நடிகை வினிதா தமிழ் திரை உலகில் குறுகிய காலத்தில் பல பிரபல நடிகர்களுடன் நடித்த முன்னணி நடிகைகளில் ஒருவராவார். ஆனால், ஒரே ஒரு வழக்கால் அவரது வாழ்க்கையே மாறியதுடன் சினிமா வாய்ப்புகளும் அதிகம் பறிபோனதாக கூறப்படுகிறது.
கடந்த 1993 ஆம் ஆண்டு கார்த்திக் நடித்த சின்ன ஜமீன் என்ற திரைப்படத்தின் மூலம் தமிழில் அறிமுகமானார் நடிகை வினிதா. இதனை அடுத்து அவர் சரத்குமாருடன் கட்டபொம்மன், வேலுச்சாமி, மகா பிரபு உள்ளிட்ட படங்களில் நடித்தார். அதேபோல் பிரபுவுடன் வியட்நாம் காலனி, மிஸ்டர் மெட்ராஸ், பெரிய குடும்பம் போன்ற படங்களிலும் நடித்துள்ளார்.
அவர் நடித்த பதவிப்பிரமாணம், வேலுச்சாமி, மிஸ்டர் மெட்ராஸ், மகா பிரபு போன்ற படங்கள் சூப்பர் ஹிட் ஆகியது. கடந்த 1996 ஆம் ஆண்டு மட்டும் அவர் எட்டு படங்களில் நாயகியாக நடித்தார். இதில் தெலுங்கு மற்றும் கன்னட படங்களும் அடக்கம்.
1996 ஆம் ஆண்டுக்கு பிறகு அவருக்கு லேசான சரிவு ஏற்பட்டது. இருப்பினும் வினிதா ஒரு சில படங்களில் இரண்டாவது நாயகியாக நடித்துக் கொண்டிருந்த நிலையில் கடந்த 2003 ஆம் ஆண்டு எதிர்பாராத ஒரு சம்பவம் அரங்கேறியதாக தெரிகிறது. விபச்சார வழக்கு ஒன்றில் வினிதா சிக்கியதுடன் சர்வதேச கார் நிறுவனம் ஒன்றின் மேலதிகாரியாக இருந்த ஒருவருடன் உல்லாசமாக இருந்ததாகவும் அவர் மீது குற்றம் சாட்டப்பட்டது. இதன் காரணமாக அவர் கைதும் செய்யப்பட்டார்.
இதன் பின்னர் அவரது குற்றம் நிரூபிக்கப்படவில்லை என்றும் கூறப்பட்டது. இந்த நிகழ்வுக்கு பிறகு அவரை திரையுலகினர் ஒதுக்க தொடங்கியதாகவும் அதனால் அவருக்கு பெரிய அளவில் வாய்ப்புகள் கிடைக்கவில்லை என்றும் கூறப்பட்டது.
இருப்பினும் அவர் ’துள்ளும் காலம்’ என்ற திரைப்படத்தில் நடித்தார். இதில் அவரது சகோதரர் ஷங்கர் நாயகனாக நடித்திருந்தார். இதனையடுத்து அவர் நீண்ட இடைவேளைக்கு பிறகு ’எங்க ராசி நல்ல ராசி’ என்ற திரைப்படத்தில் நடித்த நிலையில் அதன் பிறகு அவர் திரைபடங்களில் நடிக்கவில்லை.
முன்னதாக தனது கிளாமர் நடிப்பால் கடந்த 90களில் பிரபலமான நடிகையாகவும் வினிதா இருந்தார். மேலும் அவரது டான்ஸ் கூட அந்த காலத்தில் தனித்தன்மையாக இருந்தது என்றும், நடிகர் பிரபுவுக்கும் அவருக்கும் சிறப்பான கெமிஸ்ட்ரி செட்டாகும் என்றும் ரசிகர்கள் கருத்து கூறியிருந்தனர்.
தமிழ் திரையுலகில் கிட்டத்தட்ட ஐந்து வருடங்களில் பல பிரபலங்களுடன் நடித்த நடிகை வினிதா தற்போது என்ன செய்கிறார் என்ற தகவல் இல்லை என்றாலும் இன்றும் மிஸ்டர் மெட்ராஸ் உட்பட பழைய படங்களை தொலைக்காட்சியில் பார்க்கும் போது அவரது நடிப்பை ரசிகர்கள் ரசிப்பார்கள் என்பதும் குறிப்பிடத்தக்கது.