சவுதி அரேபியாவும், பாகிஸ்தானும் இணைந்து ஒரு பாதுகாப்பு ஒப்பந்தத்தில் கையெழுத்திட்ட செய்தி சர்வதேச அரசியலில் பரபரப்பை ஏற்படுத்தியது. இந்த ஒப்பந்தத்தின்படி, இரு நாடுகளில் ஒன்று தாக்கப்பட்டால், அது இரு நாடுகளின் மீதும் நடத்தப்பட்ட தாக்குதலாக கருதப்படும் என்று கூறப்பட்டது. இந்த செய்தி வெளியானவுடன், இந்தியாவின் சில ஊடகங்களும், எதிர்க்கட்சிகளும் உடனடியாக கடும் விமர்சனங்களில் இறங்கின.
இந்திய ஊடகங்களின் ஒரு குறிப்பிட்ட பிரிவும், எதிர்க்கட்சி தலைவர்களும், இந்த ஒப்பந்தம் இந்தியாவை நேரடியாக குறிவைத்துள்ளது என்று குற்றம்சாட்டினர். மேலும், சவுதியில் பணிபுரியும் லட்சக்கணக்கான இந்தியர்களின் வேலைவாய்ப்புக்கும் இது ஆபத்தாக அமையும் என்று கூக்குரலிட்டனர். சிலர், பிரதமர் நரேந்திர மோடியின் வெளியுறவு கொள்கை தோல்வியடைந்துவிட்டது என்று நேரடியாக விமர்சித்தனர்.
இந்த ஒப்பந்தம், பாகிஸ்தானில் கொண்டாட்டமாக பார்க்கப்பட்டது. பாகிஸ்தான் ஊடகங்கள், “சவுதி எங்களின் பக்கம் நிற்கிறது” என்று செய்திகளை பரப்பின. இது ஒரு வெற்றிகரமான ராஜதந்திர முயற்சி என்றும், தங்களுக்கு ஒரு “பாதுகாப்பு குடை” கிடைத்திருப்பதாகவும் பாகிஸ்தானியர்கள் பெருமையுடன் கூறினர்.
இந்தியாவில் அரசியல் விவாதங்கள் உச்சகட்டத்தை அடைந்த நிலையில், சவுதி அரேபியா தனது அதிகாரப்பூர்வ விளக்கத்தை வெளியிட்டது. சவுதி அரசு, “இந்த ஒப்பந்தம் எந்த ஒரு குறிப்பிட்ட நாட்டிற்கும் எதிராக அல்ல. எந்தவொரு தனிப்பட்ட நாட்டையும் குறிவைத்து இந்த முடிவு எடுக்கப்படவில்லை” என்று திட்டவட்டமாக அறிவித்தது.
மேலும், “இந்தியாவுடனான எங்கள் உறவு முன்னெப்போதையும்விட வலுவாக உள்ளது. நாங்கள் அதனை மேலும் மேம்படுத்த ஆர்வமாக உள்ளோம். ஆசியாவில் இந்தியாவின் முக்கியத்துவம் மிக அதிகம். எனவே, இந்தியாவை நாங்கள் ஒரு முக்கியமான கூட்டாளியாகவே கருதுகிறோம்” என்று சவுதி அரேபியா தெளிவுபடுத்தியது.
சவுதியின் இந்த பல்டி விளக்கம் வெளியானதும், இந்தியாவிலும் பாகிஸ்தானிலும் நிலைமை தலைகீழாக மாறியது.
சவுதியின் இந்த விளக்கம், இந்தியாவுக்கு எதிராக பேசிய ஊடகங்கள் மற்றும் அரசியல் கட்சிகளை வாயடைத்து போயினர். “இந்தியாவுடனான உறவைப் பாதிக்காது” என்ற சவுதியின் வார்த்தைகள், மோடி அரசின் வெளியுறவுக் கொள்கை மீதான குற்றச்சாட்டுகளுக்கு ஒரு நேரடியான பதிலடியாக அமைந்தது.
பாகிஸ்தானில் நிலவிய கொண்டாட்டம் 24 மணி நேரத்தில் சவுதியின் விளக்கத்தால் மங்கியது. தங்களுக்கு கிடைத்ததாக அவர்கள் கருதிய “பாதுகாப்பு குடை” வெறும் ஒரு வார்த்தை விளையாட்டு என்பதை அவர்கள் உணர நேர்ந்தது.
இந்த நிகழ்வு, உலக அரங்கில் இந்தியாவின் முக்கியத்துவத்தையும், பிரதமர் மோடியின் வெளியுறவு கொள்கையின் வலிமையையும் மீண்டும் ஒருமுறை உறுதிப்படுத்தியது. சவுதி போன்ற வளமான நாடுகள் கூட இந்தியாவுடன் வலுவான உறவுகளை பேண விரும்புகின்றன. இந்த உண்மை, உள்நாட்டில் விமர்சனம் செய்தவர்களின் வாதங்களுக்கு முற்றுப்புள்ளி வைத்தது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
