சர்ச்சைக்குரிய அருணாச்சலப் பிரதேச விவகாரத்தில் சீனா ஒரு நிலைப்பாட்டை எடுத்து, அமெரிக்கா மற்றும் இங்கிலாந்தில் இருந்து வந்த இந்திய குடிமக்களை துன்புறுத்தியது தொடர்பாக, இந்தியாவுக்கும் சீனாவுக்கும் இடையே சில மாதங்களுக்கு முன் வார்த்தை போர் நிகழ்ந்த பின்னணியில், திடீரென பாகிஸ்தான் இந்த பிரச்சினையில் மூக்கை நுழைத்திருப்பது அதிர்ச்சி அளிக்கிறது. வழக்கமாக, சீனா அருணாச்சல பிரதேசத்தை உரிமை கோரும்போது, அதற்கு ஈடுகொடுக்கும் வகையில் பாகிஸ்தான் காஷ்மீர் பிரச்சினையை எழுப்பும் ஒரு நிலையான பிணைப்பு இருந்தது. ஆனால், இம்முறை பாகிஸ்தான் அருணாச்சல பிரதேச விவகாரத்தில் சீனாவுக்கு ஆதரவாக கருத்து தெரிவித்திருப்பது ஆச்சரியம் அளிக்கிறது. இதன் பின்னணியில் உள்ள காரணங்கள், முக்கியத்துவம் மற்றும் இந்தியா இனி சிந்து மாகாணம் குறித்து பேசத் தயங்காது போன்ற விஷயங்கள் குறித்து ஆழ்ந்து சிந்திக்க வேண்டியுள்ளது.
பாகிஸ்தான் தனது வெளியுறவு கொள்கையில் அமெரிக்கா மற்றும் சீனாவை ஒரே நேரத்தில் நட்புடன் கையாண்டு, இரண்டிலும் ஆதாயம் தேட முயற்சித்து வரும். சீனா, பாகிஸ்தானில் 60 பில்லியன் டாலர் மதிப்புள்ள சீனா-பாகிஸ்தான் பொருளாதார வழித்தடத்தில் முதலீடு செய்தது. ஆனால், அண்மை காலங்களில் சீன முதலீடுகளுக்கு பாதுகாப்பு இல்லை; பலூசிஸ்தானில் உள்ள சீன சொத்துகள் மீதான தாக்குதல்கள், பாகிஸ்தானின் உள் குழப்பங்கள் ஆகியவற்றால் சீனா திருப்தியடையவில்லை. மேலும், அமெரிக்காவின் முழுக் கட்டுப்பாட்டிற்குள் பாகிஸ்தான் மீண்டும் செல்வது சீனாவிற்கு கடும் அதிருப்தியை ஏற்படுத்தியுள்ளது.
அமெரிக்கா மற்றும் சீனா ஆகிய இரு நாடுகளின் மத்தியிலும் பாகிஸ்தான் குழப்பங்களை உருவாக்க முயற்சிப்பதை பார்க்க முடிகிறது. முதலில், ஆப்கானிஸ்தான் மண்ணிலிருந்து அமெரிக்காவுக்கு எதிரான தாக்குதல்கள் நடந்ததாக குற்றம் சுமத்தப்பட்டது. இதன் பின்னணியில் ஆப்கன் அரசாங்கமே இருந்ததா அல்லது வேறு யாரேனும் அவர்களை தூண்டினார்களா என்பது மிகப்பெரிய கேள்வி. அதேபோல, சமீபத்தில் தஜிகிஸ்தானில் சீனர்கள் தாக்கப்பட்டதற்கும் ஆப்கானிஸ்தான் மீது விரல் நீட்டப்படுகிறது. இது, ஆப்கானிஸ்தானுக்கும் சீனாவுக்கும் இடையே இருக்கும் உறவை கெடுக்க யாரோ முயற்சிப்பதை காட்டுகிறது. ஆனால், தற்போது பாகிஸ்தானுக்கும் ஆப்கானிஸ்தானுக்கும் இடையே கிட்டத்தட்ட ஒரு போர்க்கால சூழ்நிலை நிலவுகிறது. இந்த சூழலில், பாகிஸ்தானின் அணுசக்தித் திட்டம் உட்பட அங்குள்ள சீன சொத்துக்களுக்கு பாதுகாப்பு இல்லாதது சீனாவை கவலை அடைய செய்துள்ளது.
அதே சமயம், அமெரிக்கர்கள் மீண்டும் பாகிஸ்தான் மண்ணில் குறிப்பாக பலூசிஸ்தானில் கனிம ஆய்வு செய்ய அனுமதி அளிக்கப்பட்டிருப்பது சீனாவை முழுவதுமாக புறக்கணிப்பதை போலவே உணர்கிறது. இந்த ஏமாற்றத்தை போக்கவே, பாகிஸ்தான் திடீரென அருணாச்சல பிரதேசம் குறித்து சீனாவுக்கு ஆதரவான அறிக்கையை வெளியிட்டு, மீண்டும் சீன நம்பிக்கையை பெற துடிக்கிறது. ஆனால், இத்தகைய இரட்டை வேடம் சீனாவை பொறுத்தவரை எடுபடாது.
இந்தியாவின் வடக்குப் பகுதியில் கடந்த ஐந்து ஆண்டுகளில் இந்தியா மேற்கொண்ட இராணுவ நிலைகள் மற்றும் படை குவிப்புகளால், அருணாச்சல பிரதேசத்தில் சீனா நேரடி மோதலில் ஈடுபடத் துணியாது என்பதை பாகிஸ்தான் உணர வேண்டும். மேலும், அமெரிக்காவின் அல்லது மேற்கு நாடுகளின் ராணுவம் வங்காள விரிகுடா பகுதியில் இருப்பதைச் சீனா விரும்பவில்லை. எனவே, வங்கதேசத்தில் அமெரிக்கர்கள் நுழைந்தால் சீனா மகிழ்ச்சியடையாது.
வர்த்தக பங்காளியாக சீனா எப்போதும் இந்தியாவை பகைக்க விரும்புவதில்லை. கடந்த கால கார்கில் போரின்போதோ அல்லது இந்தியா-பாகிஸ்தானின் பெரிய மோதல்களின்போதோ சீனா வெளிப்படையாகப் பாகிஸ்தானுக்கு ஆதரவாக ஒருபோதும் அறிக்கை வெளியிட்டதில்லை. ஆயுதங்களை அளித்தாலும், ஒருபோதும் வடக்கு எல்லையில் நேரடியாக சூழ்நிலையை பயன்படுத்த முயன்றதில்லை. இதுவே, பாகிஸ்தான் மீண்டும் அருணாச்சல பிரதேசம் குறித்து பேசுவதற்கு அடித்தளமாகிறது. இத்தகைய அரசியல் அரிக்கும் தன்மையுள்ள அறிக்கைகளை பாகிஸ்தான் தொடர்ந்து வெளியிடும்போது, இந்தியா பதிலடியாக பலூசிஸ்தான் அல்லது கைபர் பக்துன்க்வா மாகாணங்களின் எல்லை மோதல்கள் குறித்துக்கவலை தெரிவிக்கும் அறிக்கைகளை வெளியிடலாம்.
இந்தியாவின் வெளியுறவு கொள்கை தற்போது அந்த பிராந்தியத்தில் மிகவும் வலுப்பெற்றுள்ளது. இதையெல்லாம் பாகிஸ்தான் உணர்ந்து, தனது அரசியல் காய்களை நகர்த்துவதன் பின்னணியில், சீனாவின் ஆதரவை தேடுவதுடன், பாகிஸ்தானுக்குள் நிலவும் குழப்பங்களை திசை திருப்புவதும் ஒரு முக்கிய காரணமாகும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
