தமிழகத்தில் புதிய அரசியல் சக்தியாக உருவெடுத்துள்ள தமிழக வெற்றிக் கழகம் ஆட்சிப் பொறுப்பேற்று வெற்றிகரமாக ஒரு மாதம் உருண்டோடிவிட்டது. சட்டமன்றத்தில் நடந்த மிக முக்கியமான நம்பிக்கை வாக்கெடுப்பில் தவெக அரசு வெற்றி பெற்று, தங்களின் ஆட்சியைத் தற்காலிகமாகத் தக்கவைத்துக் கொண்ட போதிலும் முதலமைச்சர் விஜய் அவர்களுக்குப் பின்னால் இருக்கும் அரசியல் ரீதியான நெருக்கடிகளும் குடைச்சல்களும் இன்னும் ஓய்ந்தபாடில்லை.
பொதுவாக ஒரு நம்பிக்கை வாக்கெடுப்பு நடந்து முடிந்தால் அடுத்த ஆறு மாத காலத்திற்கு ஆட்சிக்கு எதிராக எந்தவொரு புதிய நம்பிக்கையில்லாத் தீர்மானத்தையும் கொண்டுவர முடியாது என்ற அரசியல் சட்ட விதிகளின்படி தவெகவினர் பெரும் நிம்மதியில் இருந்து வந்தனர். ஆனால், அவர்களின் அந்த நிம்மதியான தூக்கத்தைக் கெடுக்கும் வகையில், அறிவாலயம் தற்போது தீட்டியுள்ள ஒரு புதிய அரசியல் வியூகம் தவெக தரப்பிற்குப் பெரும் அதிர்ச்சியை ஏற்படுத்தியுள்ளது.
இந்த அதிரடியான அரசியல் ஆட்டத்தை அறிவாலயத்தின் பின்னணியில் இருந்து முழுமையாக வடிவமைத்து முன்னெடுத்து வருவது தற்போதைய எதிர்க்கட்சித் தலைவர் உதயநிதி ஸ்டாலின்தான் என்று அரசியல் வட்டாரங்கள் தெரிவிக்கின்றன. நடிகர் விஜய் அவர்கள் குறுகிய காலத்தில் முதலமைச்சரானதை அரசியல் ரீதியாக ஏற்றுக்கொள்ள முடியாத அவர், எப்படியாவது தவெக அரசைக் கவிழ்க்க வேண்டும் என்பதில் தீவிரமாகக் காய்நகர்த்தி வருகிறார். இதற்கு முன்பாக, தேர்தல் முடிவுகள் வெளியான சமயத்தில் அதிமுக ஆட்சி அமைப்பதற்கு வெளியிலிருந்து ஆதரவு தரவும், பின்னர் நடந்த நம்பிக்கை வாக்கெடுப்பில் தவெக அரசை அடியோடு எதிர்த்து வாக்களிக்கவும் அவர் திட்டமிட்டிருந்தார். ஆனால், இத்தகைய அவசர முடிவுகளால் மக்கள் மத்தியில் தேவையற்ற கோபத்திற்கு ஆளாக நேரிடும் என்று திமுக தலைவர் ஸ்டாலின் தடுத்ததன் காரணமாகவே, கடந்த வாக்கெடுப்பில் கலந்துகொள்ளாமல் திமுக ஒட்டுமொத்தமாகப் புறக்கணித்தது.
இருப்பினும், தவெகவினர் இன்னும் சில மாதங்களுக்குள் ஆட்சி நிர்வாகத்தின் சூட்சுமங்களைக் கற்றுக்கொண்டு தங்களின் அதிகாரத்தை முழுமையாக நிலைநிறுத்திவிட்டால், அது பின்னாட்களில் திமுகவையே துண்டு துண்டாக உடைக்கும் வேலைக்கு வழிவகுத்துவிடும் என்று உதயநிதி அஞ்சுகிறார். ஏற்கனவே திமுகவைச் சேர்ந்த ஐந்து முக்கிய சட்டமன்ற உறுப்பினர்களிடம் தவெகவின் சீனியர் அமைச்சர் ஒருவர் ரகசியத் தொடர்பில் இருப்பதாகக் கசிந்த அதிரடித் தகவல்தான், உதயநிதியை இப்போதே முந்திக்கொண்டு இந்த ஆட்சிக் கவிழ்ப்பு சதித்திட்டத்தை அரங்கேற்ற தூண்டுகோலாக இருந்ததாகக் கூறப்படுகிறது.
இதற்காக இந்திய அரசியலமைப்பு சட்டவிதி 179-ஐப் பயன்படுத்தி, ஆறு மாதங்களுக்குள் ஆட்சிக்கு எதிராக நம்பிக்கையில்லாத் தீர்மானம் கொண்டுவர முடியாது என்ற விதியைத் தாண்டி, சபாநாயகரை நீக்குவதற்கான தீர்மானத்தைக் கொண்டுவர ‘ஆபரேஷன் ஸ்பீக்கர்’ என்ற வியூகத்தை அவர் கையில் எடுத்துள்ளார். சபாநாயகர் மீதான இந்த அதிரடித் தீர்மானமே, மறைமுகமாக தவெக ஆட்சியின் பலத்தை சோதிக்கும் ஒரு இறுதிப் போராக அமையும்.
தற்போது ஐந்து தொகுதிகளின் எம்.எல்.ஏ-க்கள் தங்களின் பதவிகளை ராஜினாமா செய்துள்ளதால், சட்டசபையின் மொத்த பலம் 229 ஆகக் குறைந்துள்ள ஒரு அசாதாரண சூழல் நிலவுகிறது. இதில் தவெக அரசு தப்பிழைத்துத் தங்களின் பெரும்பான்மையை நிரூபிக்க வேண்டுமானால், சபாநாயகர் ஜே.சி.டி.பிரபாகருக்கு ஆதரவாகக் குறைந்தபட்சம் 115 எம்.எல்.ஏ-க்களின் பலம் அவசரமாகத் தேவைப்படுகிறது. இதைக் கச்சிதமாகக் குறிவைத்துத்தான், திமுகவின் முன்னாள் அமைச்சர்களான அனிதா ராதாகிருஷ்ணன், செந்தில் பாலாஜி, எம்.ஆர்.கே.பன்னீர்செல்வம், சிவசங்கர், மா.சுப்பிரமணியன், மூர்த்தி ஆகியோருக்கு தவெக எம்.எல்.ஏ-க்களைத் தங்களின் பக்கம் இழுக்கும் மிக ரகசியமான அசைன்மென்ட்டுகளை உதயநிதி வழங்கியுள்ளார். தற்போது தவெகவிடம் இருக்கும் 106 சொந்த பலத்தோடு, காங்கிரஸ், விசிக, இடதுசாரிகள் என மொத்தம் 119 பேரின் ஆதரவோடு விஜய் ஆட்சி நடத்தி வரும் நிலையில், தவெகவின் அதிருப்தி ‘கழக நிர்வாகிகளை’ வளைக்க திமுக வலைவீசி வருகிறது.
அமைச்சர் பதவி கிடைக்காமல் ஏமாற்றத்தில் இருக்கும் சில தவெக எம்.எல்.ஏ-க்களைத் தொடர்பு கொண்டு, “ஆட்சியைக் கவிழ்க்க உதவினால், அடுத்த தேர்தலில் திமுக சார்பில் போட்டியிட சீட் மற்றும் வெற்றிபெற்ற பின் மந்திரி பதவி வழங்கப்படும்” என்ற கவர்ச்சிகரமான உத்தரவாதத்தோடு பெரிய ‘ஸ்வீட் பாக்ஸுகளும்’ கைமாறுவதாகப் பேசப்படுகிறது. தென்மாவட்டத்தைச் சேர்ந்த இரண்டு எம்.எல்.ஏ-க்களிடம் ஏற்கனவே டீல் முடிந்துவிட்டதாகவும், தவெகவிலிருந்து 15 எம்.எல்.ஏ-க்களை உருவிவிட்டால் ஆட்சி தானாகக் கவிழ்ந்துவிடும் என்றும் திமுகவினர் கணக்குப் போடுகின்றனர். ஆனால், திமுகவின் இந்த அதிரடித் திட்டத்திற்கு தவெகவின் கூட்டணிக் கட்சிகளான விசிக மற்றும் இடதுசாரிகள் இப்போதே முட்டுக்கட்டைப் போட்டுள்ளன. தங்களுக்கு இந்த ஆட்சியில் உரிய பிரதிநிதித்துவம் கிடைத்துள்ளதால், காலை வாரும் அரசியலைச் செய்து தங்களின் எதிர்காலத்தைக் கெடுத்துக்கொள்ள மாட்டோம் என்றும், குறுக்குவழியில் ஆட்சியைப் பிடிக்கும் பாசிச நடவடிக்கைக்குத் துணைபோக மாட்டோம் என்றும் அவர்கள் கறாராகக் கூறிவிட்டனர்.
இதுகுறித்து தவெக தரப்பினர் கூறும்போது, “எங்கள் எம்.எல்.ஏ-க்களைத் தூக்குவதெல்லாம் திமுகவின் வெறும் பகற்கனவு என்றும், இதுவரை 100-க்கும் மேற்பட்ட தங்களின் திமுகவின் ஒன்றியச் செயலாளர்கள் தவெகவுக்கு தாவியதைத் தடுக்கத் துப்பற்றுக் கிடக்கிறது” என தவெகவின் சீனியர் அமைச்சர் ஒருவர் ஆணித்தரமாகப் பதிலடி கொடுத்துள்ளார். சபாநாயகர் தீர்மானம் ஒருவேளை தோற்றாலும் ஆட்சிக்கு எந்த ஆபத்தும் வராது என்றும், திமுகவின் சதித்திட்டம் ஒருபோதும் பலிக்காது என்றும் தவெகவினர் நம்புகின்றனர். கடைசி நேரத்தில் முதலமைச்சர் ஸ்டாலின் தலையிட்டு உதயநிதியின் இந்த வேகத்தைக் கட்டுப்படுத்த வாய்ப்புகள் இருந்தாலும், இத்தகைய ஸ்திரத்தன்மை இல்லாத அரசியல் விளையாட்டுகள் தமிழகத்தின் தொழில் முதலீடுகளையும் பொருளாதாரத்தையும் பாதிக்கும் என்பதே நடுநிலையாளர்களின் கவலையாக உள்ளது; இதையெல்லாம் முதல்வர் விஜய் எவ்வாறு முறியடிக்கப் போகிறார் என்பதைப் பொறுத்திருந்துதான் பார்க்க வேண்டும்.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
