இந்தியன் படத்தின் மாபெரும் வெற்றியைத் தொடர்ந்து இயக்குனர் ஷங்கர் உலகநாயகன் கமல் கூட்டணியில் 28 ஆண்டுகளுக்குப் பிறகு இந்தியன் 2 படம் எடுக்கப்பட்டது.
இன்னும் அந்த லஞ்சப்பேய் மாறலையே என்ற ஆதங்கத்தில் தான் எடுத்தார்களாம். ஆனால் இந்த முறை லஞ்சத்தை அழிக்க இந்தியன் தாத்தா மட்டும் போதாது. அது ஒவ்வொரு இந்தியக்குடிமகனின் கடமையாக இருக்க வேண்டும்.
அந்தக் களையை ஒவ்வொருவரும் தன் வீட்டில் இருந்தே பிடுங்கி எறிய வேண்டும் என ஆரம்பிக்கும் படத்தில் இந்தியன் தாத்தா சில இடங்களில் தொய்வு கொடுத்து விட படம் படுத்துத் தூங்கி விடுகிறது. முதல் பாகத்தில் உள்ள விறுவிறுப்பு மிஸ் ஆகிறது. இதனால் படம் பல நெகடிவ் விமர்சனங்களை சந்தித்து பிளாப் ஆகி விட்டது.
இதைத் தொடர்ந்து இந்தியன் 3ம் தயாராகிக் கொண்டு இருப்பதால் இதுவாவது தேறுமா என ரசிகனுக்கு சந்தேகம் வர அதைப் போக்கும் வகையில் நேயர் ஒருவர் பிரபல தயாரிப்பாளர் சித்ரா லட்சுமணனிடம் இப்படி ஒரு கேள்வியைக் கேட்டுள்ளார். அதற்கு அவர் சொன்ன பதில் இதுதான்.
இந்தியன் 3 படத்தை ஒரு ரசிகனின் பார்வையில் இயக்குனர் ஷங்கர் இரண்டு மூன்று தடவை திரையிட்டுப் பார்க்க வேண்டும். ஷங்கரைப் பொருத்தவரைக்கும் இன்றைக்கு தமிழ்சினிமாவில் இருக்கக்கூடிய பல முக்கியமான இயக்குனர்கள், நெருங்கிய நண்பர்கள் எல்லாரையும் அழைத்து ஒரு முறை போட்டுக் காட்ட வேண்டும்.
அந்தப் படத்துல ஏதாவது குறை இருக்குன்னு சொன்னாங்கன்னா அது நியாயமான குறைன்னு ஷங்கருக்குப் பட்டுதுன்னா அதை எல்லாத்தையும் திருத்தி அதற்குப் பின்னால் அந்தப் படத்தை வெளியிட்டார் என்றால் நிச்சயமாக அது வெற்றிப்படமாக அமைய வாய்ப்பு இருக்குன்னு நினைக்கிறேன். இவ்வாறு அவர் தெரிவித்துள்ளார்.
இந்தியன் 2 படத்தின் தோல்விக்குப் பல காரணங்கள் சொல்லப்படுகிறது. கமலின் அரசியல் நிலைப்பாடும், சினிமா நிலைப்பாடும் முரணாகிறது.
இசை அமைப்பாளர் அனிருத்தின் சொதப்பல், கமலின் பல கெட்டப்புகளும் சுவாரசியமில்லாமல் போனது, காமெடியே இல்லாதது, பாடல்கள் ஹிட் அடிக்காதது, எழுத்தாளர் சுஜாதாவின் வசனம் மிஸ் ஆனதுன்னு இப்படி காரணங்களை அடுக்கிக்கிட்டே இருக்காங்க. ஆனால் இந்தியன் படத்துல கவுண்டமணி, செந்தில் காமெடி, ஏ.ஆர்.ரகுமானின் சூப்பர்ஹிட் பாடல்கள், பின்னணி இசை, பிஜிஎம்னு எல்லாமே அசத்தலாக இருந்தது.
இந்தியன் 3 படத்தையும் இந்தியன் 2ல் இருந்து பிரித்து விட்டதால் தான் தோல்வி என சில யூடியூபர்கள் கருத்து தெரிவித்துள்ளனர். எது எப்படியோ எங்களுக்கு இந்தியன் 3வது உருப்படியா வரணும்னு பல கமல் ரசிகர்கள் குமுறுகின்றனர்.