தமிழில் தற்போது ஒளிபரப்பாகி வரும் பிக் பாஸ் நிகழ்ச்சியின் எட்டாவது சீசன் மெல்ல மெல்ல சூடு பிடித்து வருகிறது. ஆரம்பத்தில் இதன் வேகம் குறைவாக இருந்ததால் ரசிகர்கள் மத்தியில் அதிகமாக விமர்சனத்தையும் சந்தித்திருந்தது. ஆனால் நாட்கள் செல்ல செல்ல, பிக் பாஸ் நிகழ்ச்சியில் வரும் ஒவ்வொரு டாஸ்க்கே இதன் விறுவிறுப்பை அதிகப்படுத்தி வருவதால் போட்டியாளர்களுக்கு இடையேயும் நிறைய சண்டைகள் நடந்து வருகிறது.
ஆண்கள், பெண்கள் என இரு அணிகள் இருப்பதே இந்த வீட்டிற்குள் நிறைய சண்டைகளை புதிது புதிதாக உருவாக்கி வருகிறது. அந்த வகையில் சமீபத்தில் முத்துக்குமரன் என்ற ஒரே போட்டியாளரை சுற்றி ஆண்கள் அணியில் இருக்கும் அனைவரும் இயங்கி வருவதாக ஒரு விமர்சனம் உருவாகி இருந்தது. இது தொடர்பாக விஜய் சேதுபதியும் தனது கருத்துக்களை முன்வைக்க, முத்துக்குமரனும் சற்று குழப்பத்தில் இருப்பது போன்றும் தெரிகிறது.
இதேபோல பெண்கள் அணியில் ஏற்கனவே ஒற்றுமை இல்லாத நிலையில் இந்த வாரம் அதை இன்னும் பிளவுபடுத்தும் வகையில் சில சம்பவங்கள் அரங்கேறி இருந்தது. பெண்கள் அணியில் இருக்கும் ஆனந்தி, தர்ஷிகா, அன்ஷிதா, சுனிதா மற்றும் ஜாக்குலின் என ஐந்து பேர் தான் அங்கே அனைத்து முடிவுகளையும் எடுத்து வருவதாகவும் மற்ற நான்கு பெண்களிடம் எதையும் அவர்கள் விவாதிக்கவில்லை என்றும் ஒரு குற்றச்சாட்டு எழுந்திருந்தது.
சௌந்தர்யா இதனை விஜய் சேதுபதியிடம் தெளிவுபடுத்த மூன்றாவது வாரம் வெளியேறியிருந்த தர்ஷா குப்தாவும் பெண்கள் அணி ஐந்து பேர் கொண்ட குழுவின் மூலம் தான் இயங்கி வருவதாகவும் அவர்களில் சிலரை தனக்கு சுத்தமாக பிடிக்கவில்லை என்றும் கூறி இருந்தார். இதனால் முந்தைய சில சீசன்களைப் போல இந்த முறையும் பிக் பாஸ் வீட்டிற்குள் குரூப்பிசம் ஆரம்பித்துள்ளதாகவும் பெண்கள் அணியில் இருக்கும் அனைவரும் பரபரத்து போய் கிடக்கின்றனர்.
இப்படி கடந்த பல தினங்களிலேயே நிறைய குழப்பங்கள் பிக் பாஸ் வீட்டிற்குள் நடக்க தற்போது வைல்டு கார்டு என்ட்ரியில் ஐந்து போட்டியாளர்கள் உள்ளே நுழைய இருப்பதாக தகவல்கள் வெளியாகி உள்ளது. ஒவ்வொரு பிக் பாஸ் நிகழ்ச்சியிலும் வைல்டு கார்டு என்ட்ரியாக சிலர் உள்ளே வரும் நிலையில் இந்த முறை ஐந்து பேர் அதற்காக வருகை தர உள்ளதாக கூறப்படுகிறது.
இதில் இரண்டாவது வாரம் பிக் பாஸ் வீட்டில் இருந்து வெளியேறிய அர்னவின் முன்னாள் மனைவியான திவ்யா, பிரபல நடிகை ஐஸ்வர்யா பாஸ்கரன், சின்னத்திரை பிரபலம் டி.எஸ்.கே, ஸாலின் சோயா மற்றும் கடந்த பிக் பாஸ் சீசனில் களமிறங்கிய மாயாவின் சகோதரியும் பாடகியுமான ஸ்வாகதா என ஐந்து பேர் களமிறங்க உள்ளனர்.
ஏற்கனவே பிக் பாஸ் வீட்டில் இருப்பவர்கள், மூன்று வாரங்களில் தான் அனைவரையும் பற்றி தெரிந்து கொண்டு தங்களின் கேமை ஆடி வருகின்றனர். இதற்கு மத்தியில் புதிதாக ஐந்து பேர் இணைய உள்ளதாக வெளியான தகவல் இன்னும் இந்த நிகழ்ச்சியை சுவாரஸ்யப்படுத்தும் என்றும் தெரிகிறது.