2026-ஆம் ஆண்டு தமிழ் திரையுலகம் ஒரு மிகப்பெரிய மாற்றத்தை நோக்கி பயணிக்கும் ஆண்டாக அமையும் என எதிர்பார்க்கப்படுகிறது. கடந்த 2025-ஆம் ஆண்டில் ‘லப்பர் பந்து’, ‘டூரிஸ்ட் ஃபேமிலி’, ‘மாமன்’, ‘சிறை’ போன்ற யதார்த்தமான மற்றும் வாழ்வியலோடு தொடர்புடைய சுமார் 10 திரைப்படங்கள் வெளியாகி மக்களிடையே பெரும் வரவேற்பை பெற்றன. இந்த வெற்றியை தொடர்ந்து, 2026-இல் இத்தகைய ‘கண்டென்ட்’ சார்ந்த படங்களின் எண்ணிக்கை இருமடங்காக உயர்ந்து, சுமார் 20 படங்களாவது வெளியாகும் என்ற நம்பிக்கை நிலவுகிறது. இது வெறும் வணிக ரீதியான வளர்ச்சி மட்டுமல்ல, தமிழ் சினிமாவின் ரசனை மாற்றத்திற்கான ஒரு முக்கிய அடையாளமாகவும் பார்க்கப்படுகிறது.
இந்த மாற்றத்திற்கு வித்திடும் வகையில், தமிழ் சினிமாவின் முன்னணி இயக்குநர்களே தற்போது சிறிய பட்ஜெட் மற்றும் புதுமுகங்களை வைத்துப் படம் எடுக்க ஆர்வம் காட்டி வருகின்றனர். பிரபல இயக்குநர் கார்த்திக் சுப்பராஜ் அண்மையில் பேசுகையில், இரண்டு படங்களை புதுமுகங்களை வைத்துத் தயாரிக்க போவதாகக் குறிப்பிட்டுள்ளார்.
பெரிய நட்சத்திரங்களை வைத்து பிரம்மாண்டமான படங்களை இயக்கிய கார்த்திக் சுப்பராஜ், லோகேஷ் கனகராஜ், வெற்றிமாறன் போன்ற இயக்குநர்கள் புதுமுகங்களை அறிமுகப்படுத்தும் போது, அந்த படங்களுக்கு மக்களிடையே ஒரு தனி மரியாதை கிடைக்கிறது. இயக்குநரின் பெயருக்காகவே ரசிகர்கள் திரையரங்குகளுக்கு வருவதால், இந்த படங்களும் பெரிய வெற்றியை எட்ட முடிகிறது.
தயாரிப்பாளர்களைப் பொறுத்தவரை, இத்தகைய படங்கள் மிகுந்த லாபகரமானவை. முன்னணி நடிகர்களுக்கு கொடுக்கப்படும் கோடிக்கணக்கான ஊதியம் மிச்சமாகிறது, இயக்குநர்களுக்கான ஊதியம் மட்டுமே பெரிய செலவாக கருதப்படுகிறது. நடிகர்களுக்கான செலவு குறைவாக இருப்பதால், அந்த தொகையை தொழில்நுட்ப ரீதியாகவும், கதைக்களத்தை மேம்படுத்தவும் பயன்படுத்த முடிகிறது. இதன் மூலம் தரமான படங்கள் உருவாவதுடன், தயாரிப்பாளர்களுக்கு பொருளாதார ரீதியான இடர்ப்பாடுகள் குறைகின்றன. புதுமுகங்களை வைத்து எடுக்கப்படும் படங்களின் வெற்றி, தமிழ் சினிமாவில் புதிய திறமையாளர்கள் உருவாகவும் வழிவகுக்கிறது.
ஓடிடி சந்தையிலும் தற்போது ஒரு ஆரோக்கியமான மாற்றம் ஏற்பட்டுள்ளது. முன்னதாக படம் வெளியாவதற்கு முன்பே உரிமங்கள் வாங்கப்பட்டு வந்த நிலையில், இப்போது பெரும்பாலான ஓடிடி தளங்கள் படம் வெளியான பிறகு அதன் தரத்தை பொறுத்து வாங்க முன்வருகின்றன. “நல்ல கண்டென்ட் இருந்தால் மட்டுமே வாங்குவோம்” என்ற அவர்களின் பிடிவாதம், இயக்குநர்களை சிறந்த படங்களை கொடுக்க தூண்டுகிறது. திரையரங்குகளில் வெற்றி பெறும் படங்களுக்கு ஓடிடி தளங்களில் அதிக விலை கிடைப்பதால், இயக்குநர்கள் மற்றும் தயாரிப்பாளர்கள் தரமான படைப்புகளை உருவாக்குவதில் அதிக கவனம் செலுத்த தொடங்கியுள்ளனர்.
ஒரு திரைப்படம் தோல்வியடைவதற்கு மிக முக்கியமான காரணமாக கருதப்படுவது, இயக்குநரின் சுதந்திரத்தில் நடிகர்கள் தலையிடுவதுதான். திரைக்கதை அமைப்பிலோ அல்லது காட்சிகளின் வடிவமைப்பிலோ கதாநாயக நடிகர்கள் தேவையற்ற மாற்றங்களை செய்யும் போது, அந்த படத்தின் ஆன்மா சிதைந்து விடுகிறது. நடிகர்கள் தங்களின் பிம்பத்திற்காக கதையை மாற்ற சொல்வது படத்தின் ஒட்டுமொத்த போக்கையும் பாதித்து, இறுதியில் தோல்வியில் முடிகிறது. இயக்குநருக்கு முழு சுதந்திரம் அளிக்கப்படும் போது மட்டுமே, ஒரு முழுமையான படைப்பு உருவாகும் என்பதை திரையுலகம் உணர தொடங்கியுள்ளது.
ஒட்டுமொத்தமாக பார்க்கையில், 2026-ஆம் ஆண்டு என்பது நட்சத்திரங்களின் பிம்பத்தை விட கதையின் வலிமைக்கு முக்கியத்துவம் கொடுக்கும் ஆண்டாக இருக்கும். பிரம்மாண்டமான வணிக படங்களுக்கு மத்தியில், எளிய மக்களின் வாழ்வியலை பேசும் சிறிய பட்ஜெட் படங்கள் திரையரங்குகளில் ஆதிக்கம் செலுத்தும். தயாரிப்பாளர்கள், இயக்குநர்கள் மற்றும் ரசிகர்கள் என மூன்று தரப்பினரும் தரமான கண்டென்ட்டை நோக்கி நகர்வது, தமிழ் சினிமாவை உலக தரத்திற்கு இட்டு செல்லும் என்பதில் ஐயமில்லை.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
