தேசிய பாதுகாப்பு மற்றும் புவிசார் அரசியல் அபாயங்களை கருத்தில் கொண்டு, சீன தொடர்புள்ள வெளிநாட்டு செயற்கைக்கோள்களின் பயன்பாட்டை இந்தியா படிப்படியாக குறைத்து வருகிறது. தொலைத்தொடர்பு மற்றும் ஒளிபரப்பு சேவைகளுக்காக பயன்படுத்தப்பட்டு வரும் இந்த செயற்கைக்கோள்களின் பயன்பாட்டை முற்றிலுமாக நிறுத்த இந்திய அரசு திட்டமிட்டுள்ளது.
இந்திய தேசிய விண்வெளி ஊக்குவிப்பு மற்றும் அங்கீகார மையம் (IN-SPACe), சீன தொடர்புள்ள சில நிறுவனங்கள் இந்தியாவில் செயற்கைக்கோள் சேவைகளை வழங்குவதற்கான முன்மொழிவுகளை நிராகரித்துள்ளது.
சீனா சாட், ஆப்ஸ்டார் மற்றும் ஹாங்காங்கை சேர்ந்த ஆசியாசட் (AsiaSat) ஆகிய நிறுவனங்களின் இந்திய ஒளிபரப்பாளர்கள் மற்றும் டெலிபோர்ட் ஆபரேட்டர்களுக்கு செயற்கைக்கோள் திறனை வழங்குவதற்கான முன்மொழிவுகளை IN-SPACe நிராகரித்துள்ளது.
கடந்த 30 ஆண்டுகளுக்கும் மேலாக இந்தியாவில் செயல்பட்டு வரும் ஆசியாசட் நிறுவனம் இதனால் பாதிக்கப்படும். அந்நிறுவனத்தின் AS5 மற்றும் AS7 ஆகிய இரண்டு செயற்கைக்கோள்களுக்கான அங்கீகாரம் மார்ச் 2026 வரை மட்டுமே செல்லுபடியாகும். அதன் மற்ற செயற்கைக்கோள்களான AS6, AS8, மற்றும் AS9 ஆகியவற்றின் செயல்பாட்டை தொடரக் கோரிய விண்ணப்பங்களும் நிராகரிக்கப்பட்டுள்ளன.
சீனத் தொடர்புள்ள செயற்கைக்கோள்களின் பயன்பாட்டை தவிர்க்குமாறு ஒளிபரப்பு மற்றும் டெலிபோர்ட் ஆபரேட்டர்களுக்கு அறிவுறுத்தப்பட்டுள்ளது. ஜீ மற்றும் சன் தொலைக்காட்சி போன்ற ஒளிபரப்பாளர்களும், டெலிபோர்ட் ஆபரேட்டர்களும், ஆசியாசட் 5 மற்றும் ஆசியாசட் 7 இலிருந்து இந்தியாவின் ஜிசாட் (G-SAT) அல்லது அமெரிக்காவை சேர்ந்த இன்டெல்சாட் (Intelsat) போன்ற பிற செயற்கைக்கோள்களுக்கு அடுத்த ஆண்டு மார்ச் மாதத்திற்குள் மாறும்படி அறிவுறுத்தப்பட்டுள்ளனர்.
சேவை தடைகளைத் தவிர்க்கும் நோக்கில் பல நிறுவனங்கள் ஏற்கனவே இந்த இடமாற்றத்தை தொடங்கிவிட்டன. எடுத்துக்காட்டாக, ஜீ நிறுவனம் தனது ஒளிபரப்பு சேவைகளை ஜிசாட் 30, ஜிசாட் 17 மற்றும் இன்டெல்சாட் 20 ஆகிய செயற்கைக்கோள்களுக்கு மாற்றிவிட்டதாக உறுதிப்படுத்தியுள்ளது.
விண்வெளித் துறையின் பாதுகாப்புக்காக இந்தியா கொண்டு வந்துள்ள புதிய ஒழுங்குமுறை கட்டமைப்பு இந்த கொள்கை மாற்றத்திற்குக் காரணமாகும். இந்தியாவில் செயல்பட விரும்பும் அனைத்து வெளிநாட்டு செயற்கைக்கோள்களும் இப்போது IN-SPACe அமைப்பிலிருந்து கட்டாயமாக வெளிப்படையான அங்கீகாரம் பெற வேண்டும்.
ஜிசாட் திட்டம் மூலம் இந்தியா போதுமான உள்நாட்டு செயற்கைக்கோள் திறனை உருவாக்கியுள்ளது. இதன் மூலம், முந்தைய காலங்களில் நிலவிய பற்றாக்குறை போல, இப்போது சீன தொடர்புள்ள சேவைகளை நம்பியிருக்க வேண்டிய அவசியம் இல்லை என்று அதிகாரிகள் தெரிவித்தனர்.
இன்டெல்சாட், இன்மார்சாட், ஸ்டார்லிங்க், ஒன்வெப், ஐபார் (IPAR) மற்றும் ஆர்பிட் கனெக்ட் போன்ற பல வெளிநாட்டு ஆப்பரேட்டர்கள் ஏற்கனவே இந்தியாவில் சேவை வழங்க ஒப்புதல் பெற்றுள்ளனர்.
விண்வெளி இன்று தேசிய பாதுகாப்புக்கு மையமாக மாறியுள்ள நிலையில், உள்நாட்டு செயற்கைக்கோள் திறன் மற்றும் உள்கட்டமைப்புக்கு அரசு முன்னுரிமை அளிக்கும் இந்த முடிவு சரியானதாக இருப்பதாக தகவல் தொழில்நுட்ப வல்லுனர்கள் கருத்து தெரிவித்துள்ளனர்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
