தமிழகத்தில் புதிதாக பொறுப்பேற்றுள்ள முதலமைச்சர் விஜய் மற்றும் அவரது ‘தமிழக வெற்றிக் கழக’ அரசுக்கு குறுகிய காலத்திலேயே பொதுமக்கள் மத்தியில் கிடைத்துள்ள பிரம்மாண்டமான ஆதரவு, ஒட்டுமொத்த அரசியல் வட்டாரங்களையும் ஆச்சரியத்தில் ஆழ்த்தியுள்ளது. பொதுவாக ஒரு புதிய அரசு பதவியேற்றவுடன் ஆரம்ப கட்டத்தில் விமர்சனங்கள் எழுவது சகஜம். ஆனால், தற்போதைய விஜய் அரசு சில சவால்களை சந்தித்தாலும், மக்கள் அவர் மீது வைத்துள்ள தார்மீக நம்பிக்கையும் தரும் ஆதரவும் அரசியல் வரலாற்றில் இதுவரை இல்லாத புதியதொரு சகாப்தமாக பார்க்கப்படுகிறது. எத்தகைய குறைகள் இருந்தாலும், தங்களின் ‘விஜய் அண்ணா’ அனைத்தையும் சரிசெய்து விடுவார் என்ற அசைக்க முடியாத எண்ணம் அடித்தட்டு மக்களிடம் ஆழமாக வேரூன்றியுள்ளது.
தற்போதைய சூழலில் மின்சார தட்டுப்பாடு போன்ற சில நிர்வாக சிக்கல்கள் ஆங்காங்கே நிலவினாலும், பொதுமக்கள் அதனை பெரிதுபடுத்தாமல் மிகப்பொறுமையாக கடந்து போகிறார்கள். “கரண்ட் போனாலும் பரவாயில்லை, கொஞ்ச நாளில் எங்க விஜய் அண்ணா எல்லாவற்றையும் சரி பண்ணிடுவாரு” என்று பொதுமக்கள் தங்களின் எதார்த்தமான ஆதரவு குரலை வெளிப்படுத்தி வருகின்றனர். ஒரு புதிய தலைவன் தங்களுக்கு நன்மைகளை செய்யும்போது, ஆரம்ப கட்டத்தில் ஏற்படும் இத்தகைய தற்காலிக அசௌகரியங்களை பொறுத்துக் கொள்ள மக்கள் தயாராக இருக்கிறார்கள் என்பதையே இத்தகைய கருத்துக்கள் நமக்கு தெளிவுபடுத்துகின்றன.
அதேபோல், மாநிலத்தில் ஆங்காங்கே சட்டம் ஒழுங்கு பிரச்சனைகள் மற்றும் குற்ற சம்பவங்கள் நடப்பது உண்மைதான் என்பதை நடுநிலையாளர்களும் பொதுமக்களும் ஒப்புக்கொள்கிறார்கள். ஆனால், முந்தைய ஆட்சிகளை போல இதனை மூடி மறைக்காமல், தற்போதைய அரசு இரும்புக்கரம் கொண்டு ஒடுக்கும் என்ற அசைக்க முடியாத விசுவாசம் மக்களிடம் உள்ளது. “அங்கங்க சட்டம் ஒழுங்கு பிரச்சனை இருப்பது உண்மை தான், ஆனாலும் அதையும் எங்க விஜய் தம்பி கண்டிப்பா சரி பண்ணிடுவாரு” என்று இளைஞர்களும் பெண்களும் முதலமைச்சரின் அதிரடி நடவடிக்கைகள் மீது தங்களின் முதிர்ச்சியான நம்பிக்கையைத் தொடர்ந்து பதிவு செய்து வருகின்றனர்.
விஜய் அரசின் மிக முக்கியமான மற்றும் மிகப்பெரிய சாதனையாக பார்க்கப்படுவது, நிர்வாகத்தில் கொண்டு வரப்பட்டுள்ள நேர்மையும் வெளிப்படைத்தன்மையும்தான். அரசு அலுவலகங்களில் நீண்டகாலமாக புரையோடி போயிருந்த லஞ்சத்திற்கும் ஊழலுக்கும் இந்த அரசு கிட்டத்தட்ட ஒரு ‘முற்றுப்புள்ளி’ வைத்துள்ளதாக மக்கள் மனதார பாராட்டுகின்றனர். மூத்த குடிமக்கள் பலரும் தங்களின் மகிழ்ச்சியை வெளிப்படுத்தும் போது, “இது என் மகன் விஜய் செய்த மாபெரும் சாதனை” என்று உணர்ச்சிபொங்க கூறி, அவரை தங்களின் சொந்த குடும்பப் பிள்ளையாக கருதித் தங்களின் ஆசீர்வாதங்களை அள்ளி வழங்கி வருகிறார்கள்.
மறுபுறம், உலகளாவிய பொருளாதார சூழல் மற்றும் சில தவிர்க்க முடியாத காரணங்களால், ஒன்னு ரெண்டு தொழிற்சாலைகள் மற்றும் பெருநிறுவனங்கள் தமிழக கையை விட்டு போனது உண்மைதான் என்றாலும், அது தற்காலிகமானதுதான் என்று பொருளாதார ஆர்வலர்கள் கருதுகின்றனர். முதலமைச்சர் விஜய்யின் சர்வதேச தொடர்புகளும், புதிய தொழில் கொள்கைகளும் தமிழகத்திற்கு புதிய முதலீடுகளை எப்படியும் அசுர வேகத்தில் குவிக்கும் என்ற எதிர்பார்ப்பு நிலவுகிறது. அதன் மூலம், தமிழ்நாட்டு இளைஞர்களுக்கு பிரம்மாண்டமான வேலை வாய்ப்புகளை அவர் நிச்சயம் ஏற்படுத்தி தருவார் என்று சிறுவர்கள் முதல் பெரியவர்கள் வரை, “எங்களுக்கு விஜய் அங்கிள் மேல முழு நம்பிக்கை இருக்குது” என மழலை குரலிலும் தங்களின் ஆதரவை தெரிவித்து வருகின்றனர்.
ஒட்டுமொத்தமாக பார்க்கும்போது, தமிழக அரசியல் வரலாற்றில் இவ்வளவு குறுகிய காலத்தில், இத்தனை பெரிய மக்கள் சப்போர்ட் மற்றும் பாசிட்டிவ் அலை இதுக்கு முன்னாடி இருந்த எந்த முதலமைச்சர்களுக்காவது இருந்திருக்கா என்பது மிகப்பெரிய கேள்விக்குறிதான். மக்கள் காட்டும் இந்த அபாரமான அன்பும் நம்பிக்கையும்தான் முதலமைச்சர் விஜய்க்கு கிடைத்துள்ள ஆகச்சிறந்த அரசியல் அங்கீகாரமாகும். பொதுமக்களின் இந்த எதிர்பார்ப்புகளையும் நம்பிக்கையையும் சிதறவிடாமல், தமிழகத்தை ஒரு பொற்காலப் பாதையில் வழிநடத்திச் செல்ல வேண்டிய மிக முக்கியமான பொறுப்பு தற்போதைய தவெக அரசின் கைகளில் முழுமையாக அர்ப்பணிக்கப்பட்டுள்ளது.
டிஜிட்டல் ஊடக துறையில் 15 வருடங்களாக பணிபுரிகிறேன். அனைத்து பிரிவுகளிலும் கட்டுரைகள் எழுதுவேன். செய்திகள், பொழுதுபோக்கு, தொழில்நுட்பம், விளையாட்டு ஆகிய பிரிவுகள் அதிக கட்டுரைகள் எழுதியுள்ளேன்.
