டொனால்ட் ட்ரம்ப் அமெரிக்க அதிபராக பொறுப்பேற்ற பிறகு, உலக அரசியலில் பல அதிரடி மாற்றங்கள் ஏற்பட்டுள்ளது. குறிப்பாக ஐரோப்பிய ஒன்றியம் மற்றும் அமெரிக்காவிற்கு இடையிலான உறவில் ஏற்பட்டுள்ள விரிசல்கள் ஆசியாவின் பக்கம் பார்வையை திருப்பியுள்ளன. ட்ரம்ப் முன்வைத்துள்ள வர்த்தக கொள்கைகள் மற்றும் பசுமை இல்ல எரிசக்தி தொடர்பான வரிவிதிப்புகள் ஐரோப்பிய நாடுகளுக்கு பெரும் நெருக்கடியை கொடுத்துள்ளன. இதன் விளைவாக, ஐரோப்பிய ஒன்றியம் இப்போது இந்தியாவை ஒரு முக்கியமான கூட்டாளியாக பார்க்க தொடங்கியுள்ளது. குறிப்பாக, பாதுகாப்பு துறையில் இந்தியாவுடன் ஒரு மிகப்பெரிய ஒப்பந்தத்தை செய்ய ஐரோப்பிய நாடுகள் முனைப்பு காட்டி வருகின்றன.
ஐரோப்பிய ஒன்றியத்தின் வெளியுறவுத்துறை தலைவர் காஜா காலாஸின் வருகையும், இந்தியாவுடனான பாதுகாப்பு ஒப்பந்த பேச்சுவார்த்தைகளும் உலக அரங்கில் ஒரு புதிய அதிகார சமநிலையை உருவாக்கும் என்று எதிர்பார்க்கப்படுகிறது. ட்ரம்பின் ‘அமெரிக்கா ஃபர்ஸ்ட்’ கொள்கையினால் ஐரோப்பிய நாடுகளுக்கான பாதுகாப்பு உத்தரவாதம் கேள்விக்குறியாகியுள்ள நிலையில், இந்தியா போன்ற ஒரு வளரும் வல்லரசுடன் ராணுவ மற்றும் தொழில்நுட்பக் கூட்டாண்மை வைத்துக் கொள்வது தங்களுக்கு பாதுகாப்பானது என்று ஐரோப்பா கருதுகிறது. இது வெறும் வர்த்தக ஒப்பந்தமாக மட்டும் இல்லாமல், விண்வெளித் துறை, சைபர் பாதுகாப்பு மற்றும் அதிநவீன ஆயுத தயாரிப்பு ஆகியவற்றை உள்ளடக்கிய ஒரு மாபெரும் பாதுகாப்பு பிணைப்பாக இருக்கும் என்று சர்வதேச அரசியல் விமர்சகர்கள் சுட்டிக்காட்டுகிறார்கள்.
மறுபுறம், கிரீன்லாந்து விவகாரத்தில் ட்ரம்பின் ஆர்வம் மற்றும் டாவோஸ் உலக பொருளாதார மன்றத்தில் அவர் முன்வைத்த அதிரடி கருத்துக்கள் அமெரிக்க-ஐரோப்பிய உறவில் பெரும் பிளவை ஏற்படுத்தியுள்ளன. கனடாவின் ‘போர்டு ஆஃப் பீஸ்’ அமைப்பிற்கான அழைப்பை ட்ரம்ப் ரத்து செய்தது மற்றும் மார்க் கார்னியுடனான மோதல் போக்கு போன்றவை மேற்கத்திய நாடுகளுக்கு இடையே ஒரு ராஜதந்திர விரிசலை உருவாக்கியுள்ளன. இந்த சூழலை பயன்படுத்திக் கொள்ளும் ரஷ்யா மற்றும் சீனா, கிரீன்லாந்து மற்றும் ஆர்க்டிக் பகுதிகளில் தங்கள் ஆதிக்கத்தை செலுத்தத் துடிக்கின்றன. இந்த முக்கோண போட்டியில், ஐரோப்பா தனது பொருளாதார இருப்பை தக்கவைத்துக்கொள்ள இந்தியாவுடன் தடையற்ற வர்த்தக ஒப்பந்தத்தை விரைவில் முடிக்க திட்டமிட்டுள்ளது.
மேற்கு ஆசியாவின் தற்போதைய பதற்றமான சூழலும் இந்த விவாதத்தின் முக்கிய பகுதியாக அமைந்தது. ஈரான் எல்லையை நோக்கி அமெரிக்காவின் பிரம்மாண்டமான போர்க்கப்பல் படை நகர்ந்து வருவது குறித்து பலர் கவலை தெரிவித்துள்ளனர். ட்ரம்பின் ‘விரல் தூண்டுதலில் இருக்கிறதா அல்லது அமைதியில் இருக்கிறதா’ என்பதுதான் இப்போது உலக நாடுகளின் எதிர்பார்ப்பாக உள்ளது. ஈரானுக்கு எதிரான இந்த ராணுவ பலம் காண்பித்தல், சர்வதேச வர்த்தக பாதைகளான ஹார்முஸ் ஜலசந்தி மற்றும் செங்கடல் பகுதிகளில் பெரும் பாதிப்பை ஏற்படுத்தக்கூடும். இது கச்சா எண்ணெய் விலை உயர்வு முதல் உலகளாவிய விநியோக சங்கிலி வரை அனைத்தையும் சீர்குலைக்க வாய்ப்புள்ளது.
ரஷ்யா-உக்ரைன் போர் மற்றும் சீனா-தைவான் பதற்றங்களுக்கு மத்தியில், ட்ரம்ப் முன்னெடுக்கும் ‘கோல்டன் டோம்’ போன்ற பாதுகாப்பு திட்டங்கள் அமெரிக்காவின் தனித்துவத்தை காட்டுகின்றன. இருப்பினும், ஜெ.டி. வான்ஸ் போன்ற தலைவர்களின் தீவிரமான நிலைப்பாடுகள் ஐரோப்பிய ஒன்றியத்தை இந்தியாவிடம் இன்னும் நெருக்கமாக்குகின்றன. மெர்கோசூர் வர்த்தக ஒப்பந்தம் மற்றும் அமெரிக்காவுடனான எஃப்.டி.ஏ பேச்சுவார்த்தைகள் முடங்கியுள்ள நிலையில், ஐரோப்பாவிற்கு இப்போதுள்ள ஒரே நம்பிக்கை இந்திய சந்தைதான். இது இந்தியாவிற்கு ஒரு மிகப்பெரிய ராஜதந்திர வெற்றியாக அமையும், ஏனெனில் ஐரோப்பாவின் தொழில்நுட்பமும் இந்தியாவின் உற்பத்தி திறனும் இணைந்தால் அது உலக பொருளாதாரத்தையே மாற்றியமைக்கும் வல்லமை கொண்டது.
இறுதியாக, உலக அரசியல் இப்போது ஒரு முக்கியமான சந்திப்பில் நின்று கொண்டிருக்கிறது. ஒருபுறம் ட்ரம்பின் கணிக்க முடியாத வெளியுறவு கொள்கைகள், மறுபுறம் சீனா-ரஷ்யாவின் ஆக்கிரமிப்பு மனநிலை. இவற்றுக்கிடையே, தனது தேசிய நலனை முன்னிறுத்தி இந்தியா எடுக்கும் ஒவ்வொரு முடிவும் அதன் உலகளாவிய அதிகாரத்தை உறுதிப்படுத்துகிறாது. அதிகாரப் போட்டி, ராணுவ பலம் மற்றும் ராஜதந்திரம் ஆகியவை ஒரே புள்ளியில் மோதிக்கொள்ளும் இந்த சூழலில், இந்தியா-ஐரோப்பா பாதுகாப்பு ஒப்பந்தம் என்பது 21-ஆம் நூற்றாண்டின் மிக முக்கியமான அரசியல் நகர்வாக இருக்கும் என்பதில் சந்தேகமில்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
