விஜய் டிவியில் ஒளிபரப்பாகும் பிக் பாஸ் தமிழ் சீசன் 9, 21ஆம் நாளில் ஆதிரை வெளியேற்றம், விஜய் சேதுபதியின் கண்டிப்பு என நேற்றைய எபிசோட், எதிர்பார்த்தது போலவே ஆக்ரோஷமாகவும், அதிர்ச்சி நிறைந்ததாகவும் இருந்தது.
போட்டியில் இருந்த ஆதிரை வெளியேற்றப்பட்டது இந்த வாரத்தின் முக்கிய நிகழ்வு.
கமல்ஹாசன் பாணியில், விஜய் சேதுபதி நேரடியாக சென்று சில போட்டியாளர்களை கடுமையாக சாடினார். குறிப்பாக, திவாகர் மற்றும் வினோத் ஆகியோரை பல விஷயங்களுக்காக கண்டித்தார்.
எப்போதும் சண்டையிட்டு, கன்டென்ட் கொடுத்து வரும் பாருவை விஜய் சேதுபதி கடுமையாக விமர்சித்தார்.
இந்த வாரத்தின் இன்னொரு முக்கிய நிகழ்வு வினோத்தின் பிறந்தநாள் மற்றும் கனி தலைமையில் விமர்சனம். வினோத்துக்கு பிறந்தநாள் வாழ்த்துக்களை விஜய் சேதுபதி உற்சாகத்துடன் தெரிவித்தார். நிகழ்ச்சியின் முக்கிய விவாதம், கடந்த வார தலைவராக இருந்த கனியின் செயல்பாடுகள் குறித்து இருந்தது.
கனிக்கு எதிராகப் புகார் அளித்தவர்களில் கம்ருதீன் முதன்மையானவர். ஆனால், அவருடைய பேச்சுகள் குழப்பமாகவும், ஆதாரமற்றதாகவும் இருந்தன.
குழப்பமான பிராது: கம்ருதீன் எழுந்து நின்று, “கனி தன்னிடமிருந்து வந்து கேட்டிருக்க வேண்டும், ஆனால் கேட்கவில்லை” என்று ஒரு குற்றச்சாட்டை வைத்தார். இது கனி, விஜய் சேதுபதி, பார்வையாளர்கள் என யாருக்குமே புரியவில்லை. ஒருவரின் மீது புகார் அளிக்க செல்லும் போது, சரியான தரவுகளை வைத்து செல்ல வேண்டும். “தவறு செய்தவர்கள் வழக்குகளில் மாட்டுவது போல,” ஆதாரங்கள் இல்லாமல் அவசர அவசரமாக புகார் வைப்பது பயனற்றது. கம்ருதீன் செய்வது, தான் ஒரு மாய உலகத்தில் வாழ்வது போலவும், எல்லோரும் தனக்குக் கீழ் இருக்க வேண்டும் என்று எதிர்பார்ப்பது போலவும் இருந்தது.
கம்ருதீனுக்கு எதாவது ஒரு பிரச்சனை என்றால், உடனே எழுந்து நின்று புகார் அளிக்கும் மனப்பான்மை உள்ளது. இது ஒரு வீட்டில், “அவர் கிள்ளிவிட்டார், இவர் குத்திவிட்டார்” என்று புகார் அளிக்கும் குழந்தையை போல இருக்கிறது. கம்ருதீன் தொடர்ச்சியாக துஷாராவை சீண்டுவதும், அவரை டார்ச்சர் செய்வதும் தொடர்ந்தது.
கம்ருதீன்-துஷாரா பிரச்சனையின் மையக்கருத்து, “நீ எப்படி அரோராவை விட இன்னொருவருடன் பழகலாம்?” என்பதுதான். இது, ஒருவர் தன்னை நிராகரித்துவிட்டார் என்ற அடிப்படை வலியின் வெளிப்பாடு. துஷாரா, கம்ருதீனை ‘பாய்ஃப்ரெண்ட் மெட்டீரியல் இல்லை, வெறும் நண்பர்’ என்று நிராகரித்ததுதான் அவருக்குள்ள பெரிய கோபம். நிராகரிப்பு ஏற்பட்டால், அதிலிருந்து விடுபட்டு, அடுத்த கட்டத்துக்கு நகர வேண்டும். ஆனால், கம்ருதீன் அதையே மனதில் ஏற்றி, அடுத்த அடியை எடுத்து வைக்க முடியாமல் தவிக்கிறார்.
கனியின் தலைமை குறித்து பேசும் போது, பாருவை அருகில் நிற்க வைத்து, “நீங்கள் இருவரும் ஜெயிலில் குசுகுசு என்று பேசுவது போல பேசாமல் சத்தமாக பேசுங்கள்” என்று வெளிப்படையாக சாடினார். கனி, தனக்கு ஏற்பட்ட பாரபட்சத்துக்காக சாரி சொல்ல வேண்டுமா என்று கேட்டபோது, விஜய் சேதுபதி, “சாரி எதுவும் சொல்ல வேண்டாம்” என்று மறுத்தார். இது, கனி மீதான அதிருப்தியை மென்மையாக வெளிப்படுத்தினாலும், பொதுவெளியில் கனி மேலும் கெட்ட பெயர் எடுக்கக் கூடாது என்று அவர் நினைத்திருக்கலாம்.
எப்.ஜே.க்கு சலுகை காட்டியதாக எழுந்த குற்றச்சாட்டை கனி ஒத்துக்கொண்டார். “தவறுதான் செய்தேன்” என்று ஒப்புக்கொள்வது, சேதாரத்தை குறைக்கும் ஒரு நேர்மையான அணுகுமுறையாகும். இது, எதையும் ஒத்துக்கொள்ள மறுக்கும் கம்ருதீனுக்கு நேர் எதிராக இருந்தது.
கம்ருதீன் மற்றும் பாரு ஆகிய இரு போட்டியாளர்களும் வேண்டுமென்றே ‘ஸ்கிரீன் ஸ்பேஸ்’ எடுப்பதற்காக சண்டையிட்டு பேசுவதாக தோன்றுகிறது. “நாங்கள்தான் கன்டென்ட் கொடுக்கிறோம், அதனால் ரெட் கார்டு கொடுத்து எங்களை வெளியே அனுப்ப மாட்டார்கள்” என்ற நம்பிக்கையுடன் இருவரும் தொடர்ந்து சண்டையிடுகின்றனர். இது, கன்டென்ட் கொடுப்பதற்காக மட்டும் இல்லை, இவர்களின் மனநிலையே சண்டை போடும் ஐடியாலஜியுடன்தான் இருக்கிறது என்பதைக் காட்டுகிறது.
அரோராவும், துஷாராவும் ஒதுங்கி இருந்து தங்கள் நேரத்தை செலவிட்டனர். அரோரா வந்த போதும் விஜய் சேதுபதி, “ஓ! நீங்கள் இருக்கிறீர்களா?” என்று கிண்டலாக கேட்டது, அவர்கள் பெரிய அளவில் கன்டென்ட்டை கொடுக்கவில்லை என்பதைக் குறிக்கிறது.
அரோரா மற்றும் துஷாரா இருவரும் பெரும்பாலும் ஒரே மாதிரியான நிறங்களில் உடை அணிந்து வருவது, வெளியில் உள்ளவர்களுக்கு சுட்டிக்காட்டப்பட்டது. இறுதியில் ஆதிரை வெளியேற்றப்பட்டது அவரது ‘ஆட்டிட்யூட்’ மற்றும் பிக் பாஸ் விதிகளுக்கு கீழ்ப்படியாததால்தான்.
சண்டைகள் நடக்கும் போது ஒதுங்கியே இருக்கும் கலையரசன் போன்ற போட்டியாளர்கள், கவனிக்கப்படாமல் தப்பித்து வருவதாகவும், அடுத்த எலிமினேஷனுக்கு இவர்களை வெளியே அனுப்ப திட்டமிடப்படுவதாகவும் விவாதிக்கப்பட்டது.
விஜய் சேதுபதி இந்த வாரம் பேசிய விதம், போட்டியாளர்கள் தொடர்ந்து தங்கள் அடிப்படை குணாம்சங்களுடன் சண்டை போடுகிறார்கள் என்பதையும், வெளியில் இருந்து வரும் விமர்சனங்களை நிர்வாகம் உன்னிப்பாக கவனித்து, அதை வைத்து போட்டியாளர்களை சீண்டி, ஆட்டத்தின் போக்கைத் தீர்மானிக்கிறது என்பதையும் தெளிவாக காட்டியுள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.