உலக அரசியல் மற்றும் பொருளாதார களத்தில் தற்போது அரங்கேறி வரும் மாற்றங்கள் ஒரு ‘மகா பெரிய மாற்றத்தை’ நோக்கி நகர்ந்து கொண்டிருக்கின்றன. குறிப்பாக அமெரிக்கா இந்தியாவிற்கு எதிராக 50 சதவீத வரி விதிப்பு மற்றும் பல்வேறு பொருளாதார தடைகளை விதித்த போதிலும், இந்தியாவிலிருந்து அமெரிக்காவிற்கான ஏற்றுமதி செப்டம்பர் 2024 முதல் சுமார் 27 சதவீதம் அதிகரித்துள்ளது. இது இந்தியாவின் பேரம் பேசும் வலிமையையும், அமெரிக்காவின் பொருளாதார தேவைகளையும் ஒருசேர வெளிப்படுத்துகிறது.
பால் பொருட்கள், தரவு பாதுகாப்பு மற்றும் விவசாய கொள்கைகளில் இந்தியா தனது சிவப்பு கோடுகளைத் தெளிவாக வரைந்துள்ள நிலையில், வர்த்தக ஒப்பந்தங்களுக்காக தனது இறையாண்மையைக் கோட்டை விட தயாராக இல்லை என்பதை நியூசிலாந்து மற்றும் ஓமன் உடனான ஒப்பந்தங்கள் நிரூபிக்கின்றன.
மறுபுறம், தொழில்நுட்ப துறையில் இந்தியாவின் ஆதிக்கத்தை சிதைக்க அமெரிக்கா தீவிரமாக முயன்று வருகிறது. எச்-1பி விசா நடைமுறைகளில் கொண்டு வரப்பட்டுள்ள புதிய மாற்றங்கள் மற்றும் விசா புதுப்பித்தலுக்காக இந்தியர்களை சொந்த நாட்டிற்கு திரும்ப சொல்லிவிட்டு, மீண்டும் நேர்காணலுக்கு பல ஆண்டுகள் காத்திருக்க வைக்கும் தந்திரம் ஆகியவை இந்தியாவின் சேவை துறையை நேரடியாக பாதிக்கும் நோக்கம் கொண்டவை. இது வெறும் நிர்வாகச் சிக்கல் அல்ல, மாறாக இந்தியாவின் அந்நிய செலாவணி வரத்தை குறைக்கவும், இந்தியாவின் ‘பிக் டெக்’ கனவுகளை முடக்கவும் அமெரிக்கா செய்யும் திட்டமிட்ட சதி என்று அரசியல் வல்லுநர்கள் கருதுகின்றனர்.
அண்டை நாடுகளின் வாயிலாக இந்தியாவிற்கு எதிராக ஒரு ‘நெருப்பு வளையத்தை’ அமெரிக்கா உருவாக்கி வருகிறது. குறிப்பாக வங்கதேசத்தில் ஷேக் ஹசீனாவின் வீழ்ச்சிக்கு பிறகு, முகமது யூனுஸின் தலைமையிலான ஆட்சி இந்தியாவின் பாதுகாப்புக்கு அச்சுறுத்தலாக மாறி வருகிறது. இந்தியாவிற்கு ஆதரவான ராணுவ அதிகாரிகளை பதவி நீக்கம் செய்வதும், பயங்கரவாதிகளை சிறையிலிருந்து விடுவிப்பதும் வங்கதேசத்தை தெற்காசியாவின் உக்ரைனாக மாற்றும் முயற்சியாகும். இருப்பினும், இந்தியா தனது எல்லைகளை பலப்படுத்துவதோடு, எத்தகைய சூழலையும் எதிர்கொள்ள தயாராக உள்ளது என்பதை தனது ராணுவ நகர்வுகள் மூலம் உணர்த்தியுள்ளது.
பொருளாதார ரீதியாக பார்க்கும்போது, தங்கம் மற்றும் வெள்ளியின் விலை உலக சந்தையில் முன்னெப்போதும் இல்லாத உச்சத்தை தொட்டு வருவது டாலரின் ஆதிக்கத்திற்கு முடிவு காலம் நெருங்கிவிட்டதை காட்டுகிறது. ஷாங்காய் மற்றும் நியூயார்க் சந்தைகளுக்கு இடையே வெள்ளி விலையில் நிலவும் பாரிய வேறுபாடு, உலக நாடுகளின் செல்வம் மேற்கிலிருந்து கிழக்கு நோக்கி நகர்வதை குறிக்கிறது. அதேபோல், செயற்கை நுண்ணறிவு தொழில்நுட்பத்தின் அபார வளர்ச்சி காரணமாக டி-ரேம் மற்றும் செமிகண்டக்டர் சிப்களுக்கு ஏற்பட்டுள்ள தட்டுப்பாடு, உலகளாவிய பணவீக்கத்தை மேலும் அதிகரிக்கும் என்று எதிர்பார்க்கப்படுகிறது.
தொழில்நுட்ப போரில் சாம்சங் மற்றும் கூகுள் போன்ற நிறுவனங்கள் வெள்ளி சுரங்கங்களை நேரடியாக கைப்பற்ற முயல்வதும், என்விடியா போன்ற நிறுவனங்கள் முன்கூட்டியே ஒப்பந்தங்களை செய்து கொள்வதும் எதிர்காப் பொருளாதார போரின் தீவிரத்தை உணர்த்துகின்றன. அமெரிக்காவின் பெரிய தொழில்நுட்ப நிறுவனங்கள் தங்களின் ஏகபோக உரிமையை தக்கவைக்க முயன்றாலும், சீனா உள்ளிட்ட நாடுகள் ‘ஓப்பன் சோர்ஸ்’ மாடல்களை வெளியிடுவது அமெரிக்காவின் பிடியை தளர்த்தியுள்ளது. இதனால்தான் ரிலையன்ஸ் மற்றும் அதானி போன்ற இந்திய நிறுவனங்களுடன் 70 பில்லியன் டாலர் மதிப்பிலான கூட்டு ஒப்பந்தங்களை செய்ய அமெரிக்க நிறுவனங்கள் ஓடி வருகின்றன.
இறுதியாக, உலக பொருளாதாரம் டாலர் அடிப்படையிலான அமைப்பிலிருந்து பொருட்கள் மற்றும் தாதுக்கள் அடிப்படையிலான அமைப்பிற்கு மாறி வருகிறது. அமெரிக்காவில் நிலவும் கட்டமைப்பு ரீதியான பணவீக்கம் மற்றும் கடன் நெருக்கடி காரணமாக, அந்த நாடு தனது நட்பு நாடுகளையே சுரண்ட தொடங்கியுள்ளது. இத்தகைய இக்கட்டான சூழலில், இந்தியா தனது சேவைகள் துறையிலிருந்து சொந்தமாக பொருட்களை தயாரிக்கும் பொருளாதாரமாக மாற வேண்டியது அவசியம். 2026-ஆம் ஆண்டிற்குள் உலக அரசியலில் இந்தியா ஒரு தவிர்க்க முடியாத சக்தியாக உருவெடுக்கும் என்பதையே இந்த ‘மகா நிதி மாற்றம்’ கோடிட்டு காட்டுகிறது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
