விஜய் டிவியின் ‘சிறகடிக்க ஆசை’ சீரியலில் இன்று அரங்கேறிய காட்சிகள் ஒட்டுமொத்த ரசிகர்களையும் கொந்தளிக்க செய்துள்ளது. ரோகிணியின் முகத்திரையை மீனா ஏன் முன்னரே கிழிக்கவில்லை என்ற ஒரே காரணத்திற்காக, அந்த குடும்பமே ஒன்று திரண்டு மீனாவை வேட்டையாடுகிறது. குறிப்பாக, விஜயாவின் வசைபாடல்கள் ஒருபுறம் இருக்கட்டும், முத்துவின் ஆவேசமும் அண்ணாமலையின் மௌனமான வருத்தமும் தான் ரசிகர்களை ‘வச்சு செய்ய’ தூண்டியுள்ளது. “அறிவே இல்லையா முத்து உங்களுக்கு?” என்று சமூக வலைதளங்களில் நெட்டிசன்கள் பொங்கித் தீர்த்து வருகின்றனர்.
மீனா இந்த உண்மையை மறைத்ததற்குப் பின்னால் இருந்த மனிதாபிமானத்தை இந்த குடும்பம் வசதியாக மறந்துவிட்டது. ஒருவேளை மீனா உண்மையை சொல்லியிருந்தால், முத்துவின் முரட்டுத்தனமான கோபத்திற்கு ரோகிணி பலியாகியிருப்பார். ரோகிணிக்கு ஏதேனும் விபரீதம் நேர்ந்திருந்தால், முத்து இன்று சிறைக்கம்பிகளை தான் எண்ணிக்கொண்டிருப்பார். மகனின் நிலையை பார்த்து அண்ணாமலையின் உயிர் பிரிந்திருக்கும், விஜயா விதவையாகியிருப்பார். தன் தாலியை காக்கவும், புகுந்த வீட்டின் கௌரவத்தைக் காக்கவுமே மீனா நிந்தனைகளை சுமந்து மௌனம் காத்தார். ஆனால், இதை புரிந்து கொள்ளாமல் முத்து மீனாவை துரோகியை போலச் சித்திரவதை செய்வது உச்சக்கட்ட கொடுமை.
நெட்டிசன்களின் கோபம் முத்துவை விட அண்ணாமலை மீதுதான் அதிகமாக திரும்பியுள்ளது. முத்து ஒரு அவசர குடுக்கை என்பது ஊருக்கே தெரியும். ஆனால், “மீனா எதை செய்தாலும் அதில் ஒரு நியாயம் இருக்கும்” என்று அடிக்கடி வசனம் பேசும் அண்ணாமலை, இன்று மீனாவைச் சந்தேக கண்ணோடு பார்ப்பது அவரது கதாபாத்திரத்தையே சிதைத்துவிட்டது. ஸ்ருதி – ரவி திருமணத்தின் போதே மீனாவின் தியாகத்தை தாமதமாக புரிந்துகொண்ட அண்ணாமலை, இப்போது மட்டும் ஏன் தடுமாறுகிறார்? திரைக்கதையை இழுப்பதற்காக ஒரு நல்ல மனிதரின் பண்பை இயக்குநர் இப்படி சிதைக்கலாமா என்று ரசிகர்கள் கேள்வி எழுப்புகின்றனர்.
எதையும் நியாயமாகவும், மனதில் பட்டதை ஓப்பனாக பேசும் ஸ்ருதி மற்றும் ரவி கூட மீனாவை சாடுவதை ஜீரணிக்கவே முடியவில்லை. வீட்டில் யாருமே சாப்பிடாமல் மீனாவை ஒரு குற்றவாளியை போல பார்ப்பது, அவர் இத்தனை காலம் அந்த குடும்பத்திற்காகச் சிந்திய வியர்வைக்கும் கண்ணீருக்கும் கொடுத்த அவமானமாகும். விஜயா போன்ற ஒரு குணச்சித்திரத்திற்கு மீனாவை பழிவாங்க ஒரு சந்தர்ப்பம் கிடைத்தால் கொண்டாடுவார் என்பது தெரிந்ததே. ஆனால், முத்து தன் மனைவியின் மௌனத்திற்கு பின்னால் இருந்த உயிரை காக்கும் நோக்கத்தை புரியாமல் அவசரப்படுவது, ஒரு பெண்ணின் தியாகத்திற்கு சமூகம் தரும் கசப்பான பரிசு.
எப்படியும் இன்னும் சில நாட்களில் ரோகிணியின் மொத்த உண்மையும் வெளிவரும்போது, முத்துவும் அண்ணாமலையும் மீனாவிடம் மன்னிப்பு கேட்பார்கள் என்பது உறுதி. ஆனால், அதற்காக ஒரு பெண்ணை தொடர்ச்சியாக பலிகடாவாக்கி கொண்டே இருப்பது சீரியல் ரசிகர்களுக்கு சலிப்பை ஏற்படுத்தியுள்ளது. ஒருத்தி ரொம்ப நல்லவளாக இருந்தால் இந்த உலகம் அவளை வாழ விடாது என்பதையும், தியாகம் செய்பவளுக்கு துரோகி என்ற பட்டம் தான் கிடைக்கும் என்பதையும் தான் இன்றைய காட்சிகள் ஆணித்தரமாகச் சொல்கின்றன.
மீனாவின் அந்த சோகமான முகம், குடும்பத்திற்காக தன்னை தொலைத்து கொள்ளும் ஒவ்வொரு பெண்ணின் வலியையும் பிரதிபலிக்கிறது. ரோகிணியின் துரோகத்தை விட, மீனாவின் தியாகத்தை புரிந்து கொள்ளாத முத்துவின் முட்டாள்தனம் தான் இன்றைய எபிசோடின் மிகப்பெரிய தோல்வி. இந்த போராட்டத்தில் மீனா ஒரு வெற்றியாளராக மீண்டு வருவார் என்பதில் சந்தேகமில்லை, ஆனால் அவர் மனதிலுண்டான ரணங்களை முத்து எப்படி ஆற்றப்போகிறார் என்பதை பொறுத்திருந்துதான் பார்க்க வேண்டும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
