மூத்த பத்திரிகையாளர் மணி அவர்கள் சமீபத்தில் அளித்த நேர்காணலில், மேற்கு வங்கத்தில் மம்தா பானர்ஜிக்கும் அமலாக்கத் துறைக்கும் இடையே வெடித்துள்ள மோதல் குறித்தும், இதில் தமிழக முதல்வர் மு.க.ஸ்டாலினின் மௌனம் குறித்தும் அதிரடியான பல தகவல்களை பகிர்ந்துள்ளார். இந்த விவகாரம் 2026-ன் தேர்தல் வியூகங்களை சிதைக்கும் ஒரு முக்கிய திருப்புமுனையாக பார்க்கப்படுகிறது.
பத்திரிகையாளர் மணி கூறுகையில், சுமார் ஐந்து முதல் ஆறு ஆண்டுகளுக்கு முன்பு நிலக்கரி இறக்குமதி ஊழலில் சிக்கிய ஒரு தனியார் நிறுவனம், தனது சட்டவிரோத பணத்தை ‘ஐபேக்’ நிறுவனம் மூலமாக வெள்ளை பணமாக மாற்றியதாக அமலாக்கத்துறை குற்றம் சாட்டுகிறது. இதற்காக 2020-லேயே வழக்கு பதிவு செய்யப்பட்டுள்ளது. ஐபேக் நிறுவனம் என்பது தேர்தல் வியூகங்களை வகுக்கும் ஒரு தனியார் நிறுவனம் என்பதும், இது மம்தா பானர்ஜி மற்றும் திமுக போன்ற பல கட்சிகளுக்கு ஆலோசகராக இருப்பதும் குறிப்பிடத்தக்கது.
அமலாக்கத் துறை அதிகாரிகள் ஐபேக் அலுவலகம் மற்றும் அதன் உரிமையாளர் வீட்டில் சோதனை நடத்தியபோது, மம்தா பானர்ஜி மாநில காவல்துறையின் டிஜிபியுடன் நேரடியாக களத்தில் இறங்கினார். அங்கு பாதுகாப்பு பணியில் இருந்த மத்திய படைகளை ஒதுக்கிவிட்டு, சோதனையை தடுத்ததோடு மட்டுமல்லாமல், அங்கிருந்த லேப்டாப், ஹார்ட் டிஸ்க் மற்றும் பல முக்கிய ஆவணங்களை தாமாகவே எடுத்து சென்றதாக மணி குற்றம் சாட்டுகிறார். ஒரு முதலமைச்சரே விசாரணை அமைப்பை தடுப்பது என்பது அதிகார துஷ்பிரயோகம் என்றும், இது கூட்டாட்சி தத்துவத்திற்கு புறம்பானது என்றும் அவர் விளக்குகிறார்.
மம்தா பானர்ஜி அமலாக்கத்துறை மீது மாநில காவல்துறையிடம் புகார் அளித்து இரண்டு எஃப்ஐஆர் பதிவு செய்துள்ளார். அமலாக்கத்துறை அதிகாரிகள் தங்களின் தேர்தல் ரகசியங்கள், வேட்பாளர் பட்டியல் மற்றும் வியூகங்களை ஐபேக் அலுவலகத்திலிருந்து திருடி சென்றதாக அவர் குற்றம் சாட்டுகிறார். 2026 தேர்தலுக்கு தயாராகி வரும் நிலையில், இந்த தரவுகள் கசிந்தால் அது திரிணாமுல் காங்கிரஸின் வெற்றி வாய்ப்பை பாதிக்கும் என்ற அச்சமே மம்தாவின் இந்த அதிரடி நடவடிக்கைக்கு காரணம் என மணி குறிப்பிடுகிறார்.
டாஸ்மாக் போன்ற அரசு நிறுவனங்களில் ஈடி சோதனை நடத்தும்போது மாநில அரசு தலையிடுவதில் ஒரு நியாயம் இருக்கலாம். ஆனால், ஐபேக் என்பது ஒரு தனிநபர் நடத்தும் தனியார் நிறுவனம். ஹவாலா மோசடி போன்ற புகார்களில் சிக்கியுள்ள ஒரு தனியார் நிறுவனத்தை பாதுகாக்க ஒரு முதலமைச்சர் சட்டத்தை மீறி செயல்படுவது தவறான முன்னுதாரணம் என்பது மணியின் வாதம். சிபிஐ விசாரணைக்கு வழங்கப்பட்ட பொது அனுமதியை மம்தா ஏற்கனவே வாபஸ் பெற்றுள்ளதால், உச்ச நீதிமன்ற உத்தரவு இருந்தால் மட்டுமே இந்த வழக்கில் சிபிஐ உள்ளே வர முடியும்.
இந்த விவகாரத்தில் மிக முக்கியமான இடமாக மணி பார்ப்பது தமிழக முதல்வர் மு.க.ஸ்டாலினின் மௌனத்தைத்தான். வழக்கமாக கேஜரிவால் அல்லது ஹேமந்த் சோரன் போன்ற எதிர்க்கட்சித் தலைவர்கள் மீது மத்திய அரசு நடவடிக்கை எடுக்கும்போது, முதல் ஆளாக கண்டனக்குரல் எழுப்புபவர் ஸ்டாலின். ஆனால், மம்தா பானர்ஜியின் இந்த சம்பவத்தில் அவர் ஒரு வார காலமாக அமைதி காப்பது பல கேள்விகளை எழுப்புகிறது. ஐபேக் நிறுவனம் தற்போதும் திமுகவிற்கு பணியாற்றி வரும் சூழலில், மம்தாவின் சட்டமீறலை ஆதரிப்பது தனக்கு சிக்கலாக முடியலாம் என அவர் கருத வாய்ப்புள்ளது.
இந்த ஒட்டுமொத்த நிகழ்வையும் மம்தா பானர்ஜி ஒரு அரசியல் நாடகமாக மாற்றி, தேர்தலில் ‘ஹீரோயின்’ ஆக பார்க்கிறார் என மணி விமர்சிக்கிறார். ஒருபுறம் மத்திய அரசின் விசாரணை அமைப்புகள் அதிகாரத்தை தவறாக பயன்படுத்துகின்றன என்ற உண்மை இருந்தாலும், அதற்கு பதில் நடவடிக்கையாக மாநில அரசு சட்டத்தை கையில் எடுப்பது ஜனநாயகத்திற்கு ஆபத்தானது. இந்த விவகாரத்தில் உச்ச நீதிமன்றத்தின் தீர்ப்பு இந்திய அரசியலில் ஒரு புதிய வழிகாட்டுதலை உருவாக்கும் என எதிர்பார்க்கப்படுகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
