ஏற்றுவேன் என்று மிக ஆக்ரோஷமான வாக்குறுதியை அளித்தார். அத்துடன், அ.தி.மு.க.வின் முன்னாள் அமைச்சர்கள் மீது பல்வேறு ஊழல் குற்றச்சாட்டுகள் குறித்து நீதிமன்றத்தில் வழக்குகள் தொடுக்கப்பட்டன. ஆனால், தி.மு.க. ஆட்சிக்கு வந்து இத்தனை ஆண்டுகள் கடந்த பின்னரும், கோடநாடு வழக்கில் குறிப்பிடத்தக்க முன்னேற்றம் இல்லை. முக்கியமாக, ஒரு முன்னாள் அ.தி.மு.க. அமைச்சர் மீதும் இதுவரை உறுதியான சட்ட நடவடிக்கை எடுக்கப்படவில்லை. ஊழல் தடுப்பு நடவடிக்கைகள் வெறும் தேர்தல் முழக்கங்களோடு நின்றுவிட்டனவா என்ற கேள்வியை இது எழுப்புகிறது.
இதே பாணியில், தற்போது எதிர்க்கட்சித் தலைவராக இருக்கும் எடப்பாடி பழனிசாமியும், வரவிருக்கும் தேர்தலை முன்னிட்டு ஆளும் தி.மு.க.வுக்கு எதிராக தீவிரமான குற்றச்சாட்டுகளை முன்வைக்கிறார். அவர், அ.தி.மு.க. ஆட்சிக்கு வந்தால், தி.மு.க.வில் உள்ள ஊழல்வாதிகளை சிறைக்கு அனுப்புவோம் என்று சபதம் இடுகிறார். எனினும், கடந்த கால அரசியல் வரலாற்றை பார்க்கும்போது, இந்த ‘பழிக்கு பழி வாங்கும்’ அரசியல் பெரும்பாலும் நடைமுறைக்கு வந்ததில்லை. ஒரு கட்சி ஆட்சிக்கு வந்தவுடன், எதிரணியினர் மீதான விசாரணைகள் மெதுவாக நடப்பதாக காட்டிக்கொண்டு, இறுதியில் அவை கிடப்பில் போடப்படுவது அல்லது முக்கியத்துவம் இழப்பது வாடிக்கையாக உள்ளது. இந்த நடைமுறை, இரண்டு திராவிட கட்சிகளும் தங்களுக்குள் ஒரு எழுதப்படாத சமாதான ஒப்பந்தத்தை பராமரிப்பதன் வெளிப்பாடாகவே பார்க்கப்படுகிறது.
இந்த சூழலில், தி.மு.க. மற்றும் அ.தி.மு.க.வின் நிம்மதியை குலைக்கும் ஒரே சக்தியாக உருவெடுத்துள்ளது தமிழக வெற்றிக் கழகத்தின் தலைவர் விஜய். இரு திராவிட கட்சிகளின் அடிப்படை கட்டமைப்பு, பணபலம் மற்றும் அரசியல் அனுபவம் ஆகியவை வலுவாக இருந்தாலும், விஜய்யின் வருகை அவர்களது நீண்டகால ஆட்சி அதிகார பிடிக்கு ஒரு பெரிய அச்சுறுத்தலாக உள்ளது. விஜய், ஊழலற்ற ஆட்சி மற்றும் மாற்றம் என்ற முழக்கங்களை முன்வைத்து, இரு கட்சிகளின் மீதும் இருக்கும் அதிருப்தி வாக்குகளை தன் பக்கம் இழுக்க முயல்கிறார்.
குறிப்பாக, இளைஞர்கள் மற்றும் நடுநிலை வாக்காளர்கள் மத்தியில் திராவிட கட்சிகளின் மீதான சோர்வு அதிகமாக இருக்கும் நிலையில், விஜய்யின் அரசியல் பிரவேசம் இந்த இரு கட்சிகளின் வாக்கு வங்கிகளையும் சிதறடிக்கும் ஆற்றல் கொண்டது. சட்டரீதியாக ஒருவரையொருவர் தண்டிக்காமல் அமைதி காக்கும் இந்த இரு பிரதான கட்சிகளுக்கும், தங்கள் அதிகாரத்தை தக்கவைத்து கொள்வதில் மிகப்பெரிய சவாலாக, இந்த புதிய அரசியல் சக்தி திகழ்கிறது.
விஜய்யின் எழுச்சி, இரு கட்சிகளுக்கும் தங்கள் இருப்பை நிலைநிறுத்திக்கொள்ள வேண்டிய கட்டாயத்தை ஏற்படுத்தியுள்ளது. வெளிப்படையாக தங்களுக்குள் சண்டையிட்டு கொண்டாலும், ‘விஜய்’ என்ற மூன்றாம் தரப்பு சக்தி ஆட்சியை பிடித்துவிடக் கூடாது என்பதில் தி.மு.க. மற்றும் அ.தி.மு.க. ஆகிய இரு கட்சிகளும் மறைமுகமாக ஒரே இலக்கை நோக்கிச் செயல்படலாம் என்ற கோணம் அரசியல் விமர்சகர்கள் மத்தியில் ஆழமாக வேரூன்றி வருகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
